ফুটবল তাৰকা ক্রিষ্টিয়ানো ৰোনাল্ডো এইবাৰ চুক্তিবদ্ধ হৈছে চৌদি আৰৱৰ ক্লাব আল নাছেৰৰ সৈতে ৷ কিন্তু আল নাছেৰৰ সৈতে খেলাৰ বিনিময়ত তেওঁ কিমান পাৰিশ্ৰমিক লাভ কৰিব সেয়া শুনিলে আপোনাৰ চকু কপালত উঠিব ৷ ক্লাব আল নাছেৰৰ সৈতে সাত বছৰৰ বাবে চুক্তিবদ্ধ হোৱা ৰোণাল্ডোৱে প্ৰতি বছৰে লাভ কৰিব ১৭৭ মিলিয়ন পাউণ্ড ৷ ভাৰতীয় হিচাপত এই ধনৰ পৰিমাণ হৈছে প্ৰায় ১৭৭৬ কোটি টকা ৷প্ৰথম ডেৰ-দুবছৰ ফুটবলাৰ হিচাপে তেওঁ আল নাছেৰত থাকিব। ইয়াৰ পিছত পাঁচবাৰৰ বেলন ডি অৰ বিজয়ী পৰ্তুগীজ তাৰকাগৰাকীক ক্লাবৰ এম্বেছাদৰ হিচাপে দেখা যাব।
ৰোনাল্ডোৱে যোগদান কৰাৰ পিছত আল নাছেৰৰ জনপ্ৰিয়তা আকাশলংঘী হৈ পৰিছে ৷ চৌদি আৰৱত এই ক্লাবৰ অনুগামীৰ সংখ্যা দুগুণ বৃদ্ধি পাই ২৯ লাখ হৈছে। বৰ্তমান আল নাছেৰে ৰোনাল্ডোক আদৰিবলৈ পূৰ্ণ গতিত প্ৰস্তুতি চলাইছে । ইংলেণ্ডৰ সংবাদ মাধ্যমৰ বাতৰি অনুসৰি তাৰকা গৰাকী ৰিয়াধত নিৰাপত্তাৰক্ষীৰে আগুৰি থকা বিলাসী ঘৰত বাস কৰিব ৷
তদুপৰি কেৱল ৰোনাল্ডোৰ বাবেও ছৌদি আৰৱৰ কঠোৰ আইন শিথিল কৰা হৈছে। ক্লাবৰ শেহতীয়া ফুটবল আন্তঃগাঁথনিও নিৰ্মাণ কৰা হৈছে। লগতে পৰিয়ালটো যাতে কোনো সমস্যা নোহোৱাকৈ থাকে তাৰ প্ৰতিও বিশেষ গুৰুত্ব দিয়া হৈছে।
ৰিয়াধৰ তাপমাত্ৰা ৫০ ডিগ্ৰী চেলছিয়াছ পৰ্যন্ত হয়। ইয়াৰ লগতে প্ৰচণ্ড মৰুভূমিৰ ধুমুহাও বলে । ইয়াক প্ৰতিৰোধ কৰিবলৈ মৰুভূমিৰ চাৰিওফালে গছ ৰোৱা হৈছে । অত্যাধুনিক শ্বপিং মলও নিৰ্মাণ কৰা হৈছে। এই সমগ্ৰ পৰিকল্পনা কৰিছে ছৌদি আৰৱৰ ৰাজকুমাৰ মহম্মদ বিল চালামে ৷
ৰিয়াধৰ আল মুহাম্মাদিয়াত পৰিয়ালৰ সৈতে থাকিব ৰোনাল্ডো। য’ত চৌদি আৰৱৰ কেইবাখনো শ্ৰেষ্ঠ ৰেষ্টুৰেণ্ট আৰু নাইট ক্লাব আছে। তেওঁক আল নাছেৰৰ ২৫ হাজাৰ ক্ষমতাসম্পন্ন ষ্টেডিয়ামৰ অতি ওচৰত ৰখা হ’ব। আল নাখীলৰ কিছু দূৰত্বৰ ভিতৰতে কেইবাখনো আন্তঃৰাষ্ট্ৰীয় বিদ্যালয় আছে। পৰ্তুগালৰ ছুপাৰষ্টাৰগৰাকীৰ ল’ৰা-ছোৱালীৰ শিক্ষাৰ ব্যৱস্থা তাতেই কৰা হ’ব। ইউৰোপত যিদৰে ৰোনাল্ডো বাস কৰিছিল, সেইদৰেই আঠটা বেডৰুমৰ অট্টালিকাটোতো তেওঁৰ একেই ব্যৱস্থা থাকিব। অত্যাধুনিক ব্যক্তিগত চুইমিং পুল থাকিব। ইয়াৰ উপৰিও চৌহদৰ ভিতৰত থাকিব জিম, ক্লিনিক আৰু শ্বপিং মল। দেওবাৰে ছৌদি আৰব লীগত আল নাছেৰে আল খালিজক ১-০ গ’লত পৰাস্ত কৰে।
