পেট্ৰ’লৰ অত্যধিক মূল্যই আমাৰ সামগ্ৰিক জনজীৱনত কিদৰে প্ৰভাৱ পেলাই আহিছে সেয়া সকলোৰে পৰিচিত ৷ কিন্তু পেট্ৰলিয়ামজাত সামগ্ৰীসমূহৰ এই পৰিস্থিতি কেতিয়াও নহ’লহেতেন ৷ সামান্য গেছলিনেৰে এখন গাড়েয়ে কেইবা কিলোমিটাৰ অতিক্ৰম কৰিব পাৰিলেহেতেন ৷
১ লিটাৰ পেট্ৰ’লত গাড়ী এখন ১০০ কিলোমিটাৰ চলাব পাৰিলে আপোনাৰ কিমান লাভ হ’লহেতেন কল্পনা কৰিব পাৰেনে ? কিন্তু এয়া অসাধ্য নাছিল ৷ আমেৰিকাৰ বিজ্ঞানী টম অগলেই ইয়াক সম্ভৱ কৰি তুলিছিল ৷ কিন্তু বিজ্ঞানী টম অগলে ৰহস্যজনকভাৱে আমাৰ মাজৰ পৰা নোহোৱা হৈ গ’ল।কোন এই টম অগলে আপুনি জানেনে ?
টম আছিল এজন আমেৰিকান বিজ্ঞানী। টমে দাবী কৰিছিল যে ইঞ্জিনৰ কাৰ্ব’ৰেটৰটো তেওঁ নিৰ্মাণ কৰা এনে এটা যন্ত্ৰৰে সলনি কৰিছিল যাৰ ফলত েখন গাড়ী কম তেলত অধিক দূৰত্ব অতিক্ৰম কৰিব পাৰিব। টমে প্ৰকাশ কৰিছিল যে তেওঁ নিৰ্মাণ কৰা মেচিনটোৰ জৰিয়তে ভাপ কাৰ্ব’ৰেটৰৰ ধাৰণাটো লৈছিল। এই যন্ত্ৰটোৱে গাড়ীৰ ইঞ্জিনটো অতি ইন্ধন ক্ষমতাশালী কৰি তোলে।
১৯৭৭ চনত টমে নিজৰ মেচিনটো ৪২৭ হৰ্চপাৱাৰৰ ভি-৮ ইঞ্জিন আৰু ১১.৫ লিটাৰৰ টেংকযুক্ত ফৰ্ড গেলেক্সিত ব্যৱহাৰ কৰিছিল। টমে সেই গাড়ীখনত নিজৰ ডিভাইচ স্থাপন কৰি অতি কম তেলেৰে প্ৰায় ১৬০ কিলোমিটাৰ পথ অতিক্ৰম কৰিছিল। ফৰ্ড গেলেক্সি গাড়ীবোৰ অতি গধুৰ। গতিকে গধুৰ বাহনত এই যন্ত্ৰটো অধিক ইন্ধন কাৰ্যক্ষম হ’ব বুলি ভবা হৈছিল। বেছিভাগ গাড়ীৰ ইঞ্জিনতে কাৰ্ব’ৰেটৰ আৰু ইন্ধন পাম্প ব্যৱহাৰ কৰা হয়। তৰল ইন্ধন দহন কক্ষত প্ৰৱেশ কৰি ইঞ্জিনলৈ শক্তি যোগান ধৰে।
অগলে কাৰ্ব’ৰেটৰ আৰু ফিউৱেল পাম্প সলনি কৰি ‘ব্লেক বক্স ফিল্টাৰ’ লগাই দহন কক্ষবোৰ বাষ্প কৰা গেছলিনেৰে ভৰাই দিছিল। কিন্তু তেল কোম্পানীবোৰে টমৰ আৱিষ্কাৰক ভালদৰে লোৱা নাছিল। কাৰণ এই মেচিন বজাৰলৈ আহিলে তেওঁলোকে বজাৰ হেৰুৱাই পেলালেহেঁতেন। টমে এটা ভঙা বাগিচা চাফা কৰা মেচিনৰ পৰা এই যন্ত্ৰটো উদ্ভাৱন কৰিছিল ৷ এবাৰ টমে বাগিচাত ঝাড়ু দিয়া যন্ত্ৰৰ সহায়ত অপতৃণবোৰ পৰিষ্কাৰ কৰি আছিল। তেতিয়া মেচিনটো বেয়া হৈ যায়। সেই মেচিনটো ঠিক কৰি থাকোঁতে তেওঁ শক্তি ৰাহি কৰা মেচিন এটা উদ্ভাৱন কৰাৰ কথা ভাবিলে।
কিন্তু টমৰ ইঞ্জিন কেতিয়াও বজাৰলৈ নাহিল। যন্ত্ৰটোৰ সফল পৰীক্ষণৰ পিছত বহু বিনিয়োগকাৰীয়ে তেওঁৰ ঘৰত ভিৰ কৰে। টমে বহুতৰ পৰা বৃহৎ পৰিমানৰ টকা লোৱা বুলিও চর্চা লাভ কৰিছিল ৷ কিন্তু হঠাতে টম নোহোৱা হৈ গ’ল। এই বিষয়ে দুটা চর্চা চলি আহিছে ৷ বহুতৰ মতে টমৰ পৰিয়ালৰ বহু সমস্যা আছিল। পত্নীয়ে তেওঁক এৰি থৈ গ’ল। ইয়াৰ বাবে তেওঁ প্ৰচুৰ পৰিমাণে মদ্যপান কৰিছিল আৰু অসুস্থতাৰ বাবে হঠাতে মৃত্যুবৰণ কৰিছিল।
আনহাতে, জনপ্ৰিয় আমেৰিকান ৰেডিঅ’ মন্তব্যকাৰী পল হাৰ্ভিয়ে দাবী কৰিছিল যে যিদিনা তেওঁ নিজৰ আৱিষ্কাৰ ৰাজহুৱা কৰাৰ পৰিকল্পনা কৰিছিল, সেইদিনা টমে নিৰুদ্দেশ হৈছিল। কেৱল সেয়াই নহয়, ডিভাইচটোৰ বিষয়ে তেওঁ প্ৰস্তুত কৰা নথি-পত্ৰবোৰো ৰাতিটোৰ ভিতৰতে নোহোৱা হৈ গ’ল। টম অবিহনে মেচিনটো পৰীক্ষা কৰা হৈছিল। কিন্তু ডিভাইচটোৱে কাম কৰা নাছিল।
কিন্তু সেই সময়ত বহুতে দাবী কৰিছিল যে টমৰ অনুপস্থিতিত ইচ্ছাকৃতভাৱে ডিভাইচটোৰ ভুল পৰীক্ষা কৰা হৈছিল। বহুতে দাবী কৰিছিল যে টমৰ নিৰুদ্দেশৰ আঁৰত এজন ‘বৃহৎ মাষ্টৰ’ আছে। কিন্তু সেই সকলোবোৰ দাবী প্ৰমাণিত নহ’ল। সময়ৰ লগে লগে টম আৰু তেওঁৰ যন্ত্ৰ অপ্রাসংগিক হৈ পৰিল। আন কেইবাজনো গৱেষকে একেধৰণৰ যন্ত্ৰ উদ্ভাৱন কৰিবলৈ চেষ্টা কৰিছিল যদিও সফল নহ’ল।
