ইছলামিক সংগঠন পপুলাৰ ফ্ৰণ্ট অৱ ইণ্ডিয়া চমুকৈ পিএফআইৰ বিৰুদ্ধে আজি পুনৰ দেশজোৰা অভিযান আৰম্ভ হৈছে ৷ নেচনেল ইনভেষ্টিগেচন চমুকৈ ‘নিয়া’ আৰু এনফর্চমেণ্ট সঞ্চালকালয়ে দ্বিতীয় পর্যায়ৰ অভিযান আৰম্ভ কৰিছে ৷ ইয়াৰ পূর্বে চলোৱা অভিযানত দেশজুৰি ১০০ ৰো অধিক পিএফআই নেতাক গ্ৰপ্তাৰ কৰা হৈছিল ৷ তদন্তকাৰী সংস্থাটোৱে মধ্যপ্ৰদেশ, কৰ্ণাটক, অসম, দিল্লী, মহাৰাষ্ট্ৰ, তেলেংগানা, আৰু উত্তৰ প্ৰদেশত অভিযান চলাইছে।
পিএফআইয়ে সন্ত্ৰাসবাদীক পুঁজি প্ৰদান কৰা, মুছলমান যুৱক-যুৱতীসকলক অস্ত্ৰৰ প্ৰশিক্ষণ প্ৰদান কৰা, সন্ত্ৰাসবাদী সংগঠনত যোগদান কৰিবলৈ তেওঁলোকক উৎসাহিত তোলাৰ অভিযোগ উত্থাপিত কৰা হৈছে। চোৰাংচোৱাৰ তথ্যৰ ভিত্তিত এই ব্যৱস্থা গ্ৰহণ কৰা হৈছে বুলি জানিব পৰা গৈছে।
অসমত আৰক্ষীয়ে পুৱাৰ ভাগত অভিযান চলাই মধ্য আৰু নিম্ন অসমৰ পাঁচখন জিলাত কমেও ২৫ জন পি এফ আই নেতাক আটক কৰিছে কামৰূপ জিলাৰ নগৰবেৰা অঞ্চল, গোৱালপাৰা, বৰপেটা, ধুবুৰী, বাক্সা, আৰু দৰং আদিৰ পৰা গ্ৰেপ্তাৰ কৰা হৈছে । ওদালগুৰি আৰু কৰিমগঞ্জতো অভিযান চলাই আহিছে ৷ ইয়াৰ পূৰ্বে অসম আৰক্ষীয়ে পিএফআইৰ ১১জন নেতা-কৰ্মীক ৰাজ্যৰ বিভিন্ন প্ৰান্তৰ পৰা গ্ৰেপ্তাৰ কৰিছিল।
দিল্লী আৰক্ষীৰ বিশেষ কোষটোৱে স্থানীয় পুলিচৰ সহায়ত ৰোহিনী, নিজামুদ্দিন, জামিয়া, শ্বাহীন বাগ, আৰু মধ্য দিল্লীকে ধৰি কেইবাটাও স্থানত অভিযান চলাই আছে। ৰাষ্ট্ৰীয় ৰাজধানীত এতিয়ালৈকে ৩০ জন লোকক আটক কৰা হৈছে, যিটো আজি পৰ্যন্ত যিকোনো ৰাজ্যৰ ভিতৰতে সৰ্বাধিক। থানে ক্ৰাইম ব্ৰাঞ্চে গভীৰ নিশা চলোৱা অভিযানত মুম্ব্ৰাৰ পৰা চাৰিজন পিএফআই কৰ্মীক গ্ৰেপ্তাৰ কৰে। মহাৰাষ্ট্ৰত ঔৰংগাবাদ আৰু সোলাপুৰতো অভিযান চলি থকাৰ খবৰ আহিছে।
কৰ্ণাটকৰ স্থানীয় আৰক্ষীয়ে পুৱাৰ ভাগত অভিযান চলাই ৪০ জন পি এফ আই সদস্যক জিম্মাত লৈছে ৷ বগালকোটে, বিদাৰ, চামাৰাজানগৰ, চিত্ৰদুৰ্গা, ৰামানগড়া, মঙলুৰু, কোপ্পল, বেল্লাৰী, কোলাৰ, বেংগালুৰু, মাইছুৰু, বিজয়াপুৰা আদিকে ধৰি ৰাজ্যজুৰি পি এফ আই নেতাৰ ঘৰত অভিযান চলায়। হিংসাত্মক প্ৰতিবাদৰ আশংকা কৰি কৰ্ণাটকত পিএফআই আৰু পপুলাৰ ফ্ৰণ্ট অৱ ইণ্ডিয়াৰ ৰাজনৈতিক শাখা ছ’চিয়েল ডেম’ক্ৰেটিক পাৰ্টি অৱ ইণ্ডিয়া (এছডিপিআই)ৰ ৭৫ জনতকৈ অধিক কৰ্মীকো জিম্মাত লোৱা হৈছে ৷ সমগ্ৰ মধ্যপ্ৰদেশৰ পৰা এতিয়ালৈকে ২১ জন পি এফ আই কৰ্মীক আটক কৰা হৈছে।
ইউ পি আৰক্ষীৰ বিশেষ টাস্ক ফৰ্ম চমুকৈ এছ টি এফেও কালি এজন লোকক গ্ৰেপ্তাৰ কৰে। আৰক্ষীয়ে জনোৱা মতে, লক্ষ্ণৌৰ পৰা অবৈধ কাৰ্যকলাপ (প্ৰতিৰোধ) আইন, ১৯৬৭ (ইউএপিএ)ৰ অধীনত বিভুতিখণ্ড বাছ ষ্টেণ্ডৰ পৰা আব্দুল মজীদ নামৰ এজন ব্যক্তিক গ্ৰেপ্তাৰ কৰা বুলি আৰক্ষীয়ে জানিবলৈ দিয়ে।
২২ ছেপ্টেম্বৰত ১৫ খন ৰাজ্যত নিয়াই চলোৱা অভিযানৰ সময়ত পি এফ আইৰ ১০৬ জনতকৈ অধিক সদস্যক গ্ৰেপ্তাৰ কৰিছিল।সেই অভিযানৰ পিছতে কৰ্ণাটকৰ গৃহমন্ত্ৰী আৰাগা জ্ঞানেন্দ্ৰই কৈছিল যে ৰাজ্যখনত পিএফআই নিষিদ্ধ কৰা হ’ব আৰু এই প্ৰক্ৰিয়া আৰম্ভ কৰা হৈছে।
