আত্মনিৰ্ভৰশীল ভাৰত আত্মনিৰ্ভৰশীল অসমৰ শ্ল’গান দিয়া অসম চৰকাৰে ৱামূল আৰু এনডিডিবিৰ সৈতে কৰা এক ত্ৰিপাক্ষিক চুক্তিয়ে এতিয়া বিপদত পেলাইছে অসমৰ লাখ লাখ থলুৱা গো- পালকক।
যি সময়ত অসম চৰকাৰে গো-বিধেয়কৰ যোগেদি গাখীৰ উৎপাদন বৃদ্ধিৰ আঁচনি হাতত লৈছে সেই সময়তে এই চুক্তিখনে দুগ্ধ সমবায় সমিতি সমূহক ধ্বংসৰ মুখলৈ ঠেলি দিয়াৰ দিশে অগ্ৰসৰ হৈছে।
মংগল বাৰে গুৱাহাটী প্ৰেছ ক্লাৱত অনুষ্ঠিত হোৱা এক সংবাদ মেলত দ্যা আসাম ষ্টেট ক’পাৰেটিভ মিল্ক মাৰ্কেটিং ফেডাৰেশ্যন লিমিটেড চমুকৈ এএমএফইডি ৰ চেয়াৰমেন বিৰিঞ্চি কাশ্যপে অসম চৰকাৰৰ এনে পদক্ষেপক তীব্ৰ ভাষাৰে সমালোচনা কৰাৰ লগতে এই বিষয়টোত মুখ্যমন্ত্ৰীৰ হস্তক্ষেপ বিচাৰে।
সমগ্ৰ বিষয়টোৰ ওপৰত আলোকপাত কৰি চেয়াৰমেন জনে কয় যে অসমৰ থলুৱা গো-পালক সকলৰ ভৱিষ্যতৰ নীতি নিৰ্ধাৰণৰ সম্পূৰ্ণ দায়িত্ব এতিয়া গুজৰাটস্থিত এনডিডিবি নামৰ সংস্থাটোৰ হাতত অৰ্পণ কৰা হৈছে।
তেনেক্ষেত্ৰত পশু-পালন আৰু দুদ্ধ উন্নয়ন এই দুয়োটা বিভাগকে ধ্বংস কৰি পেলোৱা হৈছে বুলিও তেওঁ উল্লেখ কৰে।এই চুক্তিখন বাতিল কৰাৰ উদ্দেশ্যে এএম এফইডিয়ে বিগত সময়ত প্ৰায় চাৰি বছৰ ধৰি আন্দোলনৰ কাৰ্যসূচী গ্ৰহণ কৰি আহিছে।
এইক্ষেত্ৰত বিভাগীয় মন্ত্ৰী অতুল বৰাই সংস্থাটোৰ বিষয়-ববীয়া সকলক তেওঁলোকৰ দাবী সমূহ পূৰণ কৰাৰ প্ৰতিশ্ৰুতি দিয়াৰ লগতে তেওঁলোকক আলোচনাৰ মেজলৈ আমন্ত্ৰণ জনাইছিল।প্ৰায় ৩০ খনতকৈও অধিক মন্ত্ৰী তথা কেবিনেট পৰ্যায়ৰ মন্ত্ৰীৰ সৈতে হোৱা আলোচনাত কেনো ধৰণৰ সুফল নোপোৱাৰ পৰিপ্ৰেক্ষিতত সংস্থা টোৱে উচ্চ ন্যায়ালয়ৰ দাৰস্থ হবলৈ বাধ্য হ‘য়।
অৱশেষত এই সমগ্ৰ বিষয় টোক লৈ সংস্থা টোৰ বিষয়-ববীয়া সকলে মুখ্যমন্ত্ৰীৰ লগত আলোচনাত বহিব বিচাৰিছিল যদিও সেইয়া সম্ভৱপৰ হৈ নুঠিল।উল্লেখযোগ্য যে পৰৱৰ্ত্তী সময়ত অৰ্থাৎ দুদিন পূৰ্বে বিভাগীয় মন্ত্ৰী অতুল বৰাই অতি সংগোপনে মুখ্যমন্ত্ৰীৰ অনুমোদন লৈ এই ত্ৰিপাক্ষিক চুক্তিখন পুনৰ পাঁচ বছৰৰ বাবে নৱীকৰণ কৰা বুলি অভিযোগ আনি এতিয়া জাঙুৰ খাই উঠিছে সংস্থাটোৰ বিষয়-ববীয়া সকল।
ইয়াৰলগতে ন্যায়ালয়ত বিচাৰাধীন হৈ থকা বিষয়টোত বিভাগীয় মন্ত্ৰী আৰু মুখ্যমন্ত্ৰীয়ে কেনেদৰে অনুমোদন জনালে সেই লৈ প্ৰশ্ন তুলিছে চেয়াৰমেন গৰাকীয়ে।
ইফালে বিহাৰ আৰু ঝাৰখণ্ডৰ পৰা নিতৌ অসমলৈ গাখীৰ আমদানি কৰি অসমৰ গো-পালক সকলক আৰ্থিকভাৱে দুৰ্বল কৰা বুলি অভিযোগ আনি উক্ত সমস্যাটো শীঘ্ৰে সমাধান কৰাৰো দাবী উত্থাপন কৰে।
