সুৰক্ষা গাফিলতি ! উৰণীয়া সেতুঁত কিয় ১৫-২০ মিনিট আৱদ্ধ হৈ ৰ’ল প্ৰধানমন্ত্ৰীৰ কনভয় ?

বিধানসভা নির্বাচনৰ প্ৰচাৰলৈ গৈ পাঞ্জাৱত আজি এক অনাকাংক্ষিত পৰিস্থিতিৰ সন্মুখীন হ’ল প্ৰধানমন্ত্ৰী নৰেন্দ্ৰ মোদী ৷ হুছেইনিৱালাৰ ৰাষ্ট্ৰীয় শ্বহীদ স্মাৰক অভিমুখে গৈ থকা অৱস্থাতে প্ৰতিবাদকাৰীয়ে  অৱৰোধ কৰিলে পথ ৷ যাৰ ফলত গন্তব্য স্থান  লাভ কৰাৰ প্ৰায় ৩০ কিল’মিটাৰ দুৰত্বত এখন উৰণীয়া সেতুঁৰ ওপৰত ১৫-২০ মিনিট সময় ধৰি আৱদ্ধ হৈ থাকিবলগীয়া হ’ল প্ৰধানমন্ত্ৰীৰ কনভয় ৷ ঘটনাৰ বিবৰণী অনুসৰি আজি পুৱা প্ৰধানমন্ত্ৰী ভাটিণ্ডাত বিশেষ বিমানেৰে  অৱতৰণ কৰে ৷ ইয়াৰ পৰা তেওঁ হেলিকপ্টাৰেৰে হুছেইনিৱালাৰ ৰাষ্ট্ৰীয় শ্বহীদ স্মাৰকলৈ যোৱাৰ কথা আছিল ৷  কিন্তু বৰষুণৰ বাবে বতৰ পৰিষ্কাৰ নোহোৱাত  প্ৰায় ২০ মিনিট অপেক্ষা কৰিবলগীয়া হয় তেওঁ  ৷  বতৰৰ উন্নতি নোহোৱাত  প্ৰধানমন্ত্ৰীয়ে পথৰ জৰিয়তে স্মাৰক পৰিদৰ্শন কৰিবলৈ  সিদ্ধান্ত গ্ৰহণ কৰে ৷  পথেৰে স্মাৰকলৈ দুই ঘণ্টাতকৈ অধিক সময় ৰ প্ৰয়োজন হয় ৷   পঞ্জাৱ আৰক্ষীৰ ডি জি পিৰ  নিৰাপত্তা ব্যৱস্থাৰ ওপৰত প্ৰয়োজনীয় নিশ্চিতিৰ পিছত পথেৰে ভ্ৰমণ কৰিবলৈ আগবাঢ়িছিল প্ৰধানমন্ত্ৰী ৷  ৰাষ্ট্ৰীয় শ্বহীদ স্মাৰকৰ পৰা প্ৰায় ৩০ কিলোমিটাৰ দূৰত,  কনভয় এখন উৰণীয়া সেঁতুত উপস্থিত হোৱাৰ সময়তে  প্ৰতিবাদকাৰীয়ে পথটো অৱৰোধ কৰে ৷ । যাৰ বাবে  প্ৰধানমন্ত্ৰী ১৫-২০ মিনিটৰ বাবে ফ্লাইঅভাৰত আবদ্ধ হৈ পৰে । ইয়াৰ পাছতে  বুধবাৰে ফিৰোজপুৰত অনুষ্ঠিত হ’বলগীয়া নৰেন্দ্ৰ মোদীৰ প্ৰথমখন ৰেলী বাতিল কৰা হয় ৷  কেন্দ্ৰীয় গৃহ মন্ত্ৰালয়ে কয় যে প্ৰধানমন্ত্ৰীৰ নিৰাপত্তাৰ ক্ষেত্ৰত এয়া  এক ডাঙৰ ত্ৰুটি ৷ সমান্তৰালভাৱে পঞ্জাৱ চৰকাৰক দোষাৰোপ কৰি গৃহ মন্ত্ৰালয়ে কয় যে প্ৰধানমন্ত্ৰীৰ সময়সূচী আৰু ভ্ৰমণ পৰিকল্পনা আগতীয়াকৈ জনোৱা হৈছিল ৷   সেয়েহে ৰাজ্য চৰকাৰে নিৰাপত্তাৰ বাবে প্ৰয়োজনীয় ব্যৱস্থা গ্ৰহন কৰিব লাগিছিল ৷