কেন্দ্ৰীয় গৃহমন্ত্ৰী অমিত শ্বাহে আমেৰিকা আৰু ইজিপ্ত ভ্ৰমণ কৰি ঘৰলৈ উভতি অহাৰ পিছত প্ৰধানমন্ত্ৰী নৰেন্দ্ৰ মোডীক মণিপুৰৰ সাম্প্ৰতিক পৰিস্থিতিৰ বিষয়ে অৱগত কৰে। যদিও এই সন্দৰ্ভত আনুষ্ঠানিকভাৱে একো ঘোষণা কৰা হোৱা নাই, তথাপিও চৰকাৰী সূত্ৰৰ জৰিয়তে এই খবৰ প্ৰকাশ পাইছে ৷
তিনিদিনীয়া আমেৰিকা আৰু দুদিনীয়া ইজিপ্ত ভ্ৰমণ সমাপ্ত কৰি দেওবাৰে দেশলৈ উভতি আহে প্ৰধানমন্ত্ৰীগৰাকী। আনহাতে দেওবাৰেও মণিপুৰৰ হিংসাত্মক ঘটনা সংঘটিত হোৱাৰ খবৰ পোৱা গৈছিল। দেওবাৰে সন্ধিয়া শ্বাহে মণিপুৰৰ মুখ্যমন্ত্ৰী এন বীৰেণ সিঙৰ সৈতে বৈঠকত মিলিত হয়। শনিবাৰে বিয়লি মণিপুৰত অনুষ্ঠিত সৰ্বদলীয় বৈঠকৰ সভাপতিত্ব কৰে শ্বাহে। বৈঠকৰ অন্তত এটা টুইটত বীৰেন সিঙে কয় যে মণিপুৰৰ পৰিস্থিতি চম্ভালিবলৈ কেন্দ্ৰীয় চৰকাৰ আৰু ৰাজ্য চৰকাৰ ‘সক্ষম’। তেওঁ লগতে কয় যে ১৩ জুনৰ পৰা ৰাজ্যখনত হিংসাত্মক পৰিস্থিতিৰ বাবে কোনো লোকৰ মৃত্যুৰ খবৰ পোৱা নাই।
পিছত সংবাদ মাধ্যমৰ সন্মুখত মণিপুৰৰ মুখ্যমন্ত্রীগৰাকীয়ে কয়- “ৰাজ্যৰ সকলো বিধায়ক, ৰাজনৈতিক দলৰ প্রতিনিধি, নাগৰিকৰ মঞ্চৰ সৈতে আলোচনা কৰা হয় ৷”লগতে মণিপুৰৰ পৰিস্থিতিৰ সৈতে মোকাবিলা কৰিবলৈ কেন্দ্ৰীয় গৃহমন্ত্ৰীয়ে ৰাজ্য় চৰকাৰৰ কাষত থিয় দিয়াৰ আশ্বাস দিছে বুলিও তেওঁ কয়। মুখ্যমন্ত্ৰী গৰাকীয়ে ৰাজ্যৰ সাম্প্ৰতিক পৰিস্থিতিৰ বিষয়েও বিশদ প্ৰতিবেদন শ্বাহক অৰ্পণ কৰে।
বিজেপি নেতৃত্বাধীন চৰকাৰখনৰ প্ৰতি মণিপুৰৰ জনসাধাৰণৰ বিশ্বাস হেৰাই গৈছে বুলি অভিযোগ উত্থাপন কৰিছে বিৰোধী দলে ৷ এনে পৰিস্থিতিত ৰাজ্যত ৰাষ্ট্ৰপতিৰ শাসন বলবৎ কৰাৰ দাবী উত্থাপন কৰিছে । অৱশ্যে শনিবাৰৰ সৰ্বদলীয় বৈঠকত শ্বাহে ৰাজ্যত জৰুৰীকালীন অৱস্থাৰ সম্ভাৱনাক খাৰিজ কৰে। বৰঞ্চ ৰাজ্যৰ বিজেপি চৰকাৰৰ ওপৰত বিশ্বাস ৰখাৰ ওপৰত গুৰুত্ব আৰোপ কৰে। দেওবাৰৰ বৈঠকৰ কথা উল্লেখ কৰি এন বীৰেণ সিঙে টুইট কৰি কয় –“ ৰাজ্যৰ শান্তিৰ বাবে আমাৰ কাম-কাজ শক্তিশালী কৰিবলৈ কেন্দ্ৰীয় গৃহমন্ত্ৰীয়ে আমাক পৰামৰ্শ দিছে।“ সূত্ৰ অনুসৰি শ্বাহে মণিপুৰত হিংসা ৰোধৰ বাবে কেন্দ্ৰই গ্ৰহণ কৰা পদক্ষেপৰ বিষয়ে বিতংভাৱে প্ৰধানমন্ত্ৰীক জনায়।
