বিশিষ্ট সংগীত শিল্পী ৰমেন বৰুৱা সন্ধানহীন হোৱা ঘটনাই উদ্বিগ্ন কৰি তুলিছে ৰাজ্যবাসীক ! সোমবাৰে পুৱা প্ৰায় ১০.৩০ বজাত ঘৰৰ পৰা ওলাই আহিছিল সংগীত শিল্পী গৰাকী ৷ কিন্তু সন্ধিয়া পর্যন্ত তেওঁ লতাশিলৰ ঘৰলৈ ওভতি নহাত পৰিয়ালৰ লোকৰ মাজত হাহাকাৰ পৰিস্থিতিৰ সৃষ্টি হয় ৷ তেওঁৰ ভাতৃ দ্বীপেন বৰুৱাই সংবাদমাধ্যমৰ সন্মুখত প্ৰকাশ কৰা অনুসৰি লতাশিলস্থিত গণেশ মন্দিৰৰ ৰমেন বৰুৱা আছিল সভাপতি ৷ যাৰ বাবে প্ৰতি দিনে পুৱা ১০ৰ পৰা ১০.৩০ বজাৰ ভিতৰত ৰমেন বৰুৱা আহে গণেশ মন্দিৰলৈ ৷ কালিও তেওঁ একে সময়তে ঘৰৰ পৰা ওলাই আহিছিল ৷
সোমবাৰে পুৱাভাগতে ঘৰৰ পৰা ওলাই যোৱা শিল্পীগৰাকীক গুৱাহাটী উচ্চ ন্যায়ালয়ৰ কাষেৰে ব্ৰহ্মপুত্ৰ নদীৰ দিশে যোৱা এটা পথত প্ৰত্যক্ষ কৰিছিল এজন লোকে । ইতিমধ্যে গুৱাহাটী উচ্চ ন্যায়ালয়ৰ চিচিটিভি কেমেৰাত তেওঁ পথটোৰে যোৱা দৃশ্য বন্দী হৈছে ৷ ইয়াৰ পাছতে প্ৰায় ১মান বজাত উজান বজাৰৰ গণেশ মন্দিৰৰ সমীপত এগৰাকী মহিলাই দেখা পাইছিল শিল্পীগৰাকীক। সেই সময়ত তেওঁ নিজে নিজৰ সৈতে কিছু কথা পতাত ব্যস্ত আছিল বুলি মহিলাগৰাকীয়ে সদৰি কৰিছে।
বৰুৱাৰ ফোনটোও অফ হোৱাৰ বাবে তেওঁৰ সন্ধান প্ৰক্ৰিয়া অধিক জটিল হৈছে বুলি উদ্ধাৰকাৰী দলে মত ব্যক্ত কৰিছে। আৰক্ষীয়ে বৰুৱাৰ শেষ লোকেশ্যন ট্ৰেক কৰি দেখিছে যে, উজান বজাৰৰ ব্ৰহ্মপুত্ৰৰ পাৰতে তেওঁৰ শেষ অৱস্থিতি। ইতিমধ্যে নদী আৰক্ষীয়ে ব্ৰহ্মপুত্ৰত অভিযান আৰম্ভ কৰিছে।
উক্ত বিষয়টোক লৈ মুখ্যমন্ত্ৰী ড০ হিমন্ত বিশ্ব শৰ্মাইও যথেষ্ট উদ্বিগ্নতা প্ৰকাশ কৰিছে। গুৱাহাটীৰ আৰক্ষী আয়ুক্ত দিগন্ত বৰাক কোনো ক্ৰুটি নথকাকৈ অভিযান চলাবলৈ সোমবাৰে নিশাই নিৰ্দেশ দিছে মুখ্যমন্ত্ৰীগৰাকীয়ে। শিল্পী জুবিন গাৰ্গেও ওৰে নিশা উজান বজাৰৰ ভিন্ন স্থানত ব্যক্তিগতভাৱে অভিযান চলায় বিশিষ্ট শিল্পীগৰাকীৰ সন্ধানত।
