দিশপুৰৰ মানবেন্দ্ৰ শৰ্মা কমপ্লেক্সৰ সমীপত আজি দিশপুৰ আৰক্ষীয়ে গ্ৰেপ্তাৰ কৰে এটা নকল সোণ সৰবৰাহকাৰীক ৷ নকল সোণ সৰবৰাহকাৰী চক্ৰৰ বিৰুদ্ধে চলোৱা এক অভিযানত দিশপুৰ আৰক্ষীৰ এটা দলে নকল সোণৰ বিস্কুটসহ গ্ৰেপ্তাৰ কৰিবলৈ সক্ষম হয় ফৰিদুল ইছলাম নামৰ প্ৰবঞ্চকটোক ৷ আজি কিছুদিনৰ পৰা সাধাৰণ ৰাইজৰ চকুত ধুলিমাৰি ফৰিদুলে নকল সোণৰ বিস্কুট বিক্ৰী কৰি আহিছিল ৷
আনহাতে নকল সোণ সৰবৰাহকাৰী চক্ৰৰ সৈতে জড়িত আন এক প্ৰবঞ্চকৰ নাম ইতিমধ্যেই পোহৰলৈ আহিছে ৷ পলাতক অৱস্থাত থকা প্ৰবঞ্চকটোৰ নাম বাদশ্বাহ বুলি জানিব পৰা গৈছে ৷
২০২১বৰ্ষৰ ডিচেম্বৰ মাহত নগাঁও আৰক্ষীয়ে নগাওঁ জিলাৰ সোণসৰবৰাহকাৰী চক্ৰৰ চাৰিজনীয়া এটা দলক গ্ৰেপ্তাৰ কৰিবলৈ সক্ষম হৈছিল ৷ সমগ্ৰ ৰাজ্যতে বিয়পি থকা নকল সোণ সৰবৰাহকাৰী চক্ৰৰ বিৰুদ্ধে অসম আৰক্ষীয়ে এতি্যাও অব্যাহত ৰাখিছে অভিযান ৷ অসম আৰক্ষীৰ তৎপৰতাত সাধাৰণ ৰাইজক ভূৱা সাজি নকল সোণ বিক্ৰী কৰা দুষ্ট চক্ৰৰে জড়িত বহু প্ৰবঞ্চকক ইতিমধ্যেই গ্ৰেপ্তাৰ কৰা হৈছে ৷
