মৰিগাঁৱত মঙলবাৰে পুৱাই সংঘটিত হয় এটা চাঞ্চল্যকৰ ঘটনা। মৌ-মাখিৰ আক্ৰমণত এজন লোকৰ মৃত্যু হৈছে । মৰিগাঁও শ্বহীদ ভৱনৰ সন্মুখত সংঘটিত হৈছে এই ঘটনা ৷ প্ৰাপ্ত তথ্য অনুসৰি বিগত কিছু দিনৰ পৰা সেই অঞ্চলটোত ত্ৰাসৰ সৃষ্টি কৰি আহিছে মৌ-মাখিৰ এটা জাকে । আজি পুৱাই মৌ-মাখিৰ জাকটোৱে আক্ৰমণ কৰে দীপক নন্দী নামৰ এজন লোকক। মৌ-মাখিৰ আক্ৰমণত গুৰুতৰভাৱে আঘাতপ্ৰাপ্ত হয় দীপক ৷
ততাতৈয়াকৈ লোকজনক মৰিগাঁও অসামৰিক চিকিৎসালয়ত ভৰ্তি কৰা হয় যদিও চিকিৎসকে তেওঁক মৃত ঘোষণা কৰে ৷ অঞ্চলটোত ‘মধু’ নামেৰে জনাজাত আছিল মৃত দীপক নন্দী।
বিগতে কিছু দিনে অঞ্চলটোত তাণ্ডৱ সৃষ্টি কৰি আছিল মৌ-মাখিৰ জাকটোৱে। মৌ মাখিৰ জাকটোৰ আক্ৰমনৰ বলি হৈছে বহুলোক ৷ মৰিগাঁও প্ৰশাসনে এইক্ষেত্ৰত কোনো ব্যৱস্থা গ্ৰহণ নকৰাৰ অভিযোগ উত্থাপন কৰিছে স্থানীয় লোকসকলে ৷
