দলৱদ্ধ ধর্ষণ কৰি এগৰাকী কিশোৰীক হত্যা কৰা অভিযোগ সন্দর্ভত মন্তব্য কৰি বিতর্কৰ আৱর্তত সোমাই পৰিছে পশ্চিমবংগৰ মুখ্যমন্ত্ৰী মমতা বেনার্জী ৷ মমতা বেনাৰ্জীয়ে সোমবাৰে প্ৰকাশ কৰিছিল যে দলৱদ্ধ ধর্ষণৰ বলি হোৱা নাদিয়া জিলাৰ হাঞ্চখালিৰ নৱম শ্ৰেণীৰ ছাত্ৰীগৰাকীক কোনোবাই চৰিওৱাৰ ফলত বাগৰি পৰি মৃত্যু হৈছিল । ইয়াৰ পাছতে ৰাষ্ট্ৰীয় মহিলা আয়োগৰ (এনচিডব্লিউ) মুৰব্বী ৰেখা শৰ্মাই বংগৰ মুখ্যমন্ত্ৰী মমতা বেনাৰ্জীক নাদিয়া দলবদ্ধ ধৰ্ষণৰ ঘটনা সন্দৰ্ভত শেহতীয়াকৈ কৰা মন্তব্যক সমালোচনা কৰে। মমতা বেনার্জীৰ ভাষ্যক “দুৰ্ভাগ্যজনক” বুলি অভিহিত কৰি এনচিডব্লিউৰ অধ্যক্ষগৰাকীয়ে কয়, “এগৰাকী মহিলা হোৱাৰ বাবে, তেওঁ আন এগৰাকী মহিলাৰ বেদনা বুজি পোৱা উচিত। উল্লেখ্য যে অভিযুক্তজনৰ সৈতে প্ৰেমৰ সম্পৰ্ক থকাৰ কথা সন্দেহ কৰি বেনাৰ্জীয়ে এক অনুষ্ঠানত কয়, “আৰক্ষীয়ে এতিয়াও মৃত্যুৰ কাৰণ বুজি পোৱা নাই। মই তেওঁলোকক সুধিছিলো। আপুনি ইয়াক ধৰ্ষণ বুলি ক’ব নে তেওঁ গৰ্ভৱতী আছিল? এয়া প্ৰেমৰ সম্পৰ্কৰ পৰিণতি আছিল নেকি? আপুনি এইবোৰৰ বিষয়ে সোধা-পোছা কৰিছে নেকি? এয়া এক দুৰ্ভাগ্যজনক ঘটনা।”
ভুক্তভোগীগৰাকীৰ পৰিয়ালে কন্যা গৰাকীৰ মৃত্যুৰ পাঁচ দিন পিছত কিয় অভিযোগ দাখিল কৰিছিল বুলি প্ৰশ্ন কৰি মুখ্যমন্ত্ৰী গৰাকীয়ে লগতে কয়, “আপুনি (ছোৱালীজনীৰ পৰিয়ালে) মৃতদেহটোৰ অন্তিম সংস্কাৰ কৰিলে। আৰক্ষীয়ে প্ৰমাণ ক’ৰ পৰা পাব যে তেওঁক ধৰ্ষণ কৰা হৈছিল নে গৰ্ভৱতী আছিল বা আন কোনো কাৰণ আছিল যেনে তাইক কোনোবাই চৰ মাৰিছিল,যাৰ পিছত তেওঁ অসুস্থ হৈ পৰিছিল।” যোৱা ৫ এপ্ৰিলত অভিযুক্তৰ ঘৰত এটা জন্মদিনৰ পাৰ্টিত দলবদ্ধ ধৰ্ষণ কৰাত নৱম শ্ৰেণীৰ ছাত্ৰীগৰাকীৰ মৃত্যু হোৱা বুলি অভিযোগ উত্থাপিত হৈছিল । মমতা বেনাৰ্জীৰ মন্তব্যক বিৰোধীয়ে কঠোৰ সমালোচনা কৰিছে ৷ জ্যেষ্ঠ বিজেপি নেতা তথা পশ্চিম বংগৰ দলটোৰ সহ-ভাৰপ্ৰাপ্ত বিষয়া অমিত মালৱীয়ই কয়, “তেওঁ ভুক্তভোগীগৰাকীক প্ৰশ্ন কৰে আৰু সুধিছে যে এইটো এটা প্ৰেমৰ সম্পৰ্ক আছিল নে অপৰিকল্পিত গৰ্ভধাৰণৰ ঘটনা ? কিয়নো অভিযুক্তজন তৃণমুলনেতাৰ পুত্ৰ।”
