ঔষধৰ বৰ্ধিত মূল্যই ৰোগীসকলক বা তেওঁলোকৰ পৰিয়ালবৰ্গৰ লগতে সাধাৰণ ৰাইজকো যথেষ্ট জলা-কলা খুৱাই আহিছে ৷ অৱশ্যে এই ক্ষেত্ৰত এইবাৰ ঔষধ ক্ৰেতা সকলৰ বাবে এক ভাল খবৰ ৷ ঔষধৰ মূল্য নিয়ন্ত্ৰণ কৰা এন. পি. পি. এ অৰ্থাৎ নেশ্যনেল ফাৰ্মাচিউটিকেল প্ৰাইচিং অথৰিটিয়ে ১২৮ টা ঔষধৰ মূল্যৰ সৰ্বোচ্চ মূল্য নিৰ্ধাৰণ কৰিছে।
অৰ্থাৎ এতিয়াৰ পৰা কোম্পানীয়ে এই ঔষধবোৰ ইয়াতকৈ বেছি দামত বিক্ৰী কৰিব নোৱাৰিব।এই সন্দৰ্ভত ৰাষ্ট্ৰীয় ঔষধ মূল্য নিৰ্ধাৰণ কৰ্তৃপক্ষই এক অধিসূচনা জাৰি কৰি কয় যে তালিকাত অন্তৰ্ভুক্ত ১২৮বিধ ঔষধ প্ৰস্তুত কৰা কোম্পানীয়ে চৰকাৰে নিৰ্ধাৰণ কৰা মূল্যত নিজৰ সামগ্ৰী বিক্ৰী কৰিব লাগিব।ইতিমধ্যে এন.পি.পি.এ.ই ১২৮টা এন্টিবায়’টিক আৰু এন্টিভাইৰেল প্ৰস্তুতিৰ মূল্য সংশোধন কৰিছে। ইয়াৰ ভিতৰত এমোক্সিচিলিন, ক্লেভুলেনিক এচিড, এন্টিবায়’টিক বেজী, ভ্যাংক’মাইচিন, হাঁপানীত ব্যৱহৃত ছালবুটামল, কেন্সাৰ ঔষধ ট্ৰাষ্টুজুমেব, বিষ নিৰাময়কাৰী আইবুপ্ৰ’ফেন আৰু জ্বৰৰ ঔষধ পেৰাচিটামল আদি উল্লেখযোগ্য।
নিউজ ১৮ হিন্দীৰ এক প্ৰতিবেদন অনুসৰি এই অধিসূচনাত উল্লেখ কৰা হৈছে যে এমোক্সিচিলিনৰ এটা কেপচুলৰ সৰ্বোচ্চ মূল্য ২.১৮ টকা, চিট্ৰিজেনৰ এটা টেবলেটৰ সৰ্বোচ্চ মূল্য ১.৬৮ টকা আৰু ইবুপ্ৰফেনৰ এটা টেবলেট ১.০৭ টকাত বিক্ৰী কৰা হ’ব। অৰ্থাৎ এই ঔষধসমূহ এন. পি. পি. এ.য়ে নিৰ্ধাৰণ কৰা সৰ্বোচ্চ মূল্যতকৈ কম মূল্যত বিক্ৰী কৰিব পাৰিব। কোনো কাৰণতে এই সৰ্বোচ্চ পৰিমাণতকৈ অধিক ধন ল’ব নোৱাৰিব।
পূৰ্বে ৬৫০ মিলিগ্ৰামৰ পেৰাচিটামল টেবলেটৰ সৰ্বোচ্চ মূল্য আছিল ২.৩০ টকা, যিটো এতিয়া ১.৮০ টকা কৰা হৈছে। একেদৰে পেৰাচিটামল কম্বিনেচন থকা ঔষধৰ দামো হ্ৰাস কৰা হৈছে। একেদৰে এমোক্সিচিলিন আৰু পটাছিয়াম ক্লেভুলেনেটৰ সংমিশ্ৰিত ঔষধৰ মূল্য ২২.৩ টকাৰ পৰা ১৬.৮ টকালৈ হ্ৰাস কৰা হৈছে। পূৰ্বে মক্সিফ্ল’ক্সাচিন ৪০০ মিলিগ্ৰামৰ মূল্য ৰেহাইৰ পিছত ৩১.৫ টকাত বিক্ৰী হৈছিল, এতিয়া এই ঔষধৰ সৰ্বোচ্চ মূল্য হ’ব ২২.৮ টকা। একে সময়তে ডায়েবেটিছৰ ঔষধৰ মূল্য হ্ৰাস কৰাৰ প্ৰচেষ্টাও কৰা হৈছে।
বিজনেছ ষ্টেণ্ডাৰ্ডৰ তথ্য অনুসৰি এন পি পি এয়ে ১২টা অধিসূচিত কম্বিনেচনৰ সৈতে ঔষধৰ খুচুৰা মূল্যও নিৰ্ধাৰণ কৰিছে। অধিসূচনা অনুসৰি ডায়েবেটিছত ব্যৱহৃত গ্লিমেপিৰাইড, ভগ্লিব’জ আৰু মেটফৰ্মিনৰ সংমিশ্ৰণ থকা টেবলেটৰ সৰ্বোচ্চ মূল্য ১৩.৮৩ টকা নিৰ্ধাৰণ কৰা হৈছে। একেদৰে পেৰাচিটামল, ফেনাইলফ্ৰিন হাইড্ৰক্লৰাইড, ডাইফেনহাইড্ৰামাইন হাইড্ৰক্লৰাইড আৰু কেফেইন কম্বিনেচন যুক্ত ঔষধৰ খুচুৰা মূল্য ২.৭৬ টকা নিৰ্ধাৰণ কৰা হৈছে।
