ডিজিটেল তথ্য সুৰক্ষা বিধেয়ক লোকসভাৰ পৰৱৰ্তী বাজেট অধিৱেশনত উত্থাপন হ’ব পাৰে। এই বিধেয়কখনৰ ওপৰত কেন্দ্ৰই দীৰ্ঘদিন ধৰি কাম কৰি আহিছে।এই বিধেয়কখনৰ খচৰা শেহতীয়াকৈ প্ৰকাশ পাইছে। খচৰা বিধেয়কখনৰ ওপৰত ৰাজহুৱা মতামত বিচৰা হৈছে ৷ প্ৰকাশ পোৱা অনুসৰি ২০২৩-২৪ চনৰ বাজেট অধিৱেশনত এই বিধেয়কখন লোকসভাত উত্থাপন হ’ব পাৰে। ডিজিটেল তথ্য সুৰক্ষা আইনখন গৃহীত হ’লে নেটিজেনৰ অধিকাৰ আৰু কৰ্তব্যসমূহ নিৰ্দিষ্ট কৰা হ’ব।
আনহাতে, এই বিধেয়কখনে নেটিজেনসকলক তথ্য সুৰক্ষা সম্পৰ্কীয় বিভিন্ন আইনৰ সৈতেও পৰিচিত কৰিব। সূত্ৰ অনুসৰি এই বিধেয়কখনে বিভিন্ন ব্যক্তিগত সংস্থাৰ ব্যক্তিগত তথ্য সংগ্ৰহ আৰু ব্যৱহাৰ নিয়ন্ত্ৰণ কৰিব। ব্যক্তিগত তথ্য সুৰক্ষিত কৰাৰ লগতে তথ্যৰ অপব্যৱহাৰ ৰোধৰ বাবে চৰকাৰে পদক্ষেপ গ্ৰহণ কৰিছে বুলি কেন্দ্ৰই জানিবলৈ দিয়ে। আৰু সেইবাবেই এই বিধেয়খন অনাৰ সিদ্ধান্ত গ্ৰহণ কৰিছে চৰকাৰে ৷ এই বিধেয়কৰ জৰিয়তে তথ্য সুৰক্ষাৰ বিষয়ে জনসাধাৰণক সজাগ কৰি তুলিবলৈ প্ৰচেষ্টা চলোৱা হ’ব।
সূত্ৰ অনুসৰি এই বিধেয়কখনে ব্যক্তিগত তথ্য সঠিক আৰু আইনীভাৱে সংগ্ৰহ কৰাটো নিশ্চিত কৰিব আৰু সেই তথ্য সংগ্ৰহ কৰাসকলে আনৰ সৈতে ইয়াৰ ভাগ বাটোৱাৰা কৰিব নোৱাৰিব ৷
ইয়াৰ উপৰিও এই বিধেয়কখনে কোনো ব্যক্তিৰ ব্যক্তিগত তথ্য সঠিক আৰু সময়ে সময়ে আপডেট হোৱাটো নিশ্চিত কৰাৰ যুক্তিসংগত উপায় আগবঢ়াব পাৰে।কোনো ব্যক্তিয়ে ক’ৰবাত তথ্য দিয়াৰ পিছতো প্ৰয়োজন অনুসৰি তথ্য মচি পেলোৱাৰ অধিকাৰো বিধেয়কখনে লাভ কৰিব। ব্যৱসায় (বিশেষকৈ ষ্টাৰ্টআপ)ত ব্যক্তিগত অধিকাৰ, জনস্বাৰ্থ আৰু স্বচ্ছতা অনাৰ বাবে এই বিধেয়কখন প্ৰয়োজনীয় বুলি কোৱা হৈছে।
দীৰ্ঘদিন ধৰি যুটীয়া সংসদীয় সমিতিয়ে এই খচৰা বিধেয়কখন পুনৰীক্ষণ কৰিছিল। ইয়াৰ পিছতে কেন্দ্ৰীয় চৰকাৰে ২০২২ চনৰ ৩ আগষ্টত সংসদৰ বিকল্প অধিৱেশনত তথ্য সুৰক্ষা বিধেয়ক উত্থাপন কৰি প্ৰত্যাহাৰ কৰে। কেন্দ্ৰীয় টেলিকম আৰু তথ্য প্ৰযুক্তি মন্ত্ৰী অশ্বিনী বৈষ্ণবে কয় যে মূল খচৰা পুনৰীক্ষণ কৰাৰ সময়ত যুটীয়া সংসদীয় সমিতিয়ে ৯১ ধাৰাযুক্ত বিধেয়কখনৰ ৮৮টা সংশোধনীৰ পৰামৰ্শ আগবঢ়ায়।ইয়াৰ পিছত চৰকাৰে সাময়িকভাৱে মূল বিধেয়কখন প্ৰত্যাহাৰ কৰি নতুন বিধেয়ক উত্থাপন কৰাৰ সিদ্ধান্ত লয়। নৱেম্বৰ মাহত চৰকাৰে ডিজিটেল তথ্য সুৰক্ষা বিধেয়কৰ আন এখন খচৰা উলিয়াই জনসাধাৰণৰ পৰামৰ্শৰ বাবে উত্থাপন কৰে। বৰ্তমান ভাৰতত ৭৬ কোটিৰো অধিক লোকে ইণ্টাৰনেট সেৱা ব্যৱহাৰ কৰে। কিন্তু কেইবছৰমানৰ ভিতৰতে এই সংখ্যা ১২০ কোটি হ’ব বুলি আশা কৰা হৈছে।
