ৰাছিয়া-ইউক্ৰেইনৰ মাজৰ যুদ্ধ অব্যাহত আছে। এই যুদ্ধৰ বাবে ৰাছিয়া আৰু ইউক্ৰেইনে এখন দেশে আনখনক দোষাৰোপ কৰিয়েই আছে। এইবাৰ ৰাছিয়াই ইউক্ৰেইনক স্থানীয় আক্ৰমণৰ অভিযোগ উত্থাপন কৰে। ইউক্ৰেইনৰ পূব অঞ্চলৰ মাকিভকা চহৰ এতিয়া ৰাছিয়াৰ নিয়ন্ত্ৰণত আছে। ক্ৰেমলিনে দাবী কৰিছে যে ইউক্ৰেইনৰ আক্ৰমণত ৪১ জন লোক আহত হৈছে। গুৰুতৰভাৱে আহত এজন লোকৰ মৃত্যু হয়।
ইউক্ৰেইন আক্ৰমণত ৰাছিয়াৰ মূল লক্ষ্য হৈছে ডনেটস্ককে ধৰি পূব ইউক্ৰেইন দখল কৰা। ইতিমধ্যে ডনেটস্কৰ কিছু অংশ ক্ৰেমলিন সমৰ্থিত বিচ্ছিন্নতাবাদী গোটৰ নিয়ন্ত্ৰণত আছে। কিন্তু মস্কোৱে ইউক্ৰেইনৰ ঔদ্যোগিক ফার্মসমূহৰ ওপৰতো চকু ৰাখিছে। মাকিভকাত ৰাছিয়াৰ নিযুক্তিপ্ৰাপ্ত প্ৰশাসনিক মুৰব্বী ভ্লাডিছলাভ ক্লিউচাৰভে কয় , “ধাৰাবাহিকভাৱে চলি থকা গোলাবৰ্ষণত একচল্লিশজন লোক আহত হৈছে। তাৰ ভিতৰত দুটা শিশুও আছে। গুৰুতৰভাৱে আহত এজন লোক। পিছত তেওঁৰ মৃত্যু হয়।” ৰাছিয়াৰ নিযুক্তিপ্ৰাপ্ত ডনেস্কৰ মুৰব্বী ডেনিছ পুচিলিনে দাবী কৰে যে ইউক্ৰেইনৰ বাহিনীয়ে মাকিভকাৰ আৱাসিক অঞ্চলৰ চিকিৎসালয়ৰ চৌহদত মাৰাত্মক আক্ৰমণ চলাইছিল।
কিয়েভৰ সেনাই দাবী কৰিছে যে তেওঁলোকে মাকিভকাত ৰাছিয়াৰ “আন্তঃগাঁথনি” ধ্বংস কৰিছে। এক বৃহৎ বিস্ফোৰণৰ ভিডিঅ’ ভাইৰেল হৈছে ছ’চিয়েল মিডিয়াত। তেওঁলোকে এক বিবৃতিত কয় যে অস্থায়ীভাৱে দখল কৰা মাকিভকা চহৰত ৰাছিয়াৰ সেনাৰ আন এটা আন্তঃগাঁথনি ধ্বংস হৈছে।
ইফালে ইউক্ৰেইনত ৰাছিয়াৰ পাৰমাণৱিক আক্ৰমণৰ আশংকাই পুনৰ মূৰ তুলিছে। কিছুসংখ্যক কূটনীতিবিদে আশংকা কৰিছে যে পৰৱৰ্তী পাৰমাণৱিক দুৰ্যোগ পূব ইউক্ৰেইনত হ’ব পাৰে। আমেৰিকাৰ এখন দৈনিক কাকতে প্ৰকাশ কৰা এক প্ৰতিবেদন অনুসৰি চীনৰ ৰাষ্ট্ৰপতি জি জিনপিঙে ৰাছিয়াৰ ৰাষ্ট্ৰপতি ব্লাদিমিৰ পুটিনক সকীয়াই দিছে। সেই প্ৰতিবেদন অনুসৰি ৰাছিয়াক পাৰমাণৱিক অস্ত্ৰ ব্যৱহাৰ কৰাত বাধা দিয়াৰ সকলো কৃতিত্ব চীনৰ। যোৱা মাৰ্চ মাহত যেতিয়া জি জিনপিঙে মস্কো ভ্ৰমণ কৰিছিল তেতিয়া তেওঁ সতৰ্ক কৰি দিছিল পুটিনক ৷
বেলাৰুছত ৰাছিয়াই নিৰ্মাণ কৰিছে পাৰমাণৱিক অস্ত্ৰৰ ঘাটি। পশ্চিমীয়া দেশবোৰো সেই বিষয়ে চিন্তিত হৈ পৰিছে । বেলাৰুছৰ ৰাষ্ট্ৰপতি আলেকজেণ্ডাৰ লুকাচেংকোৱে অৱশ্যে আন্তঃৰাষ্ট্ৰীয় পাৰমাণৱিক চুক্তিখন কোনো ধৰণে উলংঘা নকৰে বুলি কয়।
ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিয়ে আজি ফ্ৰান্সৰ ৰাষ্ট্ৰপতি ইমানুৱেল মেক্ৰনক জাপ’ৰিজিয়া পাৰমাণৱিক শক্তি কেন্দ্ৰক লৈ উদ্বেগ প্ৰকাশ কৰে। এই পাৰমাণৱিক সুবিধাটো ৰাছিয়াৰ নিয়ন্ত্ৰণত আছে। জেলেনস্কিৰ ভাষাত “এয়া অতি বিপদজনক। আন্তঃৰাষ্ট্ৰীয় পাৰমাণৱিক শক্তি সংস্থাৰ সৈতে যৌথ নিৰীক্ষণ চলি আছে।কালি সন্ধিয়া এখন সংবাদমেলত জেলেনস্কিয়ে দাবী কৰিছিল যে ৰাছিয়াই জাপ’ৰিজিয়া পাৰমাণৱিক শক্তি কেন্দ্ৰত বিস্ফোৰক যন্ত্ৰ স্থাপন কৰিছে। চীনে ইয়াৰ বিৰোধিতা কৰে। এই মুহূৰ্তত যুদ্ধক্ষেত্ৰত চীনৰ স্থিতি অন্যতম গুৰুত্বপূৰ্ণ।”
