অসম-মিজোৰাম সীমান্তৰ দৰে পুনৰ সংঘটিত হ’ব নেকি অন্য এক নাৰকীয় ঘটনা ! তেনে এক আশংকাই এতিয়া দেখা দিছে অসম-অৰুণাচল সীমান্ততো।লখিমপুৰ জিলাৰ কাকৈ ৰাজগড় অঞ্চলত একাংশ অৰুণাচলী লোকে অসমৰ কেইবা হেক্টৰ ভূমি বে-দখল কৰি ভূঁই ৰোৱা কাৰ্যই যেন তাৰেই ইংগিত বহন কৰিছে।
এই ঘটনা প্ৰত্যক্ষ কৰি লখিমপুৰৰ বন বিভাগৰ এটা দল উক্ত স্থানত উপস্থিত হৈছিল যদিও অৰুণাচলী লোকৰ ৰণচণ্ডী মূৰ্ত্তি দেখি পিছ হুঁহকিবলৈ বাধ্য হ’য়। বন বিভাগৰ কৰ্মচাৰী এজনে কোৱা অনুসৰি হাতে-হাতে চোকা অস্ত্ৰ লৈ অহা লোক সকলে বন বিভাগৰ দলটোক আক্ৰমণ কৰিবলৈ উদ্যত হোৱাত উপায়হীন হৈ তেওঁলোকে সেই স্থান ত্যাগ কৰে।
যিহেতু উণ্মত্ত লোক সকলক প্ৰতিৰোধ কৰিব পৰাকৈ বন কৰ্ম্মীৰ হাতত পৰ্যাপ্ত সুবিধা নাছিল।বৰঞ্চ অৰুণাচলী লোকসকলে বন বিভাগৰ দলটোক সেই স্থানলৈ অহাৰ কাৰণ সোধাৰ লগতে অতি সোনকালে সেই ঠাই ত্যাগ কৰিবলৈহে নিৰ্দেশ দিয়ে। আজি দৈনিক খবৰ কাকতত প্ৰকাশিত এক বাতৰি অনুসৰি ৫ জনীয়া এই বন বিভাগৰ দলটোৱে লখিমপুৰ আৰক্ষীৰ সহায় বিচাৰিছিল যদিও আৰক্ষীৰ সহায় নাপাই অকলেই ঘটনাস্থলীলৈ ৰাওনা হৈছিল।
অন্য এক অভিযোগ অনুসৰি লখিমপুৰ জিলা প্ৰশাসনৰ দুৰ্বল ভূমিকাৰ সুযোগ গ্ৰহণ কৰি বিগত কিছুদিনৰ পৰা উক্ত স্থানত অৰুণাচলী লোকৰ আগ্ৰাসন বৃদ্ধি পোৱাৰ লগতে লখিমপুৰৰ কেইবাখনো সংৰক্ষিত বনাঞ্চলত ভূমি বে-দখল কৰি বসবাস কৰিবলৈ আৰম্ভ কৰিছে।
তেনেক্ষেত্ৰত যি কোনো সময়তে অসম- মিজোৰাম সীমান্তৰ দৰে অসম- অৰুণাচল সীমান্ততো একে ঘটনা সংঘটিত হোৱাৰ আশংকা কৰা হৈছে। ইতিমধ্যে সমগ্ৰ অঞ্চলটোত এক চেপা উত্তেজনাই বিৰাজ কৰিছে।
উল্লেখযোগ্য যে বিগত সময়তো উক্ত স্থানত ভূমি বে-দখল কৰি ভুঁই ৰোৱাৰ চেষ্টা কৰিছিল অৰুণাচলী লোকে। যদিও জিলা প্ৰশাসন আৰু বন বিভাগৰ লোকৰ তৎপৰতাত উভটি যাবলৈ বাধ্য হৈছিল এই সকল লোক।
ইফালে যোৱা দুদিন পূৰ্বে দিল্লীত অসমৰ সীমা সমস্যাক লৈ ৰাজ্যৰ মুখ্যমন্ত্ৰী হিমন্ত বিশ্ব শৰ্মাই প্ৰধান মন্ত্ৰী আৰু গৃ্হ মন্ত্ৰীৰ সৈতে এক আলোচনাত মিলিত হৈছিল। ৰাজ্যৰ দাঁতি কাষৰীয়া ৰাজ্যৰ লগত শান্তি স্থাপনৰ বাবে কেন্দ্ৰই সকলো ব্যৱস্থা গ্ৰহণ কৰাৰো আশ্বাস প্ৰদান কৰিছে।যদিও পুনৰ আন এক আগ্ৰাসনৰ ঘটনা পোহৰলৈ অহাত মুখ্যমন্ত্ৰীয়ে এতিয়া কি ব্যৱস্থা গ্ৰহণ কৰে সেইয়া পৰৱৰ্তী সময়ত লক্ষণীয় হ’ব।
