কামাখ্যাধামত সংঘটিত হ’ল ৬গৰাকী মহিলাৰ চেইন চুৰিৰ ঘটনা ৷অম্বুবাচীৰ মেলাৰ আনন্দ উল্লাসৰ মাজতে কামাখ্যাধামত সৃষ্টি হৈছে এইবাৰ হাঁহাকাৰ পৰিস্থিতিৰ। কম সময়ৰ ভিতৰতে এগৰাকীৰ পিছত আন এগৰাকীৰ মহিলাৰ ডিঙিৰ সোণৰ চেইন নোহোৱা হোৱা ঘটনাই তীব্ৰ চাঞ্চল্যৰ সৃষ্টি কৰিছে কামাখ্যাত। আধা ঘণ্টাৰ ভিতৰতে সংঘটিত হৈছে ৬গৰাকী মহিলাৰ চেইন চুৰিৰ ঘটনা । লগতে চুৰি হৈছে মানীবেগ আৰু টকাও।
তথ্য অনুসৰি মেলাত থকা মহিলাৰ দল এটাই এই চুৰিকাণ্ড সংঘটিত কৰি থকাৰ সন্দেহ কৰা হৈছে। এই আটাইকেইগৰাকী মহিলাই বহিঃৰাজ্যৰ পৰা অহাৰ বুলি সন্দেহ কৰিছে আৰক্ষীয়ে । জানিব পৰা মতে চোৰৰ দলটোৱে ছেগ বুজি এখন সৰু কাটাৰেৰে মেলা চাবলৈ খোজ কাঢ়ি গৈ থকা মহিলাৰ ডিঙিৰ পৰা কাটি নিছে চেইন ৷ অম্বুবাচী মেলাত দৈনিক চুৰিকাণ্ড সংঘটিত হোৱাৰ অভিযোগো ইতিমধ্যে উত্থাপিত হৈছিল। কিন্তু আৰক্ষীয়ে তৎপৰতাৰে এই দিশত অনুসন্ধান চলাই আজি ধৰা পেলাই ৫গৰাকীকৈ মহিলাক। আটাইকেইগৰাকী দাক্ষিণাত্যৰ বুলি জানিব পৰা গৈছে।
আনহাতে ভিক্ষাৰীৰ বেশত বহি থকা এজন পুৰুষৰ পৰাও উদ্ধাৰ কৰা হৈছে কাটাৰ। এতিয়ালৈ ৫গৰাকী মহিলাকে ধৰি এজন বাবাৰ বেশত থকা পুৰুষক চিনাক্ত কৰি আটক কৰিছে নিৰাপত্তাৰক্ষীয়ে।
