গোটেই বছৰজুৰি অসমলৈ পৰ্যটকক আকৰ্ষিত কৰাৰ উদ্দেশ্যৰে কাজিৰঙাৰ গেলেকী মিকিৰ গাঁৱত এইবাৰ অনুষ্ঠিত কৰিবলৈ লোৱা হৈছে বৰশী বোৱা প্ৰতিযোগিতা। অহা ২৮ জুলাইত গেলেকী মিকিৰ গাঁৱৰ ‘ছেৰেনিটি পুখুৰী পাৰ’ নামৰ ফাৰ্ম এখনত এই প্ৰতিযোগিতা অনুষ্ঠিত হ’ব। ইয়াৰ লগতে ‘ছেৰেনটি পুখুৰী পাৰ’ত পৰ্যটক আৰু আগ্ৰহী সকলৰ বাবে প্ৰতি দিনাই বৰশী বোৱাৰ সুবিধা মুকলি কৰা হ’ব বুলি প্ৰতিযোগিতাখনৰ মূল আয়োজক অভিজিৎ গগৈয়ে জানিবলৈ দিয়ে।
এই প্ৰতিযোগিতাত নগদ ধনৰ পুৰস্কাৰৰ বিপৰীতে কেতবোৰ পেকেজ আগবঢ়োৱা হৈছে। সেই অনুসৰি প্ৰতিযোগিতাত প্ৰথম পুৰস্কাৰ বিজয়ীয়ে কাজিৰঙাৰ বিলাসী হোটেলত পৰিয়াল সৈতে দুটা নিশা কটোৱাৰ সুযোগ লাভ কৰিব। লগতে সকলো খাদ্য আৰু কাজিৰঙা ৰাষ্ট্ৰীয় উদ্যানত দুটা ছাফাৰী বিনামূলীয়াকৈ লাভ কৰিব। প্ৰতিযোগীৰ বৰশীত লগা মাছৰ ওজনৰ ওপৰত ভিত্তি কৰি মুঠ ১০টা পুৰস্কাৰ আগবঢ়োৱা হ’ব। আঘোণ হ’মষ্টে আৰু ছেৰেনিটি পুখুৰী পাৰৰ যৌথ উদ্যোগত আৰু স্থানীয় কেইবাগৰাকীও উদ্যমী ব্যক্তিৰ সহযোগত এই প্ৰতিযোগিতা অনুষ্ঠিত কৰিবলৈ লোৱা হৈছে।
উল্লেখ্য যে আঘোণ হ’মষ্টেৰ উদ্যোগত কাজিৰঙাৰ গেলেকী মিকিৰ গাঁৱত বিগত ৫ মে’ৰ পৰা পৰ্যটকৰ বাবে ট্ৰেকিঙৰ সুবিধা আৰম্ভ কৰা হৈছিল। ইতিমধ্যে দেশ-বিদেশৰ বহু পৰ্যটকে এই ট্ৰেকিঙত অংশগ্ৰহণ কৰিছে। গাঁওখনৰ ট্ৰেকিঙৰ লগতে পক্ষী নিৰীক্ষণ আৰু বয়োজ্যেষ্ঠ লোক সকলৰ কাৰণে নেচাৰ ৱাকৰো সুবিধা আছে।
অভিজিৎ গগৈয়ে কয় যে কাজিৰঙালৈ প্ৰতি বছৰে কেইবা লাখ দেশী-বিদেশী পৰ্যটক আহে যদিও সেয়া বছৰৰ ছটা মাহৰ ভিতৰতে সীমাৱদ্ধ। আনহাতে জীপ আৰু হাতী ছাফাৰী তথা অৰ্কিড পাৰ্ক ফুৰিবলৈ যোৱাৰ বাহিৰে পৰ্যটকে কৰিব পৰা আন কোনো কাম নাই। গতিকে গৰিষ্ঠ সংখ্যক পৰ্যটকেই কাজিৰঙাত এটা বা দুটা ৰাতিহে কটাই। যাৰ ফলত যথেষ্ঠ সম্ভাৱনা থকা স্বত্বেও কাজিৰঙাৰ অধিকাংশ লোক তথা দৰিদ্ৰ লোকসকল পৰ্যটনৰ পৰা লাভাম্বিত হ’ব পৰা নাই। আনহাতে পৰ্যটন উদ্যোগটো মূলত কাজিৰঙা ৰাষ্ট্ৰীয় উদ্যান কেন্দ্ৰীক হৈ থকাৰ বাবে ৰাষ্ট্ৰীয় উদ্যানখনৰ বহনক্ষমতাৰ প্ৰতিও এটা সময়ত ভাবুকি আহি পৰিব। গতিকে কাজিৰঙা ৰাষ্ট্ৰীয় উদ্যানৰ ওপৰত পৰ্যটকৰ বোজা হ্ৰাস কৰাৰ লগতে কাজিৰঙালৈ ফুৰিবলৈ অহা লোকে অন্তত ৩ বা ৪ দিন কটাব পৰাকৈ গোটেই বছৰজুৰি পৰ্যটকৰ বাবে কিবা মনোৰঞ্জন আৰু অভিজ্ঞতা আহৰণৰ ব্যৱস্থা কৰিলে পৰ্যটন উদ্যোগৰ পৰা কাজিৰঙাৰ যথেষ্ঠ পৰিমাণে উপকৃত হ’ব। ট্ৰেকিং, পক্ষী নিৰীক্ষণ, বয়োজ্যেষ্ঠ লোক সকলৰ বাবে নেচাৰ ৱাক আৰু শেহতীয়া ভাৱে ছেৰেনিটি পুখুৰী পাৰত গোটেই বছৰজুৰি বৰশী বোৱাৰ সুবিধাৰ ফলত কাজিৰঙালৈ ফুৰিবলৈ অহা পৰ্যটক সকলৰ বাবে আন এটা আকৰ্ষণ বৃদ্ধি পাব। অহা ২৮ জুলাইত অনুষ্ঠিত হ’বলগীয়া এই প্ৰতিযোগিতাত অংশগ্ৰহণৰ অন্তিম দিন ২৫ জুলাই। আগ্ৰহী সকলে www.aaghun.com ৱেবছাইটত প্ৰতিযোগিতাৰ বাবে পঞ্জীয়ন কৰিব পাৰিব। এই প্ৰতিযোগিতাৰ লগে লগে কাজিৰঙাত এখন বছৰজোৰা বৰশী বোৱা টূৰ্ণামোন্টৰো শুভাৰম্ভ কৰা হ’ব। ২০২৫ বৰ্ষৰ জুলাই মাহৰ তৃতীয় দেওবাৰলৈ এই টূৰ্ণামেন্ট অব্যাহত থাকিব। আগ্ৰহী সকলে নিজৰ সুবিধা মতে পঞ্জীয়ন কৰি বছৰৰ যিকোনো এটা দিনত আহি বৰশী বাই এই টূৰ্ণামেন্টত অংশগ্ৰহণ কৰিব পাৰিব। এবাৰ পঞ্জীয়ন কৰি গোটেই বছৰটোত তেঁও নিজ ইচ্ছামতে যিমান বাৰ ইচ্ছা কৰে বৰশী বাব পাৰিব। প্ৰতি বাৰতে তেঁও নতুনকৈ পঞ্জীয়ন কৰাৰ প্ৰয়োজন নাই। মাথো ‘ছেৰেনিটি পুখুৰী পাৰ’ত বৰশী বোৱাৰ যি নিৰ্ধাৰত মূল্য সেয়া আদায় দিব লাগিব। বছটোত বৰশীত লগা আটাইতকৈ ডাঙৰ মাছটোৰ ওজনৰ ওপৰত ভিত্তি কৰি ৫ গৰাকী প্ৰতিযোগীকক বিশেষ আকৰ্ষণীয় পুৰস্কাৰ আগবঢ়োৱা হব। ইয়াৰ মাজত বিদেশ ভ্ৰমণৰো সুবিধা থাকিব। অংশগ্ৰহণকাৰী সকলে অনলাইনযোগে প্ৰতি দিনাই ফলাফলৰ আপডেট লাভ কৰিব। ২৮ জুলাইত অনুষ্ঠিত হবলগীয়া প্ৰথম কাজিৰঙা বৰশী বোৱা প্ৰতিযোগিতাত অংশগ্ৰহণ কৰা সকলে এই টূৰ্ণামেন্টত বিনামূলীয়াকৈ পঞ্জীয়নৰ সুবিধা লাভ কৰিব।
