আজি শিক্ষাবিদ, সাহিত্যিক তথা মুক্তিযুঁজাৰু পদ্মধৰ চলিহাৰ স্মৃতি দিৱস । তেওঁ আছিল একাধাৰে এগৰাকী কবি, অভিনেতা, সংগীতজ্ঞ আৰু নাট্যকাৰ । তেওঁ আছিল শিৱসাগৰ কলেজৰ প্ৰতিষ্ঠাপক অধ্যক্ষ । অসমীয়া ভাষা-সাহিত্যৰ নীৰৱ সাধক পদ্মধৰ চলিহাই তিনিখন গীতৰ পুথি, তিনিখন কবিতা পুথি, দুখন নাট, এখন ধেমেলীয়া নাট, তিনিখন প্ৰবন্ধ পুথি, এখন সম্পাদনা গ্ৰন্থ আৰু এখন আত্মজীৱনীমূলক গ্ৰন্থ লিখি থৈ গৈছে । ১৯৫৮ চনত তিনিচুকীয়াত অনুষ্ঠিত অসম সাহিত্য সভাৰ অধিৱেশনত তেওঁ সভাপতিত্ব কৰিছিল । অসম ছাত্ৰ সন্মিলনৰো তেওঁ প্ৰথমগৰাকী সম্পাদক আছিল । ১৯৬৯ চনৰ আজিৰ দিনটোতে তেওঁৰ পৰলোকপ্ৰাপ্তি ঘটিছিল । এইগৰাকী সাহিত্যিকলৈ আমাৰ প্ৰণাম ।
আজি বিশিষ্ট গায়ক তথা সুৰকাৰ খগেন মহন্তৰ স্মৃতি দিৱস । তেওঁ বিহুক জনপ্ৰিয় কৰাত বিশেষ ভূমিকা লোৱা বাবে তেওঁক বিহু সম্ৰাট বুলি কোৱা হয় । তেওঁ আকাশবাণী গুৱাহাটীৰ এগৰাকী বিষয়া আছিল । তেওঁ মেঘমুক্তি, মইনাজান আদি চলচ্চিত্ৰৰ গীততো কণ্ঠদান কৰিছিল । শকুন্তলা চলচ্চিত্ৰত তেওঁ অভিনয়ো কৰিছিল । এইগৰাকী শিল্পীয়ে ভাৰত চৰকাৰৰ সংগীত নাটক একাডেমী বঁটা লাভ কৰে ।সুকণ্ঠী গায়িকা অৰ্চনা মহন্ত তেওঁৰ পত্নী আছিল । নৱ প্ৰজন্মৰ জনপ্ৰিয় কণ্ঠশিল্পী অংগৰাগ পাপন মহন্ত তেওঁৰ পুত্ৰ । ১৯১৪ চনৰ আজিৰ দিনটোতে তেওঁৰ দেহাৱসান ঘটে । শিল্পীগৰাকীলৈ আমাৰ প্ৰণাম ।
আজি অসমৰ ভ্ৰাম্যমাণ থিয়েটাৰৰ জনক অচ্যুত লহকৰৰ স্মৃতি দিৱস । তেওঁ আছিল ভ্ৰাম্যমাণ থিয়েটাৰৰ জন্মদাতা, নাট্যকাৰ, চলচ্চিত্ৰ নিৰ্মাতা তথা আলোচনীৰ সম্পাদক । তেওঁ বৰপেটা জিলাৰ পাঠশালাত প্ৰথম অসমীয়া ভ্ৰাম্যমাণ নাট্যদল নটৰাজ থিয়েটাৰৰ জন্ম দিছিল । তেওঁ এৰিণা, অজেয় ভিয়েটনাম, ব্লেকমাণি, আল্লা-ঈশ্বৰ আদি কেইবাখনো নাটক ৰচনা কৰিছিল ।তেওঁৰ একমাত্ৰ অনুবাদ গ্ৰন্থ আন্না কাৰেনিনা । তেওঁৰ একে নামৰ মঞ্চনাটৰ কাহিনীৰ আধাৰত তেওঁ ব্লেকমাণি নামৰ এখন অসমীয়া চলচ্চিত্ৰ প্ৰযোজনা আৰু পৰিচালনা কৰিছিল । তেওঁ দীপাৱলী নামৰ এখন আলোচনীও সম্পাদনা কৰিছিল । তেওঁ কমল কুমাৰী ৰাষ্ট্ৰীয় বঁটা আৰু অতুল চন্দ্ৰ হাজৰিকা বঁটা লাভ কৰিছিল । ২০১৬ চনৰ আজিৰ দিনটোতে তেওঁ নৰনাটৰ সামৰণি মাৰে । এইগৰাকী পুৰোধা ব্যক্তিলৈ আমাৰ প্ৰণাম ।
