প্ৰদেশ যুৱ কংগ্ৰেছৰ সভানেত্ৰীৰ দায়িত্বত অংকিতা দত্ত

অসম প্ৰদেশ যুৱ কংগ্ৰেছৰ সভাপতি হিচাপে নতুনকৈ দায়িত্ব প্ৰদান কৰা হৈছে অংকিতা দত্তক ৷ নিখিল ভাৰত যুৱ কংগ্ৰেছ কমিটীয়ে এক নির্দেশনাৰ জৰিয়তে তেওঁক এই দায়িত্ব অর্পণ কৰিছে ৷ নতুনকৈ দায়িত্বপ্ৰাপ্ত অংকিতা দত্ত হৈছে প্ৰদেশ কংগ্ৰেছৰ প্ৰাক্তন সভাপতি তথা প্ৰাক্তন মন্ত্ৰী প্ৰয়াত অঞ্জন দত্তৰ কন্যা ৷ তেওঁ গুৱাহাটী বিশ্ববিদ্যালয়ৰ পৰা পি এইচ ডি ডিগ্ৰী লাভ কৰাৰ লগতে আইনৰ স্নাতক ৷ বিগত বিধানসভা নির্বাচনত আমগুৰি সমষ্টিৰ পৰা কংগ্ৰেছৰ প্ৰার্থী হিচাপে অংকিতাই প্ৰতিদ্বন্দিতা কৰি পৰাজিত হৈছিল ৷ আনহাতে, ৰাতুল পাটোৱাৰীক প্ৰদেশ যুৱ কংগ্ৰেছৰ কার্যকৰী সভাপতিৰ দায়িত্ব অর্পণ কৰা হৈছে ৷ অংকিতা দত্ত হৈছে দেশৰ ৰাজ্যসমূহৰ ভিতৰত যুৱ কংগ্ৰেছৰ সভাপতিৰ দায়িত্ব লাভ কৰা একমাত্ৰ মহিলা ৷