হাৱাইত বনজুইৰ ফলত নিশাটোৰ ভিতৰতে মৃত্যু হোৱা লোকৰ সংখ্যা ৯৩লৈ বৃদ্ধি পাইছে ৷বনজুইৰ ফলত জ্বলি যোৱা মৃতদেহবোৰৰ অৱস্থা ইমানেই দুখজনক যে ডি এন এ পৰীক্ষা অবিহনে চিনাক্তকৰণৰ কোনো গত্যন্তৰ নাছিল ৷ যোৱা ১০০ বছৰত আমেৰিকাত সংঘটিত বনজুইৰ ভিতৰত এইবাৰেই মৃত্যু হোৱা লোকৰ সংখ্যা সৰ্বাধিক বুলি ধাৰণা কৰা হৈছে।
যোৱা মঙলবাৰে হাৱাইৰ মাউই কাউন্টিৰ লাহাইনাত বনজুই সংঘটিত হয়। চহৰৰ ওচৰৰ পাহাৰবোৰত প্ৰথমে জুই লাগে । ড’ৰা হাৰিকেনে ইন্ধন যোগোৱা জুই দ্ৰুতগতিত পাহাৰৰ পাদদেশৰ লাহাইনা আৰু কুলালৈ বিয়পি পৰে। ইমানবোৰ মানুহৰ মৃত্যুত প্ৰশাসনৰ ভূমিকাক লৈ প্ৰশ্ন উত্থাপন হৈছে।
লাহাইনাত ১২ হাজাৰ লোক বসবাস কৰে। সাগৰৰ পাৰৰ চহৰখন এতিয়াও জ্বলি আছে। চকুৱে যিমানদূৰ দেখা পায়, জ্বলি যোৱা ঘৰৰ ধ্বংসাৱশেষ, জ্বলি যোৱা গাড়ীৰ শাৰী আৰু মাজে মাজে জ্বলি যোৱা গছৰ ডালবোৰ ৰাস্তাৰ কাষত দ’ম বান্ধি আছে । স্থানীয় ৰাইজে প্ৰশাসনৰ বিৰুদ্ধে ক্ষোভ প্ৰকাশ কৰে। তেওঁলোকে দাবী কৰে যে যদি প্ৰশাসনে অলপ বেছি সক্ৰিয় হ’লহেঁতেন, সময়মতে সকলোকে সতৰ্কবাণী প্ৰেৰণ কৰিলেহেঁতেন, তেন্তে ইমানবোৰ মানুহৰ মৃত্যু নহ’লহেঁতেন। লাহাইনাৰ বাসিন্দা ভিলমা ৰিডে কয়, “মই কেতিয়া গম পালোঁ যে চহৰখনত অগ্নিকাণ্ড সংঘটিত হৈছে? যেতিয়া মোৰ ঘৰৰ বিপৰীতে ৰাস্তাত জুই লাগি থকা দেখিলোঁ। মৃত্যু সন্মুখত থিয় হৈ আছে।”
লাহাইনা প্ৰশাসনে অৱশ্যে জৰুৰী উদ্ধাৰ অভিযানত নামি পৰা বুলি জানিবলৈ দিয়ে। গৃহহীন লোকৰ বাবে মুকলি কৰা হৈছে সাহায্য শিবিৰ। প্ৰশাসনে অগ্নিকাণ্ড সংঘটিত হোৱা চহৰখনত প্ৰৱেশ নিষিদ্ধ কৰিছে। লগতে কুলা আৰু লাহাইনাৰ বাসিন্দাক পাইপযোগে যোগান ধৰা পানী নাখাবলৈ কোৱা হৈছে ৷ কাৰণ, বহুতো স্থানত পাইপ ফাটি যোৱাৰ বাবে পানীত ৰাসায়নিক সামগ্ৰী মিহলি হোৱাৰ আশংকা কৰা হৈছে ৷
১৯৪৬ চনত হাৱাইত হোৱা ছুনামীত ১৫০ জন লোকৰ মৃত্যু হয়। তাৰ পিছত অলপ সময়ৰ ভিতৰতে জৰুৰীকালীন সতৰ্কবাণী বিয়পাবলৈ চাইৰেন লগোৱা হ’ল। যিসকলে এই যাত্ৰাত প্ৰাণ ৰক্ষা কৰি পলায়ন কৰিবলৈ সক্ষম হৈছে তেওঁলোকে কয় যে তেওঁলোকে কোনো ছাইৰেন শুনা নাছিল। অভিযোগ অনুসৰি অবিশ্বাস্য বেগেৰে জুই বিয়পি পৰে। প্ৰস্তুতি চলাবলৈ সময় পোৱা নাছিল।
