গুৱাহাটীৰ ৰেভ পাৰ্টীত অভিযুক্ত ৭ জনক জামিন প্ৰদানঃ ৫ জনৰ জামিন আবেদন নাকচ উচ্চ ন্যায়ালয়ৰ

গুৱাহাটীত জন্মদিনৰ নামত কোকেইন পাৰ্টী কৰি আৰক্ষীৰ ৰোষত পৰা অভিযুক্তসকলৰ ৭ জনৰ জামিন মঞ্জুৰ কৰিছে উচ্চ ন্যায়ালয়ে। আনহাতে ৫ জনৰ জামিন আবেদন ন্যায়ালয়ে নাকচ কৰিছে বুলি জানিব পৰা গৈছে।

উল্লেখ্য যে যোৱা ১৪ আগষ্টত গুৱাহাটীৰ এটা ফ্লেটত জন্মদিনৰ নামত ড্ৰাগছৰ উৎসৱ পতা কেইজনমান ব্যক্তিক লতাশিল থানাৰ আৰক্ষীয়ে গ্ৰেপ্তাৰ কৰিছিল। ইতিমধ্যে বিভিন্ন কাকতে-পত্ৰই এই সম্পৰ্কীয় বিতং বাতৰি প্ৰকাশ পাইছে।

খাৰঘূলিৰ ৰিভেৰিয়া নামৰ এপাৰ্টমেণ্টটোত গৃহ নিৰ্মানকাৰী ব্যৱসায়ী অমিত বৰুৱাৰ জন্মদিন পালন কৰিবলৈ লগ হোৱা একাংশ ব্যক্তিয়ে কোটিটকীয়া ড্ৰাগছ তথা অন্যান্য নিচাযুক্ত দ্ৰব্যৰ আমদানি ঘটাই মাজনিশালৈ নৃত্য-গীতত মচগুল হৈ থকাৰ সময়তে আৰক্ষীয়ে তেওঁলোকক গ্ৰেপ্তাৰ কৰিছিল।

অমিত বৰুৱাৰ ড্ৰাগছৰ পাৰ্টীত আৱিস্কাৰ হোৱা ১৮ গৰাকী পুৰুষ-মহিলাৰ বয়স তথা সামাজিক স্থিতিৰ ছবিয়ে ৰাইজৰ চকু কপালত তুলিছিল। উল্লেখযোগ্য যে নিষিদ্ধ ড্ৰাগছৰ বেহাৰে আনন্দ-তামাছাত মগ্ন এইসকল ব্যক্তিয়ে বিভিন্ন সামাজিক স্থানত অন্যায়ৰ বিৰুদ্ধে গৈ মাত মতাৰ দৰে আৰক্ষীৰ অভিযানৰো প্ৰতিবাদ কৰিছিল।

লতাশিল থানাৰ আলহী হোৱা এইসকল ব্যক্তি আছিল, বিকাশ জৈন, নাছিফ আহমেদ, সুমিত কুমাৰ বেৰিয়া, চয়ন শইকীয়া, অমিত পেগু, অমিত বৰুৱা, অশোক বৰ্মন, হীৰেন্দ্ৰ সিনহা, ৰিদীপ বৰুৱা, সিদ্ধাৰ্থ বৰঠাকুৰ, নাছিফ আহমেদৰ পত্নী নৱমল্লিকা চৌধুৰী, ৰাকেশ বৰগোঁহাই, দেৱযানী হাজৰিকা, অমিত বৰুৱাৰ পত্নী জুবি বৰুৱা, ৰাকেশ বৰগোঁহাইৰ পত্নী নয়নিকা বৰুৱা, সুমিত কুমাৰ বেৰিয়াৰ পত্নী দেৱৰ্ষি বৰুৱা, ৰিদীপ বৰাৰ পত্নী নিমিষা ভূঞা, আৰু পংকজ কাকতি।

প্ৰাপ্ত তথ্য অনুসৰি ১২ জন অভিযুক্তই জামিন বিচাৰি আবেদন কৰিছিল। আনহাতে ড্ৰাগছ পাৰ্টীৰ আঁৰৰ প্ৰধান ব্যক্তি বিশাল চৌধুৰীক ইতিমধ্যে আৰক্ষীয়ে গ্ৰেপ্তাৰ কৰিবলৈ সক্ষম হৈছে। জানিব পৰা মতে তেওঁ বিগত দুবছৰ ধৰি ড্ৰাগছৰ ব্যৱসায়ৰ লগত জড়িত হৈ আছিল। গোচৰটোৰ মুখ্য অভিযুক্ত চৌধুৰীক আৰক্ষীয়ে ২৮ আগষ্টত দিল্লীত গ্ৰেপ্তাৰ কৰিছিল।

জামিন লাভ কৰা ব্যক্তিসকলৰ নাম এই পৰ্যন্ত ভয়ছৰ প্ৰতিবেদকৰ হাতত পৰাহি নাই।