গুৰুতৰভাৱে অসুস্থ হৈ পৰিছে অসমীয়া ধাৰাবাহিক তথা চলচ্চিত্ৰজগতৰ জনপ্ৰিয় অভিনেতা জয়ন্ত দাস ৷ বৰ্তমান সংকটজনক অৱস্থাত মহানগৰীৰ খ্ৰীষ্টানবস্তিৰ এপ’ল’ হস্পিতালত চিকিৎসাধীন হৈ আছে অভিনেতাজন। শনিবাৰে নিশা হস্পিতালত তেওঁক ভর্ত্তি কৰোৱা হৈছিল ৷
জানিব পৰা মতে, বৰ্তমান ভেন্টিলেচনত অভিনেতা জয়ন্ত দাসক চিকিৎসা প্ৰদান কৰা হৈছে । যকৃৎজনিত বেমাৰত আক্ৰান্ত হৈছে অভিনেতাগৰাকী। অভিনেতাজনৰ অসুস্থতাৰ খবৰে অনুৰাগীসকলক চিন্তিত কৰি তুলিছে ৷ অভিনেতাজনৰ আশু আৰোগ্য কামনা কৰিছে ৰাজ্যবাসীয়ে।
কেইবাখনো ছবিৰ লগতে একাধিক ধাৰাবাহিকত তেওঁ অভিনয় কৰিছে ৷ তদুপৰি তেওঁ মঞ্চৰো এজন সফল অভিনেতা ৷ বিশেষকৈ তেওঁ কৌতুক অভিনেতা হিচাপে যথেষ্ট সমাদৰ লাভ কৰিছিল ৷
