আজি পুৱা গুৱাহাটী মহানগৰীৰ গড়চুক আৰক্ষী চকীৰ ওচৰত গড়চুক আৰক্ষীয়ে ৩০কিলোগ্ৰামতকৈ অধিক গাঞ্জা সহ এজন লোকক আটক কৰিবলৈ সক্ষম হয় ৷ আৰক্ষীৰ বাতৰি অনুসৰি গাঞ্জাখিনি গুৱাহাটী অভিমুখে অবৈধ ড্ৰাগছ কঢ়িয়াই অনা এখন বোলেৰ’ গাড়ীৰ পৰা জব্দ কৰা হৈছে।
নিৰ্দিষ্ট তথ্যৰ ভিত্তিত গড়চুক আৰক্ষীয়ে গড়চুক আৰক্ষী চকিৰ ওচৰত গাড়ীখন আটক কৰে আৰু তালাচী চলাই বাহনখনৰ তলৰ তিনিটা চেম্বাৰৰ পৰা গাঞ্জাখিনি জব্দ কৰে। জব্দ কৰা বাহনখনৰ পঞ্জীয়ন নম্বৰ জেএইচ ০৫ বিআৰ ২১৪১। ড্ৰাগছখিনি অবৈধভাৱে আগৰতলাৰ পৰা গুৱাহাটী হৈ বিহাৰলৈ সৰবৰাহ কৰা হৈছিল বুলি আৰক্ষী সূত্ৰই জানিবলৈ দিছে।
আনহাতে গড়চুক আৰক্ষীয়ে গ্ৰেপ্তাৰ কৰা চোৰাং ব্যৱসায়ীজন অসমৰ মানকাচাৰৰ বাসিন্দা মুকতাদুল আমিন বুলি চিনাক্ত কৰা হৈছে। বৰ্তমান আৰক্ষীয়ে মুকতাদুল আমিনৰ জেৰা অব্যাহত ৰাখিছে।
