গুৱাহাটীৰ ৰূপ নগৰস্থিত মিডিয়া ট্ৰাষ্টৰ সভাকক্ষত কালি উত্তৰ পূৰ্বাঞ্চলৰ খিলঞ্জীয়া জাতি-জনগোষ্ঠীৰ অংশগ্ৰহণৰে অসম দিৱস ( চুকাফা দিৱস) উদযাপন কৰা হয় । ইণ্ডিজেনাচ পিপুলচ অৱ মুং-ডুন-চুন-খাম, আছাম, নৰ্থ ইষ্ট ইণ্ডিয়াৰ উদ্যোগত ব্যতিক্ৰমী ৰূপত উদযাপিত এই অনুষ্ঠানৰ আৰম্ভণিতে চাওফা চাও লুং চুকাফাৰ প্ৰতিছবিত পুষ্পাঞ্জলী আৰু বডোফা উপেন্দ্ৰনাথ ব্ৰহ্মৰ প্ৰতি মূৰ্তিৰ সন্মুখত বন্তি প্ৰজ্বলন কৰা হয় । ইয়াৰ পিছত উত্তৰ পূৰ্বাঞ্চলৰ আমন্ত্ৰিত খিলঞ্জীয়া জনগোষ্ঠীৰ প্ৰতিনিধিৰ উপস্থিতিত বহু প্ৰত্যাশিত ঘূৰণীয়া মেজ মেল আৰম্ভ হয় ।
ড. ৰাণা কুমাৰ চাংমাইৰ সঞ্চালনাত অনুষ্ঠিত এই মেজমেলত অসম, ত্ৰিপুৰা, মণিপুৰ আৰু নাগালেণ্ডৰ বিভিন্ন খিলঞ্জীয়া গোষ্ঠীৰ প্ৰতিনিধিয়ে অংশগ্ৰহণ কৰি উত্তৰ-পূব ভাৰতৰ জাতি-জনগোষ্ঠী আৰু খিলঞ্জীয়া জনগোষ্ঠীৰ সন্মুখত থকা জ্বলন্ত সমস্যাসমূহ উত্থাপন কৰে ।
অসমৰ পৰা সংযুক্ত বডো পিপলছ ফেডাৰেচন, সদৌ অসম কোচ ৰাজবংশী সন্মিলনী, সোণোৱাল কছাৰী সমাজ, বডো সম্প্ৰদায়ৰ মহিলা প্ৰতিনিধি, জাতীয়তাবাদ পুনৰ নিৰ্মাণ সমিতি, অসমৰ মেইটেই সম্প্ৰদায়, অসমৰ কুকি কল্যাণ সমিতিৰ প্ৰতিনিধি আৰু কেইবাজনো বুদ্ধিজীৱীয়ে অংশগ্ৰহণ কৰে । অংশগ্ৰহণকাৰী সকলে ইউএনডিআৰআইপি -২০০৭ৰ ওপৰত ভিত্তি কৰি আলোচনাত অংশগ্ৰহণ কৰি উত্তৰ পূৰ্বাঞ্চলৰ খিলঞ্জীয়াসকলৰ বিভিন্ন সমস্যা সমূহৰ সন্দৰ্ভত আলোকপাত কৰে।
সকলো প্ৰতিনিধিয়ে সৰ্বসন্মতিক্ৰমে এই মতামত প্ৰকাশ কৰে যে উত্তৰ পূৰ্বাঞ্চলৰ খিলঞ্জীয়া জনগোষ্ঠীসমূহে সন্মুখীন হোৱা বেছিভাগ সমস্যাৰ সমাধান ৰাষ্ট্ৰসংঘৰ খিলঞ্জীয়া জনগোষ্ঠীৰ অধিকাৰ চনদ২০০৭ ( UNDRIP-2007) ভিত্তিত সমাধান কৰিব পাৰিব । উত্তৰ ভাৰতৰ খিলঞ্জীয়া জনগোষ্ঠীৰ খিলঞ্জীয়া সংজ্ঞা স্পষ্ট কৰি এই সংজ্ঞাক সাংবিধানিক স্বীকৃতি দিবলৈ কেন্দ্ৰীয় চৰকাৰে অনিচ্ছা প্ৰকাশ কৰাৰ বাবে সন্মিলনে অসন্তুষ্টি প্ৰকাশ কৰে । সংগঠনৰ উপাধ্যক্ষ ড০ ৰাণা কুমাৰ চাংমাইৰ দ্বাৰা পৰিচালিত সন্মিলনত নিম্নলিখিত প্ৰস্তাৱসমূহ গ্ৰহণ কৰা হয়।
১) খিলঞ্জীয়া জনগোষ্ঠীৰ সকলো জৰুৰী সমস্যাৰ সমাধানৰ বাবে ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত এক সংযুক্ত মঞ্চ গঠন কৰা আৰু এই ক্ষেত্ৰত প্ৰক্ৰিয়াটো ক্ষিপ্ৰ কৰিবলৈ এখন তদৰ্থ সমিতি গঠন কৰা।
২) সন্মিলনে কেন্দ্ৰীয় চৰকাৰক মণিপুৰত স্থায়ী শান্তি অনাৰ উদ্দেশ্যে সঠিক ভাবে কাৰ্য্য পৰিকল্পনা আৰম্ভ কৰিবলৈ আহ্বান জনায় আৰু মণিপুৰৰ সকলো সম্প্ৰদায়ক শান্তিপূৰ্ণ সহ-অৱস্থান আৰু ভাতৃত্ববোধ বজাই ৰাখিবলৈ আহ্বান জনায় ।
৩) মণিপুৰৰ সাহায্য শিবিৰত এতিয়াও বসবাস কৰা সকলৰ বাবে গৰম কাপোৰ, লাইভ শ্বেভিং ড্ৰাগছ আৰু অন্যান্য অত্যাৱশ্যকীয় সামগ্ৰী দান কৰিবলৈ উত্তৰ পূৰ্বাঞ্চলৰ সকলো জনগোষ্ঠীকে সন্মিলনে আহ্বান জনাইছে ।
ৰাইজে এনেধৰণৰ যিকোনো অনুদানৰ বাবে অসম উত্তৰ-পূব ভাৰতৰ মুং-দুন-চুন-খামৰ খিলঞ্জীয়া জনগোষ্ঠীৰ প্ৰধান সম্পাদক অনুপ আৰান্ধৰা (৯১০১৮-৪১৫৫৪, ৯৪০১৯-৩৪২৬২)ৰ সৈতে যোগাযোগ কৰিব পাৰে ।
৪) কক বৰক ভাষাৰ বাবে ৰোমান লিপিৰ ব্যৱহাৰক আনুষ্ঠানিক স্বীকৃতি দিবলৈ ত্ৰিপুৰা চৰকাৰক কঠোৰ আহ্বান জনাইছে সন্মিলনে ।
কুকি আৰু মেইটেই জনগোষ্ঠীৰ প্ৰতিনিধিসকলে, ভাতৃত্ববোধ আৰু শান্তিৰ মনোভাৱেৰে ইজনে সিজনক আকোৱালি লৈ সভাখনত অন্ত পেলোৱাৰ কাৰণে অনুষ্ঠানটিয়ে এক ইতিবাচক বাৰ্তা প্ৰেৰণ কৰে ।
