দিল্লীলৈ উৰণৰ সময়তে ভয়াৱহ দূর্ঘটনাৰ পৰা কথমপি ৰক্ষা পৰিল এখন ইণ্ডিগ’ৰ বিমান ৷ চুৰাট বিমানবন্দৰৰ পৰা কিছু দূৰলৈ উৰা মৰাৰ পাছতে এটা চৰাইয়ে বিমানখনত খুন্দা মাৰে। বিমানখনৰ কোনো ক্ষতি হৈছে নেকি চাবলৈ আহমেদাবাদ বিমানবন্দৰত বিমানখনে জৰুৰী অৱতৰণ কৰে ৷দেওবাৰে ইণ্ডিগ’ এ৩২০ত সংঘটিত হয় এই দুৰ্ঘটনা। বিমানখনত ক্ৰু মেম্বাৰ বাদ দি ১৫০ জন যাত্ৰী আছিল। এই বিমানখন চুৰাট বিমানবন্দৰৰ পৰা দিল্লীলৈ যোৱাৰ কথা আছিল ৷ বিমানখনৰ যাত্ৰীসকলৰ কোনো ক্ষতি হোৱা নাই। কিন্তু চৰাইৰ খুন্দাত বিমানখনৰ ইঞ্জিন ক্ষতিগ্ৰস্ত হয়।
দেওবাৰে অসামৰিক বিমান পৰিবহণ সঞ্চালকালয়ৰ স্থানীয় তদন্তত দেখা গৈছে যে বিমানখনৰ দুই নম্বৰৰ ইঞ্জিন চৰাইৰ আঘাতত ক্ষতিগ্ৰস্ত হৈছে। সেই ইঞ্জিনৰ ফেন ব্লেডবোৰো কিছুমান ঠাইত ভাঙি গৈছিল। ফেনৰ ব্লেড মেৰামতিৰ ব্যৱস্থা কৰা হৈছে ৷
শনিবাৰেও দিল্লী অভিমুখী এখন বিমান কোচিন বিমানবন্দৰৰ পৰা উৰণৰ কিছু মুহূৰ্তৰ পিছতে ভূপাল বিমানবন্দৰত অৱতৰণ কৰা হয়। এই ঘটনাক লৈ বিমান কৰ্তৃপক্ষই দুখ প্ৰকাশ কৰি কয় যে ইণ্ডিগোৰ ৬ ই ২৪০৭ বিমানখনৰ এজন লোকৰ স্বাস্থ্যৰ হঠাৎ অৱনতি ঘটাত চিকিৎসাৰ বাবে দিল্লীলৈ যোৱাৰ পৰিৱৰ্তে ভূপাল বিমানবন্দৰত মাজভাগত অৱতৰণ কৰা হয়। ভূপালত অৱতৰণ কৰাৰ পিছত যাত্ৰীজনক লগে লগে ওচৰৰ চিকিৎসালয়লৈ লৈ যোৱা হয় বুলি বিমান সংস্থাটোৱে জানিবলৈ দিয়ে।
