ইৰাণে প্ৰয়াত ইব্ৰাহিম ৰাইছিৰ উত্তৰাধিকাৰী হিচাপে নির্বাচিত কৰিছে সংস্কাৰবাদী নেতা মাছুদ পেজেছকিয়ানক। ৰাষ্ট্ৰপতি নিৰ্বাচনত তেওঁ প্ৰতিদ্বন্দ্বী ছাইদ জলিলিক পৰাস্ত কৰে। ইৰাণৰ চৰকাৰী সংবাদ সংস্থাই শনিবাৰে প্ৰকাশ কৰা অনুসৰি পেজেছকিয়ানে ১৭ লাখ ভোট আৰু জালিলিয়ে ১৩ লাখ ভোট লাভ কৰে।
ইৰাণৰ সংবিধান অনুসৰি ৰাষ্ট্ৰপতি ৰাইছিৰ মৃত্যুৰ পিছত উপ-ৰাষ্ট্ৰপতি মহম্মদ মখবৰে অন্তৱৰ্তীকালীন ৰাষ্ট্ৰপতিৰ ভূমিকা গ্ৰহণ কৰে। কিন্তু তেওঁ ৰাষ্ট্ৰপতি পদৰ বাবে প্ৰতিদ্বন্দ্বিতা কৰা নাছিল। এই নিৰ্বাচনত মুঠ চাৰিজন প্ৰাৰ্থীয়ে প্ৰতিদ্বন্দ্বিতা কৰিছে। সাংসদ পেজেছকিয়ান আৰু ৰাষ্ট্ৰীয় নিৰাপত্তা পৰিষদৰ সদস্য জালিলিৰ সৈতে সংসদৰ অধ্যক্ষ মহম্মদ বাঘেৰ গালিবাফ আৰু ৰাষ্ট্ৰীয় নিৰাপত্তা পৰিষদৰ আন এজন সদস্য মুস্তাফা পৌৰমাহমদীয়ে ৰাষ্ট্ৰপতিয়ে প্ৰতিদ্বন্দ্বিতা কৰিছিল।
উল্লেখ্য যে ২৮ জুনত অনুষ্ঠিত হোৱা প্ৰথম ৰাউণ্ডৰ নিৰ্বাচনত কোনো প্ৰাৰ্থীয়ে ৫০ শতাংশতকৈ অধিক ভোট লাভ নকৰাত ইৰাণৰ সংবিধান অনুসৰি শুকুৰবাৰে দ্বিতীয় ৰাউণ্ডৰ ভোটগ্ৰহণ অনুষ্ঠিত হয়। প্ৰথম ৰাউণ্ডৰ ভোটগ্ৰহণত প্ৰথম আৰু দ্বিতীয় স্থান দখল কৰা পেজেছকিয়ান আৰু জালিলিয়ে এই ৰাউণ্ডত প্ৰতিদ্বন্দ্বিতা কৰে। পেছাত হৃদৰোগ বিশেষজ্ঞ পেজেছকিয়ানে প্ৰথম ৰাউণ্ডত ৪২ শতাংশ ভোট লাভ কৰি আগবাঢ়ি আছিল। আৰু ৩৯ শতাংশ ভোট লাভ কৰি দ্বিতীয় স্থানত আছিল জলিলি।
ইৰাণৰ ৬ কোটি ১০ লাখ ভোটাৰৰ ভিতৰত মাত্ৰ ৪০ শতাংশ ভোটাৰেহে প্ৰথম ৰাউণ্ডৰ নিৰ্বাচনত ভোটদান কৰিছিল। ১৯৭৯ চনৰ পিছত ইৰাণৰ যিকোনো ৰাষ্ট্ৰপতি নিৰ্বাচনত ভোটাৰৰ ভোটদানৰ হাৰ আছিল সৰ্বনিম্ন। অৱশ্যে শুকুৰবাৰে দ্বিতীয় ৰাউণ্ডত ৪৯.৮ শতাংশ ভোটাৰে নিজৰ গণতান্ত্ৰিক অধিকাৰ সাব্যস্ত কৰে।
প্ৰসংগক্ৰমে উল্লেখ কৰিব পাৰি যে ১৯ মে’ত পূব আজাৰবাইজানৰ এখন পাহাৰত খুন্দা মৰাৰ পিছত ৰাইছিৰ হেলিকপ্টাৰ দুৰ্ঘটনাগ্ৰস্ত হয়। ইৰাণৰ বৈদেশিক মন্ত্ৰী হোছেইন আমিৰাব্দুল্লাহিয়ানো দূর্ঘটনাত পতিত হয় ৷ দুৰ্ঘটনাত দুয়োৰে মৃত্যু হয়। ইৰাণৰ সংবিধান অনুসৰি ৰাষ্ট্ৰপতিৰ মৃত্যুৰ ৫০ দিনৰ ভিতৰত উপ-ৰাষ্ট্ৰপতি (অন্তৱৰ্তীকালীন ৰাষ্ট্ৰপতি), সংসদৰ অধ্যক্ষ আৰু ন্যায়পালিকাৰ মুৰব্বীৰে গঠিত পৰিষদে দেশখনত নতুন নিৰ্বাচনৰ আয়োজন কৰে। প্ৰথম অৱস্থাত ছয়জন প্ৰাৰ্থী আছিল যদিও পিছত দুজনে নাম প্ৰত্যাহাৰ কৰে। শেষত চূড়ান্ত যুঁজখন হৈছিল পেজেছকিয়ান আৰু জালিলিৰ মাজত।
