বিশ্বৰ আটাইতকৈ জনবহুল দেশত পৰিণত হ’ব ভাৰত ৷ চীনক অতিক্ৰম কৰি ভাৰত হৈ পৰিব বিশ্বৰ আটাইতকৈ জনবহুল দেশ ৷ এই কথা প্ৰকাশ পাইছে ৰাষ্ট্ৰসংঘৰ প্ৰতিবেদনত ৷ সোমবাৰে ৰাষ্ট্ৰসংঘই প্ৰকাশ কৰা এক প্ৰতিবেদন অনুসৰি ২০২২ চনৰ নৱেম্বৰৰ মাজভাগলৈকে বিশ্বৰ জনসংখ্যা আঠ বিলিয়ন হ’ব বুলি পূৰ্বানুমান কৰা হৈছে ৷ তদুপৰি অহা বছৰ ভাৰতে জনসংখ্যাৰ হিচাপত চীনক অতিক্ৰম কৰাৰ সম্ভাৱনা আছে ৷
ৰাষ্ট্ৰসংঘৰ অৰ্থনৈতিক আৰু সামাজিক পৰিক্ৰমা বিভাগৰ জনসংখ্যা বিভাগৰ বিশ্ব জনসংখ্যা সম্ভাৱনা ২০২২ত কোৱা হৈছে যে ২০২২ চনৰ ১৫ নৱেম্বৰত বিশ্বৰ জনসংখ্যা আঠ বিলিয়ন হ’ব ৷ ১৯৫০ চনৰ পিছত বিশ্বৰ জনসংখ্যা আটাইতকৈ লেহেমীয়া হাৰত বৃদ্ধি পাইছে ৷ ২০২০ চনত এই হাৰ এক শতাংশৰ তললৈ নামি আহিছে। ৰাষ্ট্ৰসংঘৰ শেহতীয়া প্ৰক্ষেপণ অনুসৰি ২০৩০ চনত বিশ্বৰ জনসংখ্যা প্ৰায় ৮.৫ বিলিয়ন আৰু ২০৫০ চনত ৯.৭ বিলিয়নলৈ বৃদ্ধি পাব পাৰে। ২০৮০ চনৰ ভিতৰত ই প্ৰায় ১০.৪ বিলিয়ন লোকৰ শীৰ্ষত উপনীত হ’ব আৰু ২১০০ চনলৈকে সেই স্তৰতে থাকিব বুলি সম্ভাৱনা প্ৰকাশ কৰিছে ৷
প্ৰতিবেদনত কোৱা হৈছে যে “২০২৩ চনৰ ভিতৰত ভাৰতে চীনক অতিক্ৰম কৰি বিশ্বৰ সৰ্বাধিক জনবহুল দেশ হিচাপে বিবেচিত হ’ব ৷” ২০২২ চনত বিশ্বৰ দুটা আটাইতকৈ জনবহুল অঞ্চল আছিল পূব আৰু দক্ষিণ-পূব এছিয়া, য’ত ২.৩ বিলিয়ন লোকে বাস কৰিছিল ৷ এই জনসংখ্যা বিশ্বৰ ২৯ শতাংশ ৷মধ্য আৰু দক্ষিণ এছিয়াত ২.১ বিলিয়ন লোকে বাস কৰে ৷ এয়া বিশ্বৰ মুঠ জনসংখ্যাৰ ২৬ শতাংশ ৷ এই অঞ্চলসমূহত চীন আৰু ভাৰতৰ জনসংখ্যা আছিল সৰ্বাধিক ৷ ২০২২ চনত দেশ দুখনৰ জনসংখ্যা ১৪০ কোটিতকৈও অধিক আছিল। ২০৫০ চনলৈকে বিশ্বৰ জনসংখ্যা বৃদ্ধিৰ আধাতকৈ অধিক পৰিমাণ কংগো গণতান্ত্ৰিক ৰিপাব্লিক, ইজিপ্ত, ইথিওপিয়া, ভাৰত, নাইজেৰিয়া, পাকিস্তান, ফিলিপাইনছ আৰু তাঞ্জানিয়াৰ মাত্ৰ আঠখন দেশত কেন্দ্ৰীভূত হ’ব।
প্ৰতিবেদনত কোৱা হৈছে যে বিশ্বৰ বৃহত্তম দেশসমূহৰ মাজত জনসংখ্যা বৃদ্ধিৰ পৃথক হাৰে আকাৰ অনুসৰি তেওঁলোকৰ ৰেংকিং সলনি কৰিব ৷ উদাহৰণস্বৰূপে ২০২৩ চনত ভাৰতে চীনক বিশ্বৰ সৰ্বাধিক জনবহুল দেশ হিচাপে অতিক্ৰম কৰাৰ সম্ভাৱনা আছে ৷ প্ৰতিবেদন অনুসৰি ২০২২ চনত ভাৰতৰ জনসংখ্যা ১.৪১২ বিলিয়ন হোৱাৰ বিপৰীতে চীনৰ জনসংখ্যা হ’ব ১.৪২৬ বিলিয়ন । ২০২৩ চনৰ ভিতৰত বিশ্বৰ সৰ্বাধিক জনবহুল দেশ হিচাপে চীনক অতিক্ৰম কৰা ভাৰতৰ জনসংখ্যা ২০৫০ চনত ১.৬৬৮ বিলিয়ন হ’ব বুলি অনুমান কৰা হৈছে ৷ ইয়াৰ বিপৰীতে শতিকাৰ মাজভাগলৈকে চীনৰ জনসংখ্যা হ’ব ১.৩১৭ বিলিয়ন ৷
