৯৬০০ টকালৈ দৰমহা বৃদ্ধিৰ আহ্বান মধ্যাহ্ন ভোজন ৰান্ধনী সন্থাৰ

বিগত বহু সময়জুৰি সদৌ অসম প্ৰাথমিক আৰু উচ্চ প্ৰাথমিক ৰান্ধনী সহায়িকা সন্থাই তেওঁলোকৰ দাবীসমূহ পূৰণ কৰাৰ অৰ্থে সংবাদমেলৰ আয়োজন কৰাৰ লগতে বাদ-প্ৰতিবাদৰ কাৰ্যসূচী ৰূপায়ণ কৰি আহিছে। কিন্তু এই পৰ্যন্ত তেওঁলোকে চৰকাৰৰ পৰা আশানুৰূপ সঁহাৰি লাভ কৰা নাই।

বুধবাৰে গুৱাহাটী প্ৰেছ ক্লাবত সদৌ অসম প্ৰাথমিক আৰু উচ্চ প্ৰাথমিক বিদ্যালয়ৰ মধ্যাহ্ন ভোজন ৰান্ধনী সহায়িকা সন্থাই এক সংবাদ মেল যোগে তেওঁলোকৰ দাবীসমূহ প্ৰকাশ কৰে। এই দাবীসমূহৰ ভিতৰত ৰান্ধনী সহায়িকাসকলৰ মহিলী বেতন ১৫০০ টকাৰ পৰা ৯৬০০ টকালৈ বৃদ্ধি কৰা, মধ্যাহ্ন ভোজন কৰ্মচাৰীসকলক পেঞ্চন তথা চিকিৎসাৰ সুবিধা প্ৰদান কৰাৰ লগতে মধ্যাহ্ন ভোজন আঁচনিখন কোনো কাৰণতে ব্যক্তিগত প্ৰতিষ্ঠানক প্ৰদান নকৰা দাবী উল্লেখযোগ্য।

ক’ভিড সৃষ্ট আৰ্থিক সংকটৰ এই সময়ত প্ৰয়োজনীয়সকলক কিছু সকাহ দিয়াৰ উদ্দেশ্যে ৰান্ধনী সহায়িকা সন্থাৰ তৰফৰ পৰা প্ৰতিগৰাকী কৰ্মচাৰীৰ আগষ্ট মাহৰ দৰমহাৰ পৰা ১০ টকাকৈ মুখ্যমন্ত্ৰীৰ সাহাৰ্য্য পুঁজিলৈ প্ৰেৰণ কৰাৰ সিদ্ধান্ত গ্ৰহণ কৰাৰ কথা সন্থাই অৱগত কৰে।

বিগত সময়ছোৱাত আন্দোলনৰ কাৰ্যসূচী গ্ৰহণ কৰিও কোনো সুফল নোপোৱা সন্থাৰ দাবীসমূহ চৰকাৰে পূৰণ নকৰিলে পৰৱৰ্তী সময়ত অৰ্থাৎ ছেপ্টেম্বৰ মাহৰ পৰা নতুনকৈ আন্দোলনৰ কাৰ্যসূচী গ্ৰহণ কৰাৰ কথাও সংবাদ মেলতে ঘোষণা কৰে। 

উল্লেখযোগ্য যে পূৰ্বতে বহু আন্দোলনৰ কাৰ্যসূচী সন্থাৰ ফালৰ পৰা গ্ৰহণ কৰা হৈছিল যদিও আজি পৰ্যন্ত কোনো সুফল লাভ নকৰাৰ পৰিপ্ৰেক্ষিতত মধ্যাহ্ন ভোজন কৰ্মচাৰীসকল বিভিন্ন সা সুবিধাৰ পৰা বঞ্চিত হৈ আছে বুলিও সংবাদ মেলত উল্লেখ কৰা হয়।

ৰান্ধনী সহায়িকাসকল ৰাজপথলৈ ওলাই আহি তীব্ৰ আন্দোলনৰ কার্যসূচী গ্ৰহণ কৰিবলগীয়া হ’লে যি অনাকাংক্ষিত পৰিস্থিতিৰ সৃষ্টি হ’ব তাৰ বাবে ৰাজ্যৰ মুখ্যমন্ত্ৰীগৰাকী জগৰীয়া হ’ব বুলি তেওঁলোকে মন্তব্য কৰে।

ছেপ্টেম্বৰৰ ৬ তাৰিখৰ দিনা প্ৰায় ৮০০০ কৰ্মীয়ে শিৱসাগৰত প্ৰথমটো কাৰ্যসূচী গ্ৰহণ কৰিব বুলি প্ৰকাশ কৰে। ইয়াৰ পৰৱৰ্তী পৰ্যায়ত মৰীয়নী, গুৱাহাটী আৰু অৱশেষত দিল্লীত আন্দোলনৰ কাৰ্যসূচী গ্ৰহণ কৰাৰ কথা উল্লেখ কৰি সন্থাৰ এগৰাকী কৰ্মীয়ে কয় যে কোনো এজন শিক্ষা মন্ত্ৰীয়েই তেওঁলোকৰ কথাত গুৰুত্ব প্ৰদান নকৰিলে। ক’ভিড সৃষ্ট পৰিৱেশৰ মাজত ভাগিনীয়েকসকল কেনেকৈ আছে তাৰ খবৰ মামা অৰ্থাৎ মুখ্যমন্ত্ৰীগৰাকীয়ে ন’ললে বুলিও অভিযোগ উত্থাপন কৰে।