কনভয়ত আক্ৰমনঃ জেদ প্লাছ নিৰাপত্তাত থাকিব আছাদুদ্দিন ওৱেইছি

এতিয়াৰ পৰা  জেদ প্লাছ নিৰপত্তা বেষ্টনীত থাকিব  এআইএমআইএমৰ  মুৰব্বী তথা সাংসদ আছাদুদ্দিন ওৱেইচি ৷ উত্তৰ প্ৰদেশৰ মিৰাটত প্ৰচাৰ চলাই দিল্লীলৈ উভতি অহাৰ সময়ত   তেওঁৰ কনভয়ক লক্ষ্য কৰি  গুলী চালনা কৰাৰ এদিন  পাছতে  জেদ  শ্ৰেণীৰ নিৰাপত্তা ব্যৱস্থা প্ৰদান কৰিবলৈ সিদ্ধান্ত গ্ৰহণ কৰা হৈছে ৷ ইতিমধ্যে মিৰাটৰ কিথৌধ অঞ্চলত তেওঁৰ কনভয়ত গুলীচালনা কৰাৰ বাবে দুজন লোকক গ্ৰেপ্তাৰ কৰা হৈছে ৷ ইয়াৰে এজন অভিযুক্ত হৈছে নয়দাৰ বাসিন্দা শচীন  ৷ তেওঁৰ  বিৰুদ্ধে পূৰ্বেও  হত্যাকে ধৰি বিভিন্ন অপৰাধমূলক গোচৰ  ৰুজু হৈ  আছে। ফেচবুক প্ৰ’ফাইলত  নিজকে   হিন্দু সোঁপন্থী সংগঠনৰ সদস্য বুলি প্ৰকাশ কৰিছে শচীনে ৷ আনজন অভিযুক্ত হৈছে চাহাৰনপুৰৰ বাসিন্দা  শুভম ৷  আৰক্ষীয়ে প্ৰকাশ কৰা অনুসৰি  তেওঁলোক  ওৱেইচি আৰু তেওঁৰ ভাতৃ তথা  বিধায়ক আকবৰুদ্দিন ওৱেইচিৰ মন্তব্যত অসন্তুষ্ট হৈ এই আক্ৰমন কৰিছিল বুলি স্বীকাৰোক্তি  দিছে  ৷ আৰক্ষীয়ে তেওঁলোকৰ পৰা হস্ত নির্মিত  পিষ্টল উদ্ধাৰ কৰিছে ৷ কিছুদিন পূর্বে  তেওঁলোকে এই  পিষ্টল  ক্ৰয় কৰিছিল। আৰক্ষীয়ে দুই অভিযুক্তই  আগ্নেয়াস্ত্ৰ ক্ৰয় কৰা লোকসকলক বিচাৰি অভিযান আৰম্ভ কৰিছে ৷ এআইএমআইএম নেতাজনে উত্তৰ প্ৰদেশ নিৰ্বাচনৰ বাবে প্ৰচাৰ চলাই থকাৰ লগতে মিৰাটত এখন ৰাজহুৱা সভা সম্বোধন কৰিছিল।