এগৰাকী গৰ্ভৱতী মহিলাই ৰাম, হনুমান বা শিৱজীৰ সংগ্ৰামৰ কাহিনী অধ্যয়ন কৰিব লাগে। ফলত জন্মৰ আগতেই গৰ্ভত থকা শিশুটি ভাৰতীয় সংস্কাৰৰ লগত অভ্যস্ত হৈ দেশপ্ৰেমিক হৈ উঠিব ৷ এই দাবীৰেই আৰ এছ এছৰ মহিলা শাখা ৰাষ্ট্ৰ সেৱিকা সমিতিৰ সৈতে জড়িত সংগঠন সম্বর্ধনী ন্যাসে গর্ভৱতী মহিলাৰ বাবে ‘গৰ্ভ সংস্কাৰ’ৰ কাৰ্যসূচী আৰম্ভ কৰিছে ৷
দেওবাৰে দিল্লীৰ জৱাহৰলাল নেহৰু বিশ্ববিদ্যালয়ত স্ত্ৰীৰোগ বিশেষজ্ঞৰ সৈতে হোৱা এক সন্মিলনত ‘গৰ্ভ সংস্কাৰ কাৰ্যসূচী’ৰ ৰূপৰেখা ঠিক কৰাৰ সময়তে কোৱা হৈছে যে এতিয়াৰে পৰা ন্যাসে চিকিৎসকৰ সৈতে যোগাযোগ আৰম্ভ কৰিব। চিকিৎসকসকলে যাতে গৰ্ভৱতী মহিলাক ৰাম, হনুমান বা শিৱৰ জীৱন কাহিনী পঢ়িবলৈ পৰামৰ্শ দিয়ে তাৰ বাবে আহ্বান জনাব ৷ যাতে গৰ্ভস্থ সন্তানে জন্মৰ আগতেই ভাৰতীয় সংস্কাৰ শিকিবলৈ আৰম্ভ কৰে আৰু দেশপ্ৰেমৰ ধাৰণাত অভ্যস্ত হয়। কেৱল এয়াই নহয়, গৰ্ভৱতী মহিলাক সংস্কৃত গ্ৰন্থ পঢ়িবলৈ পৰামৰ্শ দিয়াৰ লগতে গৰ্ভত হাজাৰ দিন সংস্কাৰ কৰি ‘ভাল সন্তান’ ডাঙৰ-দীঘল কৰিবলৈ পৰামৰ্শ দিয়া হৈছে।
কিন্তু ভাৰতত সংঘ শিবিৰৰ ‘দেশপ্ৰেমী আৰু সংস্কাৰবাদী শিশু’ উৎপন্ন কৰাৰ দাবীয়ে স্বাভাৱিকতে প্ৰশ্নৰ উত্থাপন কৰিছে। বহু বিৰোধীয়ে ইয়াক হিটলাৰৰ মতাদৰ্শৰ সৈতে তুলনা কৰিছে। সম্বর্ধিনী ন্যাসৰ কৰ্মশালাত ১২খন ৰাজ্যৰ প্ৰায় ৮০জন চিকিৎসকে অংশগ্ৰহণ কৰে। ইয়াৰে অধিকাংশই আছিল স্ত্ৰীৰোগ বিশেষজ্ঞ আৰু আয়ুৰ্বেদ চিকিৎসক।
বিশ্ববিদ্যালয়ৰ উপাচাৰ্য সাবিত্ৰী পণ্ডিত মুখ্য অতিথি হিচাপে আমন্ত্ৰণ জনোৱা হৈছিল যদিও তেওঁ উপস্থিত থকাৰ পৰা বিৰত থাকে ৷ ন্যাসৰ ৰাজ্যিক সম্পাদক মাধুৰী মাৰাথে দাবী কৰে যে সংস্কাৰৰ প্ৰক্ৰিয়াটো গৰ্ভাৱস্থাৰ পৰাই আৰম্ভ হ’ব পাৰে। ল’ৰা-ছোৱালীক শিকাব লাগে – সবাতোকৈ ওপৰত হৈছে দেশ। এই প্ৰসংগত তেওঁ ছাত্ৰপতি শিৱাজীৰ মাতৃ জিজাবাইৰ উদাহৰণ দাঙি ধৰে। তেওঁ কয়, “গৰ্ভৱতী মহিলাইও তেওঁৰ দৰে প্ৰাৰ্থনা কৰা উচিত — যাতে শিশুৰ মাজত হিন্দু শাসকৰ গুণৰ উন্মেষ ঘটে। গৰ্ভাৱস্থা আৰু সন্তান জন্মৰ পিছৰ দুবছৰ—অৰ্থাৎ যদি আমি হাজাৰ দিনৰ বাবে ‘গৰ্ভ সংস্কাৰ’ কৰোঁ, তেন্তে আমি পৰৱৰ্তী প্ৰজন্মক দেশপ্ৰেমিক কৰি তুলিব পাৰো, এই শিশুসকলেও নাৰীক সন্মান কৰিব।”
কৰ্মশালাত মহিলাসকলে গৰ্ভাৱস্থাত গীতা আৰু সংস্কৃত গ্ৰন্থ পঢ়িব লাগে বুলি উল্লেখ কৰে। লগতে দাবী কৰা হৈছে যে যদি ‘গৰ্ভ সংস্কাৰ’ সঠিকভাৱে কৰিব পৰা যায়, তেন্তে গৰ্ভৰ ভিতৰত থকা শিশুৰ ‘ডি এন এ’ সলনি কৰাটো সম্ভৱ।
কৰ্মশালাত ডাঃ ৰজনী মিট্টলে কয়, “আমাৰ লক্ষ্য হৈছে গৰ্ভ সংস্কাৰৰ জৰিয়তে দেশত প্ৰতি বছৰে ১০০০ টা কেঁচুৱা প্ৰসৱ কৰা। ইয়াৰ দ্বাৰা ভাৰতৰ পুৰণি গৌৰৱ ঘূৰাই আনিব পাৰে।“ তেওঁৰ যুক্তি ভাৰতত অপৰাধ বহুত বৃদ্ধি পাইছে। বহুতেই ধৰ্ষণকাৰী হৈ পৰিছে। লগতে সন্তানৰ হাতত পিতৃ-মাতৃক হত্যা কৰাৰ খবৰ পোৱা গৈছে। এনে অৱস্থাত যদি ৰামৰ দৰে সন্তান জন্ম হয়, তেন্তে মহিলাসকল নিশ্চয় সুখী হ’ব। কৰ্মশালাখনত লগতে দাবী কৰা হৈছে যে আজিকালি শিশুৰ লিংগৰ কথা চিন্তা কৰাৰ বাবেই সমকামী শিশুৰ জন্ম হৈছে।
