গুৱাহাটী মহানগৰীৰ হাতীগাঁৱৰ ৰাজপথত থকা কাচা লিমিটাড’ এপাৰ্টমেণ্টত মেঘালয়ৰ এগৰাকী যুৱতীৰ মৃতদেহ ৰহস্যজনক অৱস্থাত উদ্ধাৰ হোৱা ঘটনাৰ তদন্ত অব্যাহত আছে । মৃত অৱস্থাত উদ্ধাৰ হোৱা ঋত্বিকা সোণাৰ নামৰ যুৱতীগৰাকী মেঘালয়ৰ নংপুৰ বাসিন্দা আছিল ৷ গুৱাহাটীৰ জেট উইংছ নামৰ এটা ব্যক্তিগত প্ৰতিষ্ঠানত অধ্যয়নৰত আছিল যুৱতীগৰাকী। প্ৰায় ১৩ মাহ ধৰি পশ্চিম বংগৰ এজন যুৱকৰ সৈতে একেলগে ফ্লেটটোত বাস কৰিছিল যুৱতীগৰাকীয়ে। এই ঘটনাৰ পাছতে তেওঁৰ সৈতে একেলগে বাস কৰা ৰূপেশ ৰয়ক আৰক্ষীয়ে আটক কৰিছে ৷ আৰক্ষীয়ে আটক কৰিছে ৰূপেশৰ এজন বন্ধুকো ৷
খবৰ অনুসৰি, যোৱা বুধবাৰৰ নিশা ৰূপেশ আৰু ঋত্বিকাৰ মাজত কোনো কথাক লৈ কাজিয়াৰ সূত্ৰপাত হৈছিল। তাৰ পিছতে বন্ধ কোঠাত উদ্ধাৰ হৈছিল ঋত্বিকাৰ মৃতদেহ ।ইয়াৰ পাছতে ৰূপেশ আৰু বন্ধুজনে হাস্পতাললৈ লৈ গৈছিল ঋত্বিকাক। ৰূপেশৰ বন্ধুজনৰ ঘৰ উত্তৰাখণ্ডত। বন্ধুৰ সৈতে মিলি ৰূপেশে ঋত্বিকাক হত্যা কৰাৰ সন্দেহ কৰা হৈছে।
উল্লেখযোগ্য যে শেহতীয়াকৈ মহানগৰীত সংঘটিত হৈছে কেইবাটাও চাঞ্চল্যকৰ ঘটনা ৷ অঞ্জু দৰ্জী নামৰ এগৰাকী যুৱতীৰ মৃত্যুৰ চাঞ্চল্য মাৰ নৌযাঁওতেই মহানগৰীৰ হেঙেৰাবাৰীত পুনৰ অনুষ্কা শইকীয়া নামৰ ধেমাজিৰ এগৰাকী যুৱতীৰ ভাড়াঘৰতে ৰহস্যজনক মৃত্যু হয়। অনুষ্কা শইকীয়াৰ মৃত্যুৰ তদন্ত চলি থকাৰ মাজতেই বৃহস্পতিবাৰে মহানগৰীৰ হাতীগাঁৱত উদ্ধাৰ হয় ঋত্বিকাৰ মৃতদেহ ৷
