দিছপুৰ, ৪ এপ্ৰিলঃ গৃহ নিৰ্মাণ আৰু নগৰ পৰিক্ৰমা বিভাগৰ মন্ত্ৰী অশোক সিংহলে আজি তেওঁৰ জনতা ভৱনস্থিত কাৰ্যালয়ৰ সভাকক্ষত আয়োজিত ‘প্ৰধানমন্ত্ৰী গতিশক্তি ৰাষ্ট্ৰীয় মাষ্টাৰ প্লেন’ সম্পৰ্কীয় এক বিশেষ কৰ্মশালাত অংশগ্ৰহণ কৰে। গৃহ নিৰ্মাণ আৰু নগৰ পৰিক্ৰমা বিভাগৰ বিষয়ববীয়াসকলৰ লগতে গুৱাহাটীভিত্তিক বিভিন্ন সংস্থাৰ প্ৰতিনিধিসকলে অংশগ্ৰহণ কৰা এই কৰ্মশালাত পি এম গতিশক্তি পৰ্টেল ব্যৱহাৰৰ এক সামগ্ৰিক দৃষ্টিভংগীৰ বিষয়ে ব্যাখ্যা আগবঢ়োৱাৰ লগতে মূলতঃ গৃহ নিৰ্মাণ আৰু নগৰ পৰিক্ৰমা বিভাগৰ লগত সম্পৰ্কিত বিষয়সমূহৰ বিষয়ে অংশগ্ৰহণকাৰীসকলক অৱগত কৰোৱা হয়।
উল্লেখযোগ্য যে ২০০১ চনৰ ১৩ অক্টোবৰ তাৰিখে প্ৰধানমন্ত্ৰী নৰেন্দ্ৰ মোদীয়ে দেশৰ মুখ্য আন্তঃগাঁথনিমূলক প্ৰকল্পসমূহ ৰূপায়ণৰ ক্ষেত্ৰত চৰকাৰৰ বিভাগীয় জটিলতাসমূহ আঁতৰোৱাৰ লগতে অংশীদাৰসকলৰ বাবে সামগ্ৰিক পৰিকল্পনাক প্ৰতিষ্ঠানিক ৰূপ দিয়াৰ দৃষ্টিভংগীৰে ‘প্ৰধানমন্ত্ৰী গতিশক্তি’ প্ৰকল্পৰ শুভাৰম্ভ কৰিছিল। ‘প্ৰধানমন্ত্ৰী গতিশক্তি ৰাষ্ট্ৰীয় মাষ্টাৰ প্লেন’ (এনএমপি) হৈছে ‘জিআইএছ’ আধাৰিত প্ৰযুক্তিৰ বিকাশ আৰু বহুমুখী আন্তঃগাঁথনি তথা অৰ্থনৈতিক ক্ষেত্ৰসমূহৰ সুসংগত বিকাশৰ বাবে বিভিন্ন মন্ত্ৰালয় তথা বিভাগৰ প্ৰচেষ্টা একত্ৰিত কৰাৰ বাবে এক প্ৰাতিষ্ঠানিক প্ৰণালী। ই হৈছে ‘ভাস্কৰাচাৰ্য ৰাষ্ট্ৰীয় মহাকাশ উপযোগ আৰু ভূ-তথ্য প্ৰতিষ্ঠান’ (বিআইএছএজি-এন)ৰ সহযোগিতাৰে বিকশিত এক একত্ৰ মঞ্চ। ভূমি অভিলেখ, পথ, ৰে’লপথ, অৰ্থনীতি ক্ষেত্ৰ আৰু ঔদ্যোগিক ক্ষেত্ৰৰ দৰে ১৩০০+ ‘জিআইএছ’ স্তৰ একত্ৰিত হোৱাৰ লগতে এই মঞ্চখনক সকলো কেন্দ্ৰীয় মন্ত্ৰালয়, বিভাগ আৰু ৰাজ্য চৰকাৰে ব্যৱহাৰ কৰি আছে, যাৰ ফলত প্ৰকল্প পৰিকল্পনা আৰু ৰূপায়ণৰ গতি দ্ৰুত হোৱাৰ উপৰি ব্যয় হ্ৰাস, দক্ষতা বৃদ্ধি, আৰু জনকল্যাণৰ পৰিসৰ বৃদ্ধি হৈছে।
আনহাতে, আজি পুৱা মন্ত্ৰী সিংহলে লোক নিৰ্মাণ বিভাগৰ বিষয়ববীয়াসকলক লগত লৈ গুৱাহাটীৰ নেহৰু ষ্টেডিয়ামৰ সমীপৰ পৰা উলুবাৰীলৈকে নিৰ্মাণ কৰিবলগীয়া প্ৰস্তাৱিত নলাৰ স্থান পৰিদৰ্শন কৰে। ইয়াৰ পাছতে মন্ত্ৰীগৰাকীয়ে জনতা ভৱনত ওড়িশা জল নিগমৰ প্ৰতিনিধিসকলৰ সৈতে এক বৈঠকত মিলিত হয়। বৈঠকত ওড়িশা জল নিগমৰ দলটোৱে ৰাজ্যখনৰ বিভিন্ন চহৰত তেওঁলোকৰ “ডাইৰেক্ট ফ্ৰম টেপ ৱাটাৰ আঁচনি”ৰ সফল ৰূপায়ণৰ সন্দৰ্ভত মন্ত্ৰীগৰাকীৰ সন্মুখত এক প্ৰেজেণ্টেশ্যন দাঙি ধৰে আৰু অসমত ইয়াৰ ৰূপায়ণৰ সম্ভাৱনীয়তাৰ বিষয়ে আলোচনা কৰে।ইয়াৰ পাছতে তেওঁ গৃহ নিৰ্মাণ আৰু নগৰ পৰিক্ৰমা বিভাগৰ বিষয়ববীয়াসকলৰ সৈতে হোৱা বৈঠকত ভাৰতৰ মাননীয় ৰাষ্ট্ৰপতি মহোদয়াৰ আগন্তুক ভ্ৰমণৰ বাবে স্থানৰ প্ৰস্তুতি, নিৰাপত্তাৰ ব্যৱস্থা ইত্যাদি সন্দৰ্ভত আলোচনা কৰে। আনহাতে আজি সন্ধিয়া মন্ত্ৰী সিংহলে ভাৰত চৰকাৰৰ জলশক্তি মন্ত্ৰালয়ৰ অধীনস্থ ৱেপক’ছ লিমিটেডৰ প্ৰতিনিধিসকলৰ সৈতে আন এখন বৈঠকত মিলিত হয়। এই বৈঠকত ৰাজ্যখনত ভৱিষ্যতৰ জলসিঞ্চন আঁচনিসমূহ অধিক ফলপ্ৰসূ কৰি তুলিবলৈ অসমত দূৰ সংবেদী “লাইট ডিটেকশ্যন এণ্ড ৰেঞ্জিং” (লিডাৰ) জৰীপ চলোৱাৰ বিষয়ে আলোচনা কৰে।
