জীৱনজোৰা অধ্যবসায়, পাণ্ডিত্য তথ্য গভীৰ প্রজ্ঞাৰে অসমীয়া সাহিত্য আৰু সংস্কৃতিৰ ক্ষেত্ৰখনলৈ অসামান্য অৱদান আগবঢ়োৱা বিশিষ্ট সাহিত্যিক ,শংকৰী সাহিত্যৰ বিদগ্ধ পণ্ডিত ভৱপ্ৰসাদ চলিহাৰ দেওবাৰে নিশা দেহাৱসান ঘটে ৷৪০ খনৰো অধিক গ্ৰন্থৰ ৰচনা, সম্পাদনা- অনুবাদেৰে সমৃদ্ধ কৰা বিশিষ্ট সাহিত্যিক গৰাকীৰ দেওবাৰে সন্ধিয়া গুৱাহাটী চিকিৎসা মহাবিদ্যালয় হাস্পতালত দেহাৱসান ঘটে ৷
সুদীর্ঘ ১৩-১৪ বছৰ ধৰি শয্যাশায়ী হৈ আছিল গুৱাহাটী বিশ্ববিদ্যালয়ৰ অসমীয়া বিভাগৰ প্ৰাক্তন মুৰব্বী অধ্যাপক তথা শ্রীমন্ত শংকৰদেৱ সংঘৰ প্রাক্তন উপ-পদাধিকাৰগৰাকী। অৱশ্যে শয্যাশায়ী হ’লেও মানসিকভাবে সক্রিয় হৈ থাকি সাহিত্য-সংস্কৃতিৰ চৰ্চা আৰু প্রজ্ঞাৰ সাধনাত ব্রতী হৈ আছিল শ্রীমন্ত শংকৰদের বঁটা বিজয়ী সাহিত্যিক-অধ্যাপক ভৱপ্রসাদ চলিহাই।
জীবন কালত অসমীয়া, ইংৰাজী আৰু সংস্কৃত ভাষাত ৪০ খনবো অধিক গ্রন্থ ৰচনা, সম্পাদনা আৰু অনুবাদেৰে সাহিত্য- সংস্কৃতিৰ ক্ষেত্ৰখনলৈ বহুমূলীয়া অবদান আগবঢ়াইছিল প্রজ্ঞাৰ সাধকগবাকীয়ে। উল্লেখযোগ্য যে ভরপ্রসাদ চলিহাব জন্ম সুবিধাৰ হৈছিল ডিব্ৰুগড় জিলাৰ নাহৰকটীয়াত ১৯৩৪ চনৰ ২০ আগষ্টত। ১৯৫৩ চনত নাহৰকটীয়া হাইস্কুলৰ পৰা মেট্ৰিক আৰু ১৯৫৫ চনত কানৈ কলেজৰ পৰা আই এ পৰীক্ষাত উত্তীর্ণ হৈছিল। দুয়োবাৰে সংস্কৃতত সর্বোচ্চ নম্বৰ লাভ কৰিছিল। ১৯৫৭ চনত কানৈ কলেজৰ পৰা বি এ উত্তীর্ণ হোৱাব লগতে ১৯৬৪ আৰু ১৯৬৭ চনত গুৱাহাটী বিশ্ববিদ্যালয়ৰ পৰা দুবাৰকৈ এম এ পৰীক্ষাত উত্তীর্ণ হোৱাৰ উপৰি ১৯৬৭ চনত এল এল বি পৰীক্ষাতো উত্তীর্ণ হয়। ১৯৫৫ চনতে তেওঁ প্রযায়ী নাহৰকটীয়া হাইস্কুলত অস্থায়ীভাবে শিক্ষকতা কৰি কর্মজীৱন আৰম্ভ কৰিছিল। পৰৱৰ্তী পর্যায়ত ১৯৬০-৬১ চনত গুৱাহাটী বিশ্ববিদ্যালয়ৰ কৃষ্ণকান্ত সন্দিকৈ গ্রন্থাগাৰত চাকৰি কৰাৰ উপৰি ১৯৬১- ১৯৬৯ চনৰ সময়ছোৱাত বিশ্ববিদ্যালয়খনৰ দ্বাৰা পৰিচালিত সংস্কৃত মহাভাৰতৰ অসমীয়া অনুবাদক হিচাপে যোগদান কৰিছিল।
১৯৬৯ চনত তেওঁ গুৱাহাটী বিশ্ববিদ্যালয়ত অসমীয়া বিভাগত অধ্যাপক হিচাপে যোগদান কৰে আৰু ১৯৯৯ চনত গুৱাহাটী বিশ্ববিদ্যালয়ৰ অসমীয়া বিভাগৰ চিত্ৰ মুৰব্বী অধ্যাপক হিচাপে অৱসৰ গ্ৰহণ কৰে। পিচত তেওঁ বিশ্ববিদ্যালয়খনত অতিথি অধ্যাপক হিচাপেও কিছুদিন কার্যনির্বাহ কৰিছিল। দেশ- বিদেশৰ বিভিন্ন কাকত-আলোচনীত তেওঁৰ ৩০০ৰো অধিক প্রবন্ধ প্রকাশ পাইছে। সংস্কৃত-অসমীয়া অভিধানৰ তেওঁ অন্যতম সংকলক আছিল। সামাজিক জীবনতো তেওঁ বিভিন্ন সংগঠনৰ সৈতে জড়িত হৈ আছিল। এইবোৰৰ ভিতৰত শ্রীমন্ত শংকৰদেৱ সংঘৰ উপ-পদাধিকাৰ, অসম একাডেমীৰ উপ-সভাপতি, অসম পুথিভঁৰাল সংঘৰ সভাপতি, অসম চৰকাৰৰ পৰিভাষা সমিতিৰ উপ-সভাপতি আদি উল্লেখযোগ্য।
তেওঁ ২০০৪ চনত অসম চৰকাৰৰ পৰা সাহিত্যিক পেন্সন লাভ কৰাৰ লগতে সেই বৰ্ষতে চন্দ্রকান্ত হীৰাপ্রভা স্মাৰক বঁটা, ২০১৩ চনত শশীচন্দ্র বৰবৰুৱা স্মাৰক বঁটা, ২০১৪ চনত কামৰূপ মহানগৰ জিলা সাহিত্য সভাৰ পৰা ‘প্রজ্ঞাৰত্ন’ সম্মান লাভ কৰিছিল।
