৮ বছৰ পূৰ্বে মালয়েছিয়া এয়াৰলাইন্সৰ এম এইচ ৩৭০ বিমানখন ২৩৯ জন লোকৰ সৈতে দূর্ঘটনাত পতিত হৈছিল ৷ ব্ৰিটিছ প্ৰেছে দাবী কৰিছিল যে বয়িং ৭৭৭ বিমানখনৰ পাইলটে ধ্বংস কৰিছিল। বিমানখনৰ ধ্বংসাৱশেষৰ পৰা পোৱা নতুন প্ৰমাণ পৰীক্ষা কৰাৰ পিছত বিশেষজ্ঞসকলেও একেই ইংগিত প্ৰদান কৰিছে ৷
মালয়েছিয়া এয়াৰলাইন্সৰ বিমান এমএইচ৩৭০ৰ বিমান দূর্ঘটনা বয়িং ৭৭৭ ইতিহাসৰ আটাইতকৈ ভয়াৱহ দুৰ্ঘটনা হিচাপে বিবেচিত হৈ আহিছে । বিমান সংস্থাটোৰ ইতিহাসৰ অন্যতম বৃহৎ দুৰ্ঘটনা বুলি গণ্য কৰা হয়।
২০১৪ চনৰ ৮ মাৰ্চত কুৱালালামপুৰৰ পৰা বেইজিং বিমানবন্দৰলৈ বিমান এমএইচ৩৭০ ৰাওনা হয়। উৰণৰ পৰা প্ৰায় ৩৮ মিনিটৰ ভিতৰতে ইয়াৰ সৈতে এয়াৰ ট্ৰেফিক কণ্ট্ৰ’লে যোগাযোগ কৰে। সেই সময়ত বিমানখন দক্ষিণ চীন সাগৰৰ ওপৰেৰে উৰি আছিল। কেইছেকেণ্ডমানৰ পিছতে বিমানখনৰ সৈতে এ টি চিৰ যোগাযোগ হেৰুৱাই পেলায়।
কিন্তু এঘণ্টাৰ পাছত মালয়েছিয়াৰ সেনাবাহিনীৰ ৰাডাৰে বিমানখন ধৰা পেলায়। কিন্তু সেই সময়ত নির্দিষ্ট পথত চলি থকা নাছিল বিমানখন। তাৰ পৰিৱৰ্তে বিমানখনে পৰিকল্পিত গতিপথৰ পৰা পশ্চিম দিশলৈ বিচ্যুত হৈ মালয় উপদ্বীপ আৰু আন্দামান সাগৰৰ ওপৰেৰে পাৰ হৈ যায়। ৰাডাৰৰ পৰা ওলাই অহাৰ পিছত চিৰদিনৰ বাবে নোহোৱা হৈ গ’ল বিমান এমএইচ৩৭০। চালকসহ ২২৭ জন যাত্ৰী আৰু ১২ জন কৰ্মচাৰী নিহত হয় । ইয়াৰ ভিতৰত ভাৰতৰ পৰা অহা ৫ জন যাত্ৰীও আছিল।
বিমানখনৰ সন্ধানত মালয়েছিয়া চৰকাৰে দক্ষিণ চীন সাগৰ আৰু আন্দামান সাগৰত অনুসন্ধান অভিযান আৰম্ভ কৰে। কিন্তু ফ্লাইট এম এইচ ৩৭০ৰ কিছু অংশ পোৱা গৈছে যদিও বেছিভাগ ধ্বংসাৱশেষ পোৱা হোৱা নাই। অসামৰিক বিমান পৰিবহণৰ ইতিহাসৰ আটাইতকৈ ব্যয়বহুল অভিযান কাৰ্যতঃ বিফল হৈছিল।
উপগ্ৰহৰ জৰিয়তে বিমানখনৰ স্বয়ংক্ৰিয় যোগাযোগ ব্যৱস্থাৰ পৰীক্ষাত বিমানখন দক্ষিণ ভাৰত মহাসাগৰত দুৰ্ঘটনাগ্ৰস্ত হ’ব পাৰে বুলি জানিব পৰা গৈছে। কিন্তু দুৰ্ঘটনাৰ কাৰণ সম্পৰ্কে কোনো স্পষ্ট তথ্য পোহৰলৈ অহা নাই ৷
৮ বছৰৰ পাছত দুৰ্ঘটনাৰ কাৰণ সন্দৰ্ভত নতুনকৈ দাবী উত্থাপন হৈছে। ব্ৰিটিছ কাকত “ইণ্ডিপেণ্ডেণ্ট”ৰ তথ্য অনুসৰি, ২৫ দিন পূৰ্বে মাদাগাস্কাৰত এজন মাছমৰীয়াৰ ঘৰত বিমানখনৰ ১টা লেণ্ডিং গিয়াৰ উদ্ধাৰ কৰা হৈছিল। ব্ৰিটিছ প্ৰেছৰ তথ্য অনুসৰি বয়িং ৭৭৭ বিমানখন সাগৰত পৰি লেণ্ডিং গিয়াৰ তললৈ নমাই দিয়া হৈছিল। তাৰ পৰাই বিশেষজ্ঞসকলৰ মতে ইচ্ছাকৃতভাৱে বিমানখন দুৰ্ঘটনাগ্ৰস্ত কৰা হৈছিল বুলি আশংকা কৰা হৈছে ৷
ব্ৰিটিছ অভিযন্তা ৰিচাৰ্ড গডফ্ৰেৰ দৰে বিমান এমএইচ৩৭০ ৰ ধ্বংসাৱশেষ বিচাৰি আমেৰিকান অনুসন্ধানকাৰী ব্লেইন গিবছনে দাবী কৰিছে যে বিমানখন ইচ্ছাকৃতভাৱে ইয়াৰ পাইলটসকলে ধ্বংস কৰিছিল। বিশেষজ্ঞসকলে দাবী কৰিছে যে বিমানখনৰ লেণ্ডিং গিয়াৰৰ দুৱাৰ পৰীক্ষা কৰিলেই বিমানখন ধ্বংস হোৱাৰ প্ৰথম ইংগিত প্ৰমাণ হৈ পৰে।
ব্ৰিটিছ প্ৰেছৰ মতে, ২০১৭ চনত মাদাগাস্কাৰৰ উপকূলত লেণ্ডিং গিয়াৰৰ দুৱাৰখন টাটালি নামৰ এজন মাছমৰীয়াই উদ্ধাৰ কৰিছিল। মাদাগাস্কাৰত ‘ফাৰ্নাণ্ডো’ নামৰ উপকূলীয় ধুমুহাই দুৱাৰখন পাৰলৈ উটুৱাই লৈ আহিছিল ৷লেণ্ডিং গিয়াৰৰ দুৱাৰখন যে মালয়েছিয়াৰ বিমানৰ অংশ সেই কথা টাটালিৰ কোনো ধাৰণা নাছিল। মাছমৰীয়াৰ পত্নীয়ে সেইখন পাঁচ বছৰ ধৰি ৱাশ্বিং বৰ্ড হিচাপে ব্যৱহাৰ কৰি আহিছিল।
ব্ৰিটিছ সংবাদ মাধ্যমৰ আগত গডফ্ৰেই কয় যে লেণ্ডিং গিয়াৰৰ দুৱাৰৰ চাৰিওফালে ফাটি যোৱা আৰু ক্ষতিৰ পৰিসৰৰ পৰা অনুমান কৰিব পাৰি যে বিমানখন লাহে লাহে সাগৰত ডুব যোৱা নাছিল। বৰং বিমানখন অতি তীব্ৰ বেগত পানীত খুন্দা মাৰিছিল। ইয়াক এনেদৰে পেলাই দিয়া হৈছিল যে বিমানখন যিমান পাৰি সিমান টুকুৰা টুকুৰ হৈ পৰে ৷
ব্ৰিটিছ প্ৰেছৰ বিশেষজ্ঞসকলে দাবী কৰিছে যে অত্যন্ত তীব্ৰ গতিৰ আঘাতৰ বাবে বিমানখন যিমান পাৰি দ্ৰুতগতিত ছিন্নভিন্ন হৈ পৰিছিল। আনহাতে, দুৰ্ঘটনাৰ প্ৰমাণ লুকুৱাবলৈ চেষ্টা কৰা হৈছিল সেয়া লেণ্ডিং গিয়াৰ পৰীক্ষা কৰিলে স্পষ্ট হৈ পৰে।
