অটোচালকৰ ঘৰত অৰবিন্দ কেজৰিৱালে গ্ৰহণ কৰিলে খাদ্য, ইণ্টাৰনেটত ভাইৰেল ফটো

এজন অটোচালকৰ নিমন্ত্ৰন গ্ৰহণ কৰি তেওঁৰ ঘৰত খাদ্যগ্ৰহণ কৰিলে দিল্লীৰ মুখ্যমন্ত্ৰী অৰবিন্দ কেজৰিৱালে ৷ লুধিয়ানাৰা অটোচালকজনৰ বাসগৃহত খাদ্য গ্ৰহণ কৰি মুখ্যমন্ত্ৰীয়ে টুইটাৰযোগে প্ৰকাশ কৰা ফটোখন ইতিমধ্যে ভাইৰেল হৈ পৰিছে ৷ আগন্তুক বিধানসভা নির্বাচনৰ বাবে কেজৰিৱালে পাঞ্জাৱ ভ্ৰমণৰ সময়ত অটো চালকসকলক সাক্ষাৎ কৰিছিল ৷ সেই সময়তে এজন অটোচালকে কেজৰিৱালক নিজৰ ঘৰলৈ নিমন্ত্ৰন জনাইছিল ৷ কালি অনুষ্ঠিত সভাখনৰ মাজতে দিলীপ তিৱাৰী নামৰ অটোচালকজনে তেওঁক নিমন্ত্ৰন জনাইছিল ৷ লগে লগে কেজৰিৱালে কালি নিশাই তেওঁৰ ঘৰলৈ খাদ্যগ্ৰহণৰ বাবে যাব বুলি প্ৰকাশ কৰে ৷ ইয়াৰ পাছতে আম আদমী পার্টীৰ সাংসদ ভাগৱান্ত মন আৰু বিধায়ক হৰপল সিঙক লগত লৈ অটোচালক দিলীপ তিৱাৰীৰ বাসগৃহত উপস্থিত হয় কেজৰিৱাল ৷ খাদ্যগ্ৰহণৰ পাছতে এখন ফটো ছছিয়েল মাধ্যমত প্ৰকাশ কৰি কেজৰিৱালে কয় যে দিলীপ তিৱাৰীৰ পৰিয়ালে তেওঁলোকক অত্যন্ত সুস্বাদু খাদ্যৰে আপ্যায়ন কৰিছে ৷ তিৱাৰীৰ  পৰিয়ালক দিল্লীৰ বাসগৃহলৈ নিমন্ত্ৰন জনোৱা বুলিও কেজৰিৱালে প্ৰকাশ কৰিছে ৷