আজি ৰসৰাজ লক্ষ্মীনাথ বেজবৰুৱাৰ স্মৃতি দিৱস । আধুনিক অসমীয়া ভাষা-সাহিত্যৰ বৰভেটি গঢ়োতাসকলৰ অন্যতম লক্ষ্মীনাথ বেজবৰুৱা আছিল’জোনাকী যুগ’ৰ ত্ৰিমূৰ্তিৰ এগৰাকী । তেওঁ আছিল একাধাৰে কবি, নাট্যকাৰ, হাস্যৰসিক, গল্পকাৰ আৰু সমালোচক । ঊনবিংশ শতিকাৰ শেষৰ ফালে হেমচন্দ্ৰ গোস্বামী আৰু চন্দ্ৰ কুমাৰ আগৰৱালাৰ সৈতে লগ লাগি তেওঁ কলিকতাত গঠন কৰিছিল অসমীয়া ভাষা উন্নতি সাধিনী সভা । তেওঁ জোনাকী আৰু বাঁহী আলোচনীৰ সম্পাদনাও কৰিছিল । সাহিত্যৰথী বুলিও জনাজাত বেজবৰুৱা আছিল অসমৰ জাতীয় সংগীত ‘অ’ মোৰ আপোনাৰ দেশ’ৰ স্ৰষ্টা । তেওঁ উপন্যাস, সাধুকথা, ধেমেলীয়া নাট, বুৰঞ্জীমূলক নাট, জীৱনী, কবিতা আদি বিভিন্ন বিষয়ৰ অনেক গ্ৰন্থ অসমীয়া সাহিত্য জগতক উপহাৰ দি গৈছে ।১৯২৪ চনত গুৱাহাটীত অনুষ্ঠিত অসম সাহিত্য সভাৰ সপ্তম অধিৱেশনত তেওঁ সভাপতিত্ব কৰিছিল । ১৯৩৮ চনৰ আজিৰ দিনটোতে তেওঁৰ পৰলোক গমন ঘটে । অসমীয়া সাহিত্যৰ কাণ্ডাৰীগৰাকীক আমাৰ সশ্ৰদ্ধ প্ৰণাম ।
আজি বিশিষ্ট সাহিত্যিক মিত্ৰদেৱ মহন্তৰ স্মৃতি দিৱস । তেওঁ আছিল একাধাৰে অভিনেতা, নাট্যকাৰ, গীতিকাৰ, শিক্ষক আৰু ধৰ্মাধিকাৰ । চন্দ্ৰহাৰ, অসমীয়া ধৰ্মাচাৰ্যৰ উপাধি, গুৰুচক্ৰ, ভূৰুকাত হাতী আদি তেওঁ ৰচনা কৰা গ্ৰন্থ । তেওঁৰ ধেমেলীয়া নাট ‘বিয়া বিপৰ্যয়’ আৰু ‘কুকুৰীকণাৰ আঠমঙলা’ অতি জনপ্ৰিয় হৈছিল । তেওঁ কেইবাখনো গ্ৰামফোন ৰেকৰ্ডতো কণ্ঠদান কৰিছিল । অভিনয়ত সুদক্ষ মহন্তই ‘পোনাকণ’ নামৰ চলচ্চিত্ৰখনতো অভিনয় কৰিছিল । অসম সাহিত্য সভাৰ সৈতে জন্মলগ্নৰে পৰাই জড়িত হৈ থকা মহন্তই ১৯৬৪ চনত ডিগবৈত অনুষ্ঠিত অসম সাহিত্য সভাৰ অধিবেশনত সভাপতিত্ব কৰিছিল । তেওঁ অসম সাহিত্য সভাৰ উদ্বোধনী গীত ‘চিৰ চেনেহী মোৰ ভাষা জননী’ৰ স্ৰষ্টা । সংগীত নাটক একাডেমী বঁটা লাভ কৰা মহন্তক অসম সাহিত্য সভাই ‘সাহিত্যাচাৰ্য’ উপাধিৰে সন্মানিত কৰে । ১৯৮৩ চনৰ আজিৰ দিনটোতে তেওঁ ইহসংসাৰৰ পৰা বিদায় লয় । এইগৰাকী বিশিষ্ট ব্যক্তিলৈ আমাৰ প্ৰণাম ।
