পৰেশ বৰুৱাৰ প্ৰস্তাৱ নাকচঃ অৰুণাচলবাসী অসমীয়াক স্থায়ী বাসিন্দাৰ প্ৰমাণপত্ৰ নিদিয়ে ইটানগৰে

কিছুদিন পূৰ্বে আলফা স্বাধীনৰ সেনাধ্যক্ষ পৰেশ বৰুৱাই অৰুণাচল প্ৰদেশ চৰকাৰক ৰাজ্যখনত বসবাস কৰা অসমীয়া লোকসকলক স্থায়ী বাসিন্দাৰ প্ৰমাণপত্ৰ বা পি আৰ চি প্ৰদান কৰিবলৈ আহ্বান জনাই এক পত্ৰ প্ৰেৰণ কৰিছিল। কিন্তু সকলোকে হতভম্ব কৰি সেনাধ্যক্ষগৰাকীৰ প্ৰস্তাৱ নাকচ কৰে অৰুণাচলৰ মুখ্যমন্ত্ৰী পেমা খাণ্ডুয়ে।

আলফা স্বাধীনৰ লগতে সদৌ অসম ছাত্ৰ সন্থাইও অৰুণাচলত অতীজৰে পৰা বাস কৰা অসমীয়াভাষী সাতটা জনগোষ্ঠীক ৰাজ্যখনত স্থায়ী বাসিন্দাৰ প্ৰমাণপত্ৰ প্ৰদানৰ বাবে আহ্বান জনাইছিল।

উল্লেখযোগ্য যে প্ৰেমা খাণ্ডুৱে এই প্ৰসংগত সাংবাদিকে সোধা প্ৰশ্নৰ উত্তৰত তেওঁ এই সন্দৰ্ভত কোনো আনুষ্ঠানিক পত্ৰ লাভ কৰা নাই, কেৱল সামাজিক মাধ্যমৰ পৰাহে জানিব পাৰিছে বুলি মন্তব্য কৰে। 

ইয়াৰ লগতে খাণ্ডুয়ে কয় যে অৰুণাচল প্ৰদেশ চৰকাৰে পি আৰ চি প্ৰদান কৰিব বিচাৰিছিল যদিও অৰুণাচলৰ জনগণে বিষয়টোৰ তীব্ৰ বিৰোধিতা কৰাৰ বাবেই অনাঅৰুণাচলী লোকক পি আৰ চি প্ৰদানৰ পৰা চৰকাৰ বিৰত আছে।

অৱশ্যে এই প্ৰসংগত ইটানগৰত ভয়াবহ সংঘৰ্ষৰ সৃষ্টি হৈছিল। প্ৰতিবাদী জনতাই উপ মুখ্যমন্ত্ৰী চাওনা মেইনৰ বাসগৃহত অগ্নিসংযোগ কৰিছিল আৰু আৰক্ষীৰ গুলীত তিনিজনকৈ প্ৰতিবাদকাৰীৰ প্ৰাণ গৈছিল।

পৰেশ বৰুৱাই মুখ্যমন্ত্ৰী পেমা খাণ্ডুলৈ লিখা পত্ৰত পি আৰ চি মঞ্জুৰ কৰাৰ বাবে পদক্ষেপ গ্ৰহণ কৰিবলৈ অনুৰোধ কৰি উল্লেখ কৰিছিল যে “অৰুণাচল প্ৰদেশ সদায়েই বছৰ বছৰ ধৰি তাত বাস কৰা অসমীয়া ভাষী লোকসকলৰ প্ৰতি সদয় হৈ আহিছে। আনহাতে ১৯৭২ত নেফা গঠন হোৱাৰ পূৰ্বৰে পৰা প্ৰজন্মৰ পাছত প্ৰজন্ম সেই ভূমিত বাস কৰি অহা বাসিন্দাসকল এতিয়া বিভাজনৰ সংকটৰ সন্মুখীন হৈছে”। 

লগতে লাহে লাহে সংখ্যালঘু হৈ পৰা অসমীয়া লোকসকল অৰ্থনৈতিকভাৱে জুৰুলা হৈ পৰাৰ উপৰিও অস্তিত্বৰ সংকটত পৰিছে। এতিয়া অসংখ্য পৰিয়াল উত্তৰাধিকাৰ সন্দৰ্ভত প্ৰশ্নৰ সন্মুখীন হৈছে। এই অসমীয়া পৰিয়ালবোৰৰ ঐতিহ্য যাতে হেৰাই নাযায় তাৰ বাবে উচিত পদক্ষেপ ল’বলৈ আহ্বান জনাই সেনাধ্যক্ষ গৰাকীয়ে।

উল্লেখযোগ্য যে অৰুণাচল প্ৰদেশত বহু দশকজুৰি মৰাণ, আহোম, দেউৰী, আদিবাসী, কছাৰী আৰু অসমীয়া মূলৰ আন লোকসকল বসবাস কৰি আহিছে। এতিয়া অনাগত সময়েহে নিৰ্ধাৰণ কৰিব এইসকল লোকৰ ভৱিষ্যত!