দুদিনীয়া ভ্ৰমণসূচীৰে পশ্চিমবংগলৈ অহা কেন্দ্ৰীয় গৃহমন্ত্ৰী অমিত শ্বাহে প্ৰাক্তন ক্ৰিকেটাৰ তথা বি চি চি আইৰ অধ্যক্ষ সৌৰভ গাংগুলীৰ বাসগৃহত নৈশ ভোজ গ্ৰহণ কৰে ৷ যোৱা নিশা কটকটীয়া নিৰাপত্তা বেষ্টনীৰ মাজেৰে কলকাতাস্থিত গাংগুলীৰ বাসগৃহত উপস্থিত হয় শ্বাহ ৷ অৱশ্যে এয়া কোনো ৰাজনৈতিক সাক্ষাৎ নহয় বুলি সদৰী কৰিছে ৷ বি চি চি আইত অমিত শ্বাহৰ পুত্ৰ জয় শ্বাহ সতীর্থ হোৱাৰ বাবেই গাংগুলীয়ে এই সৌজন্যমূলক নৈশ ভোজ আয়োজন কৰে বুলি জানিব পৰা গৈছে ৷ অমিত শ্বাহৰ পুত্ৰ জয় শ্বাহ বি চি চি আইৰ সচিব ৷
গৃহমন্ত্ৰী গৰাকীয়ে কটকটীয়া নিৰাপত্তা বেষ্টনীৰ মাজেৰে এখন বগা এছইউভিত গাংগুলীৰ ঘৰত উপস্থিত হয় ৷ শ্বাহৰ আগমনৰ খবৰ লাভ কৰাৰ পাছতে গাংগুলীৰ বাসগৃহৰ সমীপত বহু লোকৰ সমাগম হয় ৷ কেন্দ্ৰীয় গৃহ মন্ত্ৰী গৰাকীয়ে গাড়ীৰ ভিতৰৰ পৰাই নমস্কাৰ জনাই সকলোকে সম্ভাষণ জ্ঞাপন কৰে ৷ ডাইনিং টেবুলত গাংগুলী আৰু তেওঁৰ পৰিয়ালৰ সদস্যসকলৰ সৈতে একেলগে শ্বাহক নৈশ আহাৰ গ্ৰহণ কৰা পৰিলক্ষিত হৈছিল ৷
৪৯ বছৰীয়া গাংগুলীয়ে এই সন্দর্ভত সাংবাদিকসকলক কয় যে নৈশ ভোজৰ সৈতে কোনোধৰণৰ ৰাজনৈতিক সম্পর্ক নাই ৷ তেওঁ অমিত শ্বাহৰ সৈতে এক দশকৰো আগৰে পৰাই ঘনিষ্ঠ সম্পর্ক আছে বুলিও কয় ৷
