বৰ্তমানো অব্যাহত আছে অসম আৰক্ষীৰ ড্ৰাগছ বিৰোধী অভিযান ৷ গোপন খবৰৰ ভিত্তিত কালি নিশা গড়চুক আৰক্ষীয়ে অভিযান চলাই আটক কৰিবলৈ সক্ষম হয় দুই ড্ৰাগছ সৰবৰাহকাৰী ভাতৃক ৷ গুৱাহাটীৰ সাউকুছিৰ পৰা খেদি খেদি দুই ড্ৰাগছ সৰবৰাহকাৰীক অৱশেষত ফটাশিলত কৰায়ত্ত কৰিবলৈ সক্ষম হয় গড়চুক আৰক্ষী ৷
বিহাৰৰ পৰা আহি অসমৰ ফটাশিলত বাহৰ পতা দুই ভাতৃয়ে ফটাশিলৰ পৰাই চলাইছিল ড্ৰাগছৰ ৰমৰমীয়া বেহা ৷ জানিব পৰা মতে বিহাৰৰ পৰা অহা দুই ভাতৃৰ নাম প্ৰকাশ বাৰ্মা আৰু দিলীপ বাৰ্মা ৷ আৰক্ষীয়ে দুয়োৰে পৰা জব্দ কৰে ২পেকেট ড্ৰাগছ , ৩টা কণ্টেইনাৰ ,নগদ ধন আৰু মোবাইল ফোন ৷ জব্দ কৰা ড্ৰাগছখিনিৰ বজাৰ মূল্য ২লক্ষাধিক বুলি জানিবলৈ দিছে আৰক্ষীয়ে ৷ জানিব পৰা মতে ডিমাপুৰৰ পৰা দুই ভাতৃয়ে সৰবৰাহ কৰে ড্ৰাগছ ৷ আনহাতে দুই সৰবৰাহকাৰীয়ে আৰক্ষীৰ তদন্তত এই কথাও স্বীকাৰ কৰে যে তেওঁলোকৰ সৈতে জাকিৰ নামৰ আন এজনো জড়িত আছে এই ড্ৰাগছৰ ব্যৱসায়ত ৷ ইতিমধ্যে জাকিৰক বিচাৰি অভিযান আৰম্ভ কৰিছে গড়চুক আৰক্ষীয়ে ৷
