ৰাছিয়া আৰু ইউক্ৰেইনৰ মাজত চলি থকা যুদ্ধৰ মাজতে ইউক্ৰেইনত আৱদ্ধ হৈ থকা ভাৰতীয়সকলক উদ্ধাৰৰ প্ৰচেষ্টা অব্যাহত ৰাখিছে ভাৰত চৰকাৰে ৷ ইতিমধ্যে প্ৰধানমন্ত্ৰী নৰেন্দ্ৰ মোদীয়ে ইউক্ৰেইন আৰু ৰাছিয়াৰ ৰাষ্ট্ৰপতিৰ সৈতে মত বিনিময় কৰি ইউক্ৰেইনত আৱদ্ধ হৈ থকা শিক্ষার্থীসকলক উদ্ধাৰৰ ক্ষেত্ৰত দুয়োখন দেশৰ সহযোগিতা কামনা কৰিছিল ৷ ইয়াৰ পাছতে চাৰিখন চহৰত যুদ্ধ বিৰতি ঘোষণা কৰাৰ লগতে মানৱ ক’ৰিডৰ গঢ়ি তোলা হ’ব বুলি ৰাছিয়াই প্ৰকাশ কৰিছিল ৷ কিন্তু ৰাছিয়াৰ চর্ত ইউক্ৰেইনে মানি নোলোৱাৰ বাবে আৱদ্ধ ভাৰতীয় লোকসকলক উদ্ধাৰৰ ক্ষেত্ৰত ব্যর্থ হয় ৷ আজি এই কথা ৰাষ্ট্ৰসংঘৰ নিৰাপত্তা পৰিষদৰ এখন জৰুৰী বৈঠকতো উল্লেখ কৰিছে ভাৰতে ৷
ইউক্ৰেইন-ৰাছিয়া যুদ্ধক লৈ আহ্বান জনোৱা এই জৰুৰী বৈঠকত ভাষণ দি ৰাষ্ট্ৰসংঘত ভাৰতৰ ৰাষ্ট্ৰদূত টি এছ তিৰুমূৰ্তিয়ে কয়- “আমি গভীৰভাৱে চিন্তিত যে দুয়োপক্ষৰ প্ৰতি আমাৰ বাৰম্বাৰ অনুৰোধ স্বত্বেও চুমিত আৱদ্ধ হৈ থকা আমাৰ শিক্ষাৰ্থীসকলৰ বাবে এক সুৰক্ষিত কৰিডৰ সৃ্ষ্টি কৰাটো সম্ভৱপৰ হোৱা নাই।”এই প্ৰসংগত তিৰুমূৰ্তিয়ে কয় যে ৰাছিয়া আৰু ইউক্ৰেইন দুয়োখন দেশকে সৈমান কৰাৰ সৰ্বশ্ৰেষ্ঠ প্ৰচেষ্টা স্বত্বেও চুমিত আৱদ্ধ ভাৰতীয় শিক্ষাৰ্থীসকলৰ বাবে এক সুৰক্ষিত কৰিডৰ সৃষ্টি কৰিব পৰা নগ’ল।ৰাছিয়াৰ ইউক্ৰেইন আক্ৰমণৰ ফলত উদ্ভৱ হোৱা মানৱীয় সংকট সন্দৰ্ভত ৰাষ্ট্ৰসংঘৰ নিৰাপত্তা পৰিষদৰ এক জৰুৰী বৈঠকত ভাষণ দি তিৰুমূৰ্তিয়ে কয় যে ভাৰতে ইউক্ৰেইনৰ পৰা সকলো নিৰীহ নাগৰিকক সুৰক্ষিত ভাৱে স্থানান্তৰৰ পোষকতা কৰি আহিছে ৷
তেওঁ কয় “আমি ইউক্ৰেইনৰ পৰা ২০,০০০ তকৈও অধিক ভাৰতীয়ক সুৰক্ষিতভাৱে ঘূৰাই অনাত সহায় কৰিবলৈ সক্ষম হৈছো ৷ ভাৰতে আন দেশৰ নাগৰিকসকলক যুদ্ধবিধ্বস্ত ৰাষ্ট্ৰৰ পৰা স্থানান্তৰ কৰাত সহায় কৰিছে। ভাৰতে ইউক্ৰেইন আৰু ইয়াৰ চুবুৰীয়া দেশসমূহলৈ মানৱীয় সামগ্ৰী প্ৰেৰণ কৰিছে। ইয়াৰ ভিতৰত আছে ঔষধ, তম্বু পানী টেংক, অন্যান্য সাহায্য সামগ্ৰী। আমি অন্যান্য প্ৰয়োজনীয়তা অনুসৰি আন আন সাহায্য সামগ্ৰী প্ৰেৰণ কৰাৰ চিন্তা-চর্চা কৰি আছো ৷”তিৰুমূৰ্তিয়ে লগতে কয় যে ভাৰতে যুদ্ধৰ তাৎক্ষণিক সমাপ্তিৰ বাবে আহ্বান জনাই আহিছে।
