বিচাৰকৰ সংখ্যা প্ৰয়োজনতকৈ কম। গতিকে কামৰ চাপ তেওঁলোকৰ ওপৰত বেছি। এনে পৰিস্থিতিত উচ্চতম ন্যায়ালয়ৰ কলেজিয়ামৰ পৰামৰ্শ অনুসৰি নৰেন্দ্ৰ মোদী চৰকাৰে ন্যায়াধীশ নিযুক্তিৰ অনুমোদন পলম কৰা বুলি কেইবাবছৰ ধৰি অভিযোগ উত্থাপন হৈ আহিছে। এবাৰ মুখ্য ন্যায়াধীশ টি এছ ঠাকুৰে ৰাজহুৱাভাৱে ইয়াৰ বাবে কেন্দ্ৰক দোষাৰোপ কৰিছিল।
এইবাৰ কেন্দ্ৰই উচ্চতম ন্যায়ালয়ৰ কলেজিয়ামৰ পৰামৰ্শ ক্ষিপ্ৰতাৰে কাৰ্যকৰী কৰি অভিযোগ ভুল বুলি প্ৰমাণ কৰিলে। প্ৰসংগক্ৰমে কিৰেন ৰিজিজুৱে মোদীৰ কেবিনেটত আইন মন্ত্ৰী পদৰ পৰা পদত্যাগ কৰাৰ ঠিক পিছদিনাই কেন্দ্ৰীয় কেবিনেটৰ পৰামৰ্শ মতে ৰাষ্ট্ৰপতি দ্ৰৌপদী মুৰ্মুৱে শুকুৰবাৰে অন্ধ্ৰ প্ৰদেশ উচ্চ ন্যায়ালয়ৰ মুখ্য ন্যায়াধীশ প্ৰশান্ত কুমাৰ মিশ্ৰ আৰু জ্যেষ্ঠ অধিবক্তা কেভি বিশ্বনাথনক উচ্চতম ন্যায়ালয়ৰ ন্যায়াধীশ হিচাপে অনুমতি প্ৰদান কৰে। ইয়াৰ পিছতে শুকুৰবাৰে বিয়লি উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুড়ে তেওঁলোকৰ শপত পাঠ কৰোৱায় ৷
এই সপ্তাহত মুখ্য ন্যায়াধীশ চন্দ্ৰচুড়ৰ নেতৃত্বত গঠিত কলেজিয়ামে উচচতম ন্যায়ালয়ৰ ন্যায়াধীশ হিচাপে দুয়োজনৰ নাম কেন্দ্ৰক পৰামৰ্শ দিয়ে। প্ৰায় অভূতপূৰ্ব পদক্ষেপেৰে মোদী চৰকাৰে তেওঁলোকৰ নিযুক্তিৰ অনুমতি প্ৰদান কৰিছে। ইয়াৰ পূৰ্বে উচ্চতম ন্যায়ালয়ে বিগত কেইবছৰমানৰ পৰা ন্যায়াধীশ পদৰ বাবে পৰামৰ্শ দিয়া নামক লৈ কেন্দ্ৰ-ন্যায়পালিকাৰ মাজত চলি থকা কাজিয়াক লৈ ক্ষোভ প্ৰকাশ কৰিছিল। তাৰ ওপৰত ন্যায়াধীশ নিযুক্তিৰ কলেজিয়াম ব্যৱস্থাৰ ‘স্বচ্ছতা’ক লৈ প্ৰশ্ন উত্থাপন কৰাৰ বাবে সদ্য পদচ্যুত কেন্দ্ৰীয় আইন মন্ত্ৰী ৰিজিজুক উচ্চতম ন্যায়ালয়ে ধমক দিছিল।
এই পৰিস্থিতিত মোদী চৰকাৰে কলেজিয়ামৰ পৰামৰ্শ মানি ল’বলৈ কুণ্ঠাবোধ কৰে নে নকৰে সেই বিষয়ে কৌতুহলৰ সৃষ্টি হয়। বৃহস্পতিবাৰে প্ৰধানমন্ত্ৰীয়ে আইন মন্ত্ৰী ৰিজিজু আৰু আইন বিভাগৰ ৰাজ্যিক মন্ত্ৰী এছ পি সিং বাঘেলক অপসাৰণ কৰে। ৰাজস্থানৰ বিজেপি সাংসদ অৰ্জুন ৰাম মেঘৱালক আইন মন্ত্ৰালয়ৰ দায়িত্বত স্বতন্ত্ৰ ৰাজ্যিক মন্ত্ৰী হিচাপে নিযুক্তি দিয়া হৈছে।
