এজাক বৰষুণতে পুনৰ উটি গ’ল গুৱাহাটী মহানগৰীৰৰ আভিজাত্য ৷ গুৱাহাটীত বিজেপি চৰকাৰৰ উন্নয়নৰ গংগা নহয় কৃত্ৰিম বানৰ বিভিষীকাময় পৰিস্থিতি পৰিলক্ষিত হয় ৷ কালি বিয়লি প্ৰায় দুঘণ্টাজোৰা বৰষুণৰ পাছত সৃষ্টি হোৱা অবর্ণনীয় পৰিস্থিতিৰ আজিও শাম কটা নাই ৷ আনকি বান পৰিস্থিতিৰ বাবে আজি বন্ধ ৰাখিবলগীয়া হ’ল সকলো শিক্ষানুষ্ঠান ৷ অনিল নগৰ , নবীন নগৰ, হাতীগাঁও, ৰুক্মিণীগাঁওকে ধৰি গুৱাহাটীৰ বিস্তীর্ণ অঞ্চল আজিও জলমগ্ন হৈ আছে ৷
সোমবাৰে বিয়লি ৩ বজাত অহা বৰষুণৰ পিছতে পুৱতি নিশালৈ ৩ বজা পৰ্যন্ত যান-জঁট সৃষ্টি হয়। নিশা গুৱাহাটীৰ ৰাজপথত সৃষ্টি হ’ল সৰ্ববৃহৎ যান-জঁট। কেৱল নিশাই নহয়, গুৱাহাটীৰ ৰাজপথত পুৱা পর্যন্ত দেখা গ’ল তীব্ৰ যান-জঁট।
নিমিষতে মহাসাগৰত পৰিণত হ’ল গুৱাহাটী মহানগৰ। ৰাজপথে ৰাজপথে সৃষ্টি হ’ল অভাৱনীয় পৰিস্থিতি। স্তব্ধ হৈ পৰিল গুৱাহাটী মহানগৰীৰ স্বাভাৱিক জনজীৱন। কৃত্ৰিম বানৰ বাবে স্তব্ধ হৈ পৰিল পথ মহানগৰবাসীৰ যোগাযোগ। কৃত্ৰিম বানত দীৰ্ঘসময় আৱদ্ধ হৈ পৰিল স্কুলবাছকে ধৰি অসংখ্য যান-বাহন। কৃত্ৰিম বানৰ বাবে বিলাই বিপত্তি নোহোৱা হৈছে মহানগৰবাসীৰ। কৃত্ৰিম বানেৰে একাকাৰ হৈ পৰে ৰাজপথ, নলা-নৰ্দমা আৰু ঘৰ-বাৰী।
নিশাও ৰাজপথত আবদ্ধ হৈ পৰিল এম্বুলেঞ্চ।ঘণ্টাৰ পিছত ঘণ্টা পৰ্যন্ত ৰাজপথতে আবদ্ধ হৈ থাকিল হাজাৰ হাজাৰ যান-বাহনৰ লগতে লোক।
ইফালে এজাক বৰষুণে উদঙালে গুৱাহাটীৰ বিকাশ । এজাক বৰষুণে উদঙালে গুৱাহাটী মহানগৰীক কৃত্ৰিম বান ৰোধ কৰাৰ মন্ত্ৰী অশোক সিংহলৰ দম্ভ।
নিশা যান-জঁট নিয়ন্ত্ৰণ কৰাত সম্পূৰ্ণ ব্যৰ্থ যানবাহন আৰক্ষী। বৰষুণৰ পিছতে হোৱা যান-জঁট নিয়ন্ত্ৰণৰ বাবে গুৱাহাটী আৰক্ষীৰ হাতত নাছিল কোনো সুপৰিকল্পিত ব্যৱস্থা। যাৰ ফলত নিশা বাহনৰ ভিতৰতে আবদ্ধ হৈ থাকিল বহু লোক। নিশা যানজঁটত আবদ্ধ হৈ থাকিল কেইবাখনো এম্বুলেঞ্চকে ধৰি স্কুল বাছ। ইফালে আজিও কৰ্মস্থলীলৈ ওলাই আহি জনতাৰ হাহাকাৰ অৱস্থাৰ সৃষ্টি হৈছে। উপায়বিহীন হৈ বানত ভিতগ্ৰস্ত গুৱাহাটীবাসীয়ে চৰকাৰৰ বিৰুদ্ধে উজাৰিছে ক্ষোভ।
