অসমৰ সংবাদসেৱাৰ জগতখনলৈ অনৱদ্য অৱদান আগবঢ়োৱা জ্যেষ্ঠ সাংবাদিক অনিল বৰুৱাৰ মঙলবাৰে দেহাৱসান ঘটে ৷ গুৱাহাটীৰ নেমকেয়াৰ হাস্পতালত তেওঁ শেষ নিশ্বাস ত্যাগ কৰে ৷ মৃত্যুৰ সময়ত তেওঁৰ বয়স আছিল ৮৪ বছৰ ৷ হৃদৰোগত আক্ৰান্ত হোৱাৰ পাছতে তেওঁক হাস্পতালত ভর্ত্তি কৰোৱা হৈছিল ৷
অনিল বৰুৱাৰ জন্ম হৈছিল ১৯৩৯ চনৰ ২৪ ডিচেম্বৰত দেৰগাঁৱত ৷ পিতৃ আছিল ভৱেন্দ্ৰনাথ বৰুৱা ৷ মাতৃ আছিল নলিনী বৰুৱা ৷ যোৰহাটৰ পৰা স্কুলীয়া শিক্ষা গ্ৰহণ কৰিছিল তেওঁ ৷ ১৯৫৫ চনত গুৱাহাটী বিশ্ব বিদ্যালয়ৰ অধীনত অনুষ্ঠিত হোৱা মেট্ৰিক পৰীক্ষাত ৰাজ্যৰ দুগৰাকী পৰীক্ষাৰ্থীয়ে অসমীয়াত লেটাৰ মাৰ্ক লাভ কৰিছিল। তাৰে এজন আছিল অনিল বৰুৱা আৰু আনজন আছিল ড০ হীৰেন গোঁহাই।
পৰৱর্তীসময়ত যোৰহাটৰ বৰভেটাত আৰম্ভ হোৱা কৃষি কলেজত অভিভাৱকে নাম লগাই দিছিল অনিল বৰুৱাক। কৃষি বিজ্ঞান পাঠ্যক্ৰমত নামভৰ্তি কৰিলেও তেওঁৰ এই বিষয়টোৰ প্ৰতি আগ্ৰহ নাছিল। যাৰ বাবে তেওঁ কৃষি বিজ্ঞানী পাঠ্যক্ৰম অধাতে এৰি মাৰ্ঘেৰিটা পাব্লিক হাইস্কুলত শিক্ষক হিচাপে যোগদান কৰে । অৱশ্যে কিছুদিন পাছতে তেওঁ শিক্ষকতা এৰি দৈনিক জনমভূমি কাকতত প্ৰুফ ৰিডাৰ হিচাপে যোগদান কৰে ৷ পৰৱর্তী সময়ত সেই কাকততে তেওঁ উপ –সম্পাদক হিচাপে কাম কৰিবলৈ আৰম্ভ কৰে ৷
১৯৬৫ চনৰ ৪ আগষ্টত জন্ম লাভ কৰা ’দৈনিক অসম’ কাকতত প্ৰথমৰে পৰাই প্ৰথমজনা সম্পাদক কীৰ্তিনাথ হাজৰিকাৰ নেতৃত্বত সংবাদসেৱা কৰি শেহত সম্পাদকৰূপে অৱসৰ গ্ৰহণ ৷ অতি নীৰৱে সংবাদ ক্ষেত্ৰখনত ৬৮ বছৰৰো অধিক কাল সেৱা আগবঢ়াইছিল এইগৰাকী প্ৰৱীণ সাংবাদিকে। তেওঁৰ মৃত্যু অসমৰ সংবাদ জগত,অসমৰ সমাজ জীৱন সকলোৰে বাবে বিৰাট ক্ষতি।
তেওঁ লিখাসমূহ বৰ বাস্তৱ আৰু চিন্তামুখী আছিল। কোনো কথা কবলৈ তেওঁ ভয় নকৰিছিল। দৈনিক অসম’ৰ লগতে ’অসম বাণী’ আৰু অৱসৰৰ পাছত আন কাকততো ’চুই যাওঁ’ তথা আন শিৰোনামেৰে স্তম্ভলেখা লিখিছিল৷ ১৯৮৫ চনত স্বাক্ষৰিত অসম চুক্তিৰ তীব্ৰ বিৰোধিতা কৰাসকলৰ ভিতৰত অনিলদা অন্যতম আছিল৷ আনহাতে অসমীয়া ভাষাৰ ক্ষেত্ৰতো অনিলদাৰ বিস্ময়কৰ দখল আছিল আৰু সচৰাচৰ বাতৰিৰ পৰিৱেশনত বহুল ব্যৱহৃত ভালেমান সামাজিক-ৰাজনৈতিক-অৰ্থনেতিক আৰু বৈজ্ঞানিক ক্ষেত্ৰৰ ইংৰাজী শব্দৰ অসমীয়া প্ৰতিশব্দ নিৰ্মাণত অনিলদা তথা সহযোগী সাংবাদিকসকলৰ যথেষ্ট অৰিহনা আছিল৷
