এইবাৰ ৰাজ্যবাসীয়ে ক’ভিড সংক্ৰমণ নিয়ন্ত্ৰণত ৰাখি পালন কৰিব পাৰিব শাৰদীয় উৎসৱ দুৰ্গাপূজা,কালীপূজা অথবা দীপাৱলী।বিগত প্ৰায় দুটা বছৰ কোনো উৎসৱ-পাৰ্ব্বনত অংশ নোলোৱা ৰাজ্যবাসীয়ে এইবাৰ উপভোগ কৰিব পাৰিব পূজাৰ আনন্দ।
তাৰ প্ৰতি লক্ষ্য ৰাখি বুধবাৰে ৰাজ্য চৰকাৰে কেতবোৰ সৰ্তকতামূলক ব্যৱস্থা গ্ৰহণ কৰি পূজা বিশেষ নতুন এচ অ’ পি ঘোষণা কৰিছে।পূৰ্বৰ তুলনাত কিছু শিথিলতা আনিছে যদিও অন্তত এপালি প্ৰতিষেধক লোৱা লোকেহে এইবাৰ পূজাৰ মণ্ডপত প্ৰৱেশ কৰিব পাৰিব।
কেৱল মাংগলিক আনুষ্ঠানৰ বাহিৰে এইবাৰ পূজাত সকলো ধৰণৰ মেলা-সাংস্কৃতিক অনুষ্ঠান বাতিল কৰাৰ সিদ্ধান্ত গ্ৰহণ কৰা হৈছে।লগতে ব্যাহত থকা সান্ধ্য আইনৰ সময়ছোৱাত পূজাস্থলী বন্ধ ৰাখিব লাগিব।
এইক্ষেত্ৰত স্বাস্থ্যমন্ত্ৰী কেশৱ মহন্তই এই নতুন এচ অ’ পি ঘোষণা কৰি কয় যে সকলো পূজা কমিটিয়ে পূজা উদযাপনৰ বাবে জিলা প্ৰশাসনৰ পৰা আগতীয়া অনুমতি ল’ব লাগিব।
লগতে জিলা প্ৰশাসনেও পূজা কমিটি সমূহৰ সৈতে আগতীয়াকৈ বৈঠক পাতি পূজা সম্বন্ধীয় সকলো নীতি-নিৰ্দেশনা অৱগত কৰিব লাগিব।
প্ৰত্যেকখন পূজা মণ্ডপত কিমান মানুহৰ সমাগম হ’ব সেইবিষয়েও পূজা কমিটি সমূহে আগতীয়াকৈ জিলা প্ৰশাসনক আভাস দাঙি ধৰিব লাগিব।
পূজা কমিটি সমূহে অনুমতি লোৱাৰ সময়ত কমিটিৰ বিষয়-ববীয়া তথা সদস্য সকলে ক’ভিড ভেকচিন লোৱা চাৰ্টিফিকেটৰ প্ৰতিলিপি দাখিল কৰিব লাগিব।
অন্যহাতে এপালি ভেকচিন লোৱা সকলে দ্বিতীয় পালি লোৱাৰ সময় অতিক্ৰম কৰিলে সেই চাৰ্টিফিকেট গ্ৰাহ্য কৰা ন’হব।ইয়াৰোপৰি পূজা মণ্ডপ সমূহ আহল-বহল হোৱাৰ লগতে কেউফালে মুকলিমূৰীয়া ঠাই থাকিব লাগিব।
ক’ভিড বিধি মানি দৰ্শনাৰ্থীৰ মাজত শাৰীৰিক ব্যৱধান থকাৰ লগতে প্ৰৱেশ আৰু প্ৰস্থানৰ সুকীয়া ব্যৱস্থা থাকিব লাগিব। পূজা কমিটি সমূহে পূজাস্থলীত একে সময়তে জনসমাগম হ’বলৈ দিব নোৱাৰিব।
কোনো লোকৰ সন্দেহ জনক ক’ভিডৰ লক্ষণ দেখা পালে লগে লগেই জিলা প্ৰশাসনক জনাব লাগিব।সেইদৰে পূজাৰী সকলেও ক’ভিডৰ প্ৰতিষেধক লোৱা হ’ব লাগিব।লগতে দৰ্শনাৰ্থীসকলৰ ক্ষেত্ৰত এপালি হলেও ভেকচিন ল’ব লাগিব।অৱশ্যে ১৮ অনুৰ্ধ সকলৰ ক্ষেত্ৰত কোনো ধৰণৰ বাধ্য-বাধকতা নাথাকিব।
ইয়াৰোপৰি পূ্জা মণ্ডপৰ লগত জড়িত সকলো বিষয়-ববীয়া,সদস্য বা পূজাৰী সকলোৱে পূজাৰ আৰম্ভণিৰ পৰা প্ৰত্যেকেই পুনৰ ক’ভিড পৰীক্ষা কৰাতো বাঞ্চনীয়।লগতে কোনো ব্যক্তিয়ে মাস্ক পৰিধান নকৰাকৈ পূজাস্থলীলৈ আহিলে পূজা কমিটিয়ে মাস্ক যোগান ধৰিব লাগিব।
তেনেক্ষেত্ৰত পূজা কমিটিয়ে মাস্ক,ছেনিটাইজাৰ যোগান ধৰিব লাগিব।ইয়াৰলগতে পূজা কমিটিয়ে এক সু-পৰিকল্পিত বেৰিয়াৰ নিৰ্ণয় কৰিব লাগিব।একেদৰে পূজা কমিটিয়ে সম্পূৰ্ণ ক’ভিড নীতি-নিৰ্দেশনা মানি পূজা উদ্বোধনী অনুষ্ঠান বা প্ৰতিমা বিসৰ্জন পৰ্ব সম্পন্ন কৰিব লাগিব।
উল্লেখ্যযোগ্য যে প্ৰতিমা বিসৰ্জনৰ ক্ষেত্ৰত জিলা প্ৰশাসনে নিৰ্ধাৰণ কৰি দিয়া নিয়মত বা প্ৰয়োজনত দুই-তিনি দিন সময় লৈ সম্পন্ন কৰাৰ সিদ্ধান্ত ল’ব।লগতে বিসৰ্জনস্থলীত নিয়োজিত সকলো স্বেচ্ছাসেৱক আৰু শ্ৰমিক ক’ভিড প্ৰতিষেধক লোৱা হ’ব লাগিব।
এইক্ষেত্ৰত ৰাজ্যৰ স্বাস্থ্য বিভাগে ১৭ ছেপ্টেম্বৰত পৰা এলানি মেগা ভেকচিন কাৰ্যসূচী গ্ৰহণৰ সিদ্ধান্ত লৈছে।উক্ত দিনা কমেও ৭ লাখ লোকক ভেকচিন প্ৰদান কৰাৰ লক্ষ্য লোৱা হৈছে বুলিও উল্লেখ কৰে স্বাস্থ্য মন্ত্ৰীজনে।
