৭০ বছৰৰ পাছত নতুন ৰজা বাকিংহাম পেলেচৰ সিংহাসনত অধিষ্ঠিত হ’ল । শনিবাৰে লণ্ডনত তৃতীয় চাৰ্লছৰ ৰাজ অভিষেক অনুষ্ঠিত হয়। দুহাজাৰ অতিথিক নিমন্ত্ৰণ কৰা হৈছিল। কেৱল শনিবাৰে নহয়, একেৰাহে তিনিদিন ধৰি সমগ্ৰ দেশতে চাৰ্লছৰ সন্মানত ভোজ-ভাতৰ আয়োজন কৰা হ’ব। কিন্তু ইয়াৰ মাজতে ইংলেণ্ডৰ ৰাজপথ ৰাজতন্ত্ৰৰ বিৰোধী শ্লোগানত উত্তাল হৈ পৰে । বহু প্ৰতিবাদকাৰীক গ্ৰেপ্তাৰ কৰা হৈছে ৷
ব্ৰিটিছ সংবাদ মাধ্যমৰ সূত্ৰ অনুসৰি শনিবাৰে ৰজাৰ ৰাজ অভিষেক অনুষ্ঠান আৰম্ভ হোৱাৰ পূৰ্বেই ৰাজতন্ত্ৰৰ বিৰুদ্ধে কমেও ৫২ জন লোকক গ্ৰেপ্তাৰ কৰে ব্ৰিটিছ আৰক্ষীয়ে। এই আটাইকেইজনেই ৰাজতন্ত্ৰ বিৰোধী দল ৰিপাব্লিকৰ সদস্য। দাবী কৰা হৈছে যে সেই দলৰ নেতা গ্ৰেহাম স্মিথকো গ্ৰেপ্তাৰ কৰা হৈছে।
চাৰ্লছৰ ৰাজ অভিষেকৰ দিনা লণ্ডনৰ ৰাজপথত একাংশ লোকে ৰাজতন্ত্ৰৰ বিৰুদ্ধে প্ৰতিবাদ সাব্যস্ত কৰে। তেওঁলোকৰ মূল দাবী হৈছে একবিংশ শতিকাত ৭৪ বছৰীয়া এজন ৰজাৰ ৰাজ অভিষেক অর্থহীন৷ এই অনুষ্ঠানত ব্যয় কৰা বিপুল পৰিমাণৰ ধন দেশৰ অৰ্থনৈতিক উন্নয়নৰ বাবে ব্যৱহাৰ কৰাৰ দাবী জনাইছে প্ৰতিবাদকাৰীসকলে। ৰাজ অভিষেক বন্ধ কৰি সেই ধনেৰে অনাহাৰে থকা লোকক খুৱাব লাগে বুলি তেওঁলোকে দাবী জনাইছে।
শনিবাৰে লণ্ডনত ‘ৰাজতন্ত্ৰ নিপাত যাওক’, ‘আমাৰ কোনো ৰজা নাই’ আদি শ্লোগান শুনা যায় । বহুতে ৰাজতন্ত্ৰ বিৰোধী বিভিন্ন প্লেকাৰ্ড লৈ প্ৰতিবাদত অংশগ্ৰহণ কৰে। কিন্তু পৰিস্থিতি নিয়ন্ত্ৰণ কৰিবলৈ আৰু ৰজাৰ কাম-কাজত যাতে কোনো ধৰণৰ ব্যাঘাত নপৰে তাৰ বাবে আৰক্ষীয়ে তেওঁলোকক গ্ৰেপ্তাৰ কৰে ৷
প্ৰতিবাদকাৰীসকলে কয় যে তেওঁলোকে আশা কৰিছে যে তৃতীয় চাৰ্লছ ব্ৰিটিছ সিংহাসনত শেষবাৰৰ বাবে অধিষ্ঠিত হ’ব ইয়াৰ পিছত ব্ৰিটেইনত ৰাজতন্ত্ৰৰ অস্তিত্ব আৰু নাথাকিব।
শনিবাৰে কেৱল লণ্ডনতে নহয়, স্কটলেণ্ড আৰু ৱেলছৰ কেইবাটাও অঞ্চলত ৰাজতন্ত্ৰ বিৰোধী প্ৰতিবাদ দেখা গৈছিল। কিন্তু প্ৰশাসনে দাবী কৰিছে যে শনিবাৰৰ ৰাজ অভিষেকক সমৰ্থন কৰা বিৰোধীসকলতকৈ ৰজাৰ সমৰ্থকৰ সংখ্যা বেছি।
চাৰ্লছৰ ৰাজ অভিষেকৰ ব্যয়ৰ বিষয়ে আনুষ্ঠানিকভাৱে প্ৰকাশ কৰা নাই বাকিংহাম পেলেছে। অৱশ্যে বিবিচিয়ে প্ৰকাশ কৰা অনুসৰি মুঠ খৰচ প্ৰায় ৫০০ৰ পৰা ১০০০ কোটি। ব্ৰিটেইনত শাসকীয় চৰকাৰে ৰাজ অভিষেকৰ বাবে ধন প্ৰদান কৰে । অৰ্থাৎ এই ৰাজহ পৰোক্ষভাৱে সাধাৰণ নাগৰিক আৰু কৰদাতাই কৰে। বহুতে প্ৰশ্ন উত্থাপন কৰিছে, একবিংশ শতিকাত এজন ‘পুৰণি’ ৰজাৰ ৰাজ অভিষেক আৰু কেৱল পৰম্পৰাৰ স্বাৰ্থত এই অৰ্থনৈতিক ব্যয় কিমান ন্যায্য।
