আজি বিশিষ্ট চলচ্চিত্ৰ প্ৰযোজক তথা পৰিচালক নিপ বৰুৱাৰ স্মৃতি দিৱস । তেওঁৰ সংগীত আৰু ফুটবলৰ প্ৰতিও বিশেষ ৰাপ আছিল । কাৰ্টুনিষ্ট হিচাপেও তেওঁৰ খ্যাতি আছিল । দ্য আছাম ট্ৰিবিউন কাকতত তেওঁ কাৰ্টুন আঁকিছিল । অসমীয়া চলচ্চিত্ৰ জগতখনলৈ তেওঁৰ বিশেষ অৱদান আছিল । তেওঁৰ পৰাই আৰম্ভ হয় অসমীয়া চলচ্চিত্ৰৰ ব্যৱসায়িক উত্তৰণৰ যুগ । ‘স্মৃতিৰ পৰশ’ নামৰ চলচ্চিত্ৰখনৰ জৰিয়তে তেওঁ চলচ্চিত্ৰ জগতখনত পদাৰ্পণ কৰিছিল । আজলী নবৌ, ‘ককাদেউতা, নাতি আৰু হাতী’, মাক আৰু মৰম, ‘শকুন্তলা আৰু শংকৰ যোছেফ আলী’, ৰঙা পুলিচ, বৰুৱাৰ সংসাৰ, আই মোৰ জনমে জনমে, এণ্টনী মোৰ নাম আদি তেওঁৰ জনপ্ৰিয় অসমীয়া চলচ্চিত্ৰ । দাদু, নাতি ও হাতী তেওঁৰ একমাত্ৰ বাংলা চলচ্চিত্ৰ । ১৯৯২ চনৰ আজিৰ দিনটোতে তেওঁৰ মৃত্যু হয় । এইগৰাকী চলচ্চিত্ৰ কাণ্ডাৰীলৈ আমাৰ প্ৰণাম ।
আজি প্ৰসিদ্ধ চলচ্চিত্ৰ পৰিচালক তথা সংগীত পৰিচালক পদুম বৰুৱাৰ স্মৃতি দিৱস । তেওঁ ডঃ লক্ষ্মীনন্দন বৰাৰ ১৯৬২ চনত প্ৰকাশিত উপন্যাস ‘গঙাচিলনীৰ পাখি’ৰ কাহিনীভাগ লৈ চিত্ৰনাট্য লিখি একে নামেৰে ১৯৭৬ চনত এখন চলচ্চিত্ৰ নিৰ্মাণ কৰি উলিয়ায় । এই চলচ্চিত্ৰখনতেই বীণা বাৰুৱাতীয়ে নায়িকাৰ চৰিত্ৰত অভিনয় কৰি চলচ্চিত্ৰ জগতখনলৈ আহিছিল । ২০০৬ চনৰ আজিৰ দিনটোতে তেওঁৰ দেহাৱসান ঘটে । বিশিষ্ট পৰিচালকগৰাকীলৈ আমাৰ প্ৰণাম ।
আজি বিশিষ্ট কবি হৰেকৃষ্ণ ডেকাৰ ওপজা দিন । ১৯৪৩ চনৰ আজিৰ দিনটোতে তেওঁৰ জন্ম হৈছিল । ভাৰতীয় আৰক্ষী সেৱাৰ অৱসৰপ্ৰাপ্ত বিষয়া হৰকৃষ্ণ ডেকা এগৰাকী চুটিগল্পকাৰ হিচাপেও খ্যাত । তেওঁ ‘গৰীয়সী’ আলোচনী আৰু ‘দ্য ছেণ্টিনেল’ কাকতৰো সম্পাদক আছিল । ৰামধেনু আলোচনীৰ যোগেদি সাহিত্য জগতত আত্মপ্ৰকাশ কৰা হৰেকৃষ্ণ ডেকাৰ কবিতা পুথি সয়ম্বৰ, ৰাতিৰ শোভাযাত্ৰা, ভালপোৱাৰ বাবে এষাৰ, সানমিহলি বৰ্ণমালা ইত্যাদি । গল্প পুথি প্ৰাকৃতিক আৰু অন্যান্য, মধুসূদনৰ দলং, পোষ্টমডাৰ্ণ অথবা গল্প, গল্প আৰু কল্প ইত্যাদি । তেওঁৰ সাহিত্য সমালোচনামূলক গ্ৰন্থ আধুনিকতাবাদ আৰু অন্যান্য প্ৰবন্ধ, দৃষ্টি আৰু সৃষ্টি, বীক্ষণ আৰু সন্ধান ইত্যাদি । অন্যান্য বিষয়ক গ্ৰন্থ দুখন হ’ল ‘প্ৰব্ৰজন আৰু অণুপ্ৰৱেশ’ আৰু ‘সাৰ্বভৌমত্ব, সন্ত্ৰাসবাদ আৰু নাগৰিক সমাজ’ । আন এজন নামৰ কবিতা পুথিৰ বাবে তেওঁ ১৯৮৭ চনত সাহিত্য অকাডেমি বঁটা লাভ কৰে । বন্দীয়াৰ নামৰ গল্প পুথিৰ বাবে ১৯৯৬ চনত লাভ কৰে কথা পুৰস্কাৰ । তেওঁ ২০১০ বৰ্ষত অসম উপত্যকা সাহিত্য বঁটাও লাভ কৰে । বিশিষ্ট সাহিত্যিকগৰাকীক জনালোঁ ওপজা দিনৰ ওলগ ।
