চুটি ছবি “আলধৰা”লৈ শ্ৰেষ্ঠ ছবিৰ সন্মান।

অসমীয়া ছবি জগতলৈ পুনৰ আহিছে এক ভাল খবৰ। ভবেন হাজৰিকাৰ কাহিনী আৰু পৰিচালনাৰে সত্ৰ নগৰী মাজুলীকেন্দ্ৰিক তথ্যচিত্ৰ ‘আলধৰা দি পাথ অব্ লাইফʼ চুটি ছবিখনে ১০তম দিল্লী আন্তঃৰাষ্ট্ৰীয় চুটি ছবি মহোৎসৱত শ্ৰেষ্ঠ ছবিৰ সন্মান লাভ কৰে।এই খৱৰটোৱে ছবিখনৰ লগত জড়িত সকলো কলা-কুশলীক উৎসাহিত কৰাৰ লগতে মহাপুৰুষজনাৰ অমৰ সৃষ্টি সত্ৰ বিশ্বদৰবাৰত পুনৰ এবাৰ জিলিকাই তুলিবলৈ সক্ষম হৈছে। সত্ৰীয়া সংস্কৃতিৰ সকলো উপাদান থকা তথ্যচিত্ৰখনৰ গীতত কণ্ঠদান কৰিছে শিশুশিল্পী ত্ৰিদীপ শইকীয়া,সঞ্জয় বৰা আৰু নতুন কমলাবাৰী সত্ৰৰ বৰগায়ন প্ৰফুল্ল বৰাই।অভিনয় শিল্পীসকল হৈছে শ্ৰী হৰি বৰা বৰবায়ন,গোবিন বৰা পাঠক,কৰুণা বৰা,সংগীত নাটক অকাডেমি বঁটা প্ৰাপক হৰিচৰণ ভূঞা বৰবায়ন,দিলীপ শৰ্মা,চন্দ্ৰ হাজৰিকা,ৰমেশ বৰা,শিশুশিল্পী স্বপ্ননীল হাজৰিকা,অনুৰাগ কলিতা,গোপাল বৰা,কৃষ্ণ বৰা আদি বহুকেইজন।কেমেৰা পাপু বৰা,সম্পাদনা ঋষিকেশ দাস আৰু ৰূপ সজ্জা সীমান্ত কলিতাৰ আৰু প্ৰযোজনা প্ৰতিভা বৰাৰ।আনুষ্ঠানিক শিক্ষাৰ লগতে সত্ৰীয়া সংস্কৃতিৰে প্ৰভাৱিত কৰি দৈনন্দিন ব্যৱহাৰ্য কৰ্মৰাজিৰ সকলো শিক্ষাৰে শিক্ষিত কৰাৰ সবল উপস্থাপনেৰে আসোঁৱাহপূৰ্ণ আৰু অপশক্তিৰ ক্ৰমাগত বিস্তাৰে কোঙা কৰা সমাজ ব্যৱস্থা সত্ৰীয়া সংস্কৃতিৰে শুধৰোৱাৰ প্ৰচেষ্টা আৰু বিভিন্ন কলাৰ জৰিয়তে সকলোকে জাতীয় জীৱনৰ সৈতে চিনাকি কৰাই দিয়াৰ উদ্দেশ্যৰে ‘আলধৰা’ নিৰ্মাণ কৰা হৈছে । ভবিষ্যতেও ‘আলধৰা’ৰ দৰে অন্য বিষয়বস্তুৰে এনে ধৰণৰ চুটি ছবি নিৰ্মাণ কৰি যাব বুলি ভবেন হাজৰিকাই প্ৰকাশ কৰিছে।