২০২১ বর্ষৰ ১৫ আগষ্টত আফগানিস্তান পুনৰ দখল কৰে তালিবানে। ইয়াৰ পাছতে নাগৰিকে ভয়তে সেই দেশৰ পৰা পলায়ন কৰিবলৈ ধৰিলে। বিগত ডেৰ বছৰত তালিবান শাসনৰ অধীনত দেশখনত বহু নিষেধাজ্ঞা আৰোপ কৰা হৈছে। আফগানিস্তানৰ পৰিস্থিতিত সমগ্ৰ বিশ্বই আতংকিত হৈ পৰিছে। এই পৰিপ্ৰেক্ষিতত আফগানিস্তানৰ প্ৰতি বিশ্বৰ ধাৰণা সলনি কৰিবলৈ তৎপৰ হৈ পৰিছে তালিবান নেতৃত্ব। আৰু প্ৰথম পদক্ষেপ হিচাপে তালিবান চৰকাৰে নিৰ্মাণ কৰিছে এখন নতুন ছুপাৰকাৰ।
চিকচিকিয়া গাড়ীখন আকর্ষণীয়াৱে নির্মাণ কৰা হৈছে ৷আফগানিস্তানৰ তালিবান চৰকাৰে এনে এখন আধুনিক ছুপাৰকাৰ নিৰ্মাণৰ কথা ঘোষণা কৰিছে। সেই দেশত প্ৰথমবাৰৰ বাবে থলুৱা প্ৰযুক্তি ব্যৱহাৰ কৰি ছুপাৰকাৰ নিৰ্মাণ কৰা হৈছে। ছুপাৰকাৰখনৰ নাম দিয়া হৈছে ‘মাডা ৯’। অহা কেইসপ্তাহমানৰ ভিতৰত গাড়ীখনৰ মৌলিক মডেলৰ নির্মাণ সম্পূৰ্ণ হ’ব।তাৰ পিছতহে এই আধুনিক গাড়ীখন জনসাধাৰণৰ মাজলৈ অনা হ’ব। তালিবান চৰকাৰে কয় যে কাটাৰত অনুষ্ঠিত হ’বলগীয়া প্ৰদৰ্শনীত এই ছুপাৰকাৰখনে আত্মপ্ৰকাশ কৰিব।
এই গাড়ীখন যোৱা ৫ বছৰ ধৰি নিৰ্মাণৰ কাম চলি আছে। কাবুলৰ আফগানিস্তান টেকনিকেল ভকেচনেল ইনষ্টিটিউটে ‘এণ্টপ’ নামৰ কোম্পানী এটাৰ সৈতে যৌথভাৱে নিৰ্মাণ কৰিছে এই গাড়ীখন।
এই গাড়ীখন কেনেকুৱা হ’ব? বৈশিষ্ট্যসমূহ কি কি? ‘মাডা ৯’ হৈছে এখন ‘মিড ইঞ্জিন ছুপাৰকাৰ’। ইয়াত টয়োটা ক’ৰ’লা ইঞ্জিন ব্যৱহাৰ কৰা হৈছে। এই ধৰণৰ ইঞ্জিন তীব্ৰ গতিৰ বাবে নিৰ্মাণ কৰা হয়। এ টি ভি আইৰ মুৰব্বী গুলাম হাইদৰ শ্বাহমেটে কয় যে এই ইঞ্জিনটো এনেদৰে নিৰ্মাণ কৰা হৈছে যাতে গাড়ীখন তীব্ৰ বেগত চলিব পাৰে।
ছুপাৰকাৰৰ চেছিছ (গাড়ীৰ তলৰ গঠন) টিউব আকৃতিৰ। চেছিছটো বেছি গধুৰ নহয়। গাড়ীখন নিৰ্মাণৰ বাবে ব্যৱহাৰ কৰা সকলো উপাদান লঘু। ই ছুপাৰকাৰৰ গঠন ফৰ্মুলা ১ ৰেচ গাড়ীত ব্যৱহাৰ কৰা টিউবুলাৰ চেছিছৰ দৰেই।
এই ছুপাৰকাৰখন পাহাৰীয়া অঞ্চলতো চলিব পাৰিব । আফগানিস্তানৰ পাহাৰীয়া অঞ্চলত পৰীক্ষা কৰা হৈছে ‘মাডা ৯’ ছুপাৰকাৰ। অভিযন্তাসকলে গাড়ীখন পৰীক্ষা কৰিছে। অৱশ্যে সেই মুহূৰ্তৰ কোনো ভিডিঅ’ মুকলি হোৱা নাই।
আফগানিস্তানৰ প্ৰথমখন ছুপাৰকাৰৰ মূল্যও আকাশলংঘী। ভাৰতত ‘লেমবৰ্গিনি হুৰাকান’, ‘অ’ডি আৰ ৮’ৰ দৰে ছুপাৰকাৰৰ দাম কোটি কোটি টকাৰ ওপৰত। ‘মাদা ৯’ ছুপাৰকাৰৰ দাম কোটি টকাতকৈও অধিক। এই ছুপাৰকাৰৰ দাম ২-৪ কোটি হ’ব পাৰে বুলি ধাৰণা কৰা হৈছে।
এনটপ কোম্পানীৰ চিইঅ’ মহম্মদ ৰেজা আহমদীয়ে কয় যে এই বাহনখনৰ জৰিয়তে আফগানিস্তানে আন্তঃৰাষ্ট্ৰীয় ক্ষেত্ৰখনত প্ৰভাৱ পেলাব। কিন্তু এই গাড়ীখন কেতিয়া উদ্বোধন হ’ব, সেয়া ঠিক কৰা হোৱা নাই। প্ৰথম অৱস্থাত এই গাড়ীখন কেৱল আফগানিস্তানতহে উপলব্ধ হ’ব। আগন্তুক দিনত এই ছুপাৰকাৰখনে বিশ্বৰ আন আন দেশত উপস্থিত হ’ব।
এণ্টপৰ কমেও ৩০ জন অভিযন্তাই গাড়ীখনৰ কাম কৰি আছে। গাড়ীৰ হেডলাইটত এল ই ডি লাইট ব্যৱহাৰ কৰা হয়। অনাগত দিনত ইলেক্ট্ৰিক ছুপাৰকাৰ হিচাপে নিৰ্মাণ হ’ব পাৰে ‘মাডা ৯’।
ছুপাৰকাৰৰ ছবিখন প্ৰথমে ৰাজহুৱা কৰিছিল তালিবানৰ উচ্চ শিক্ষা মন্ত্ৰী আব্দুল বাকি হাক্কানীয়ে। গাড়ীৰ ৰং ক’লা। ছুপাৰকাৰখনৰ ফটো আৰু ভিডিঅ’ পোহৰলৈ আহিছে। গাড়ীখন দেখাত স্প’ৰ্টছ গাড়ীৰ দৰে। তালিবানৰ মুখপাত্ৰ জাবিহুল্লাহ মুজাহিদে ছ’চিয়েল মিডিয়াত গাড়ীখনৰ ছবি প্ৰকাশ কৰে। তেওঁ কয় যে এই গাড়ীখন সমগ্ৰ দেশৰ বাবে এক সন্মান।
প্ৰসংগক্ৰমে ২০২১ চনৰ ১৫ আগষ্টত আফগানিস্তানৰ ক্ষমতা দখল কৰাৰ পিছত তালিবানে আশ্বাস দিছিল যে তেওঁলোকে এখন উন্নয়নশীল দেশ গঢ়ি তুলিব। কিন্তু অতীতৰ তালিবান-ৰাজৰ ভয়াবহ স্মৃতিৰ বাবে সমগ্ৰ বিশ্বই আফগানসকলৰ ভৱিষ্যতক লৈ চিন্তিত হৈ পৰিছে। এই পৰিপ্ৰেক্ষিতত বিশেষজ্ঞসকলৰ মতে এই ছুপাৰকাৰৰ সৃষ্টি তালিবানৰ বাবে এক প্ৰত্যাহ্বান ৷
