বলীউডৰ নতুন অভিভাৱক দম্পতী আলিয়া ভাট আৰু ৰণবীৰ কাপুৰলৈ ভাৰতৰ জনপ্ৰিয় ডেইৰী ব্ৰেণ্ড আমূলৰ শুভেচ্ছা আৰু অভিনন্দন বাৰ্তা।আমূলে প্ৰচাৰ কৰা এই বিশেষ শুভেচ্ছামূলক পোষ্টাৰখনত এনিমেটেড আলিয়া আৰু ৰণবীৰক তেওঁলোকৰ নৱজাতকৰ সৈতে দেখা গৈছে য’ত লিখা আছে ‘এলিয়া ভেট্টি আৰু আটাৰ্লি ড’টাৰলি ডেলিচিয়াছ।‘
পোষ্টটো শ্বেয়াৰ কৰি জনপ্ৰিয় ডেইৰী প্ৰতিষ্ঠানটোৱে লিখিছে যে তাৰকা দম্পতীহালে এগৰাকী নৱজাতক কন্যাক আদৰণি জনাইছে ৷
নৱেম্বৰৰ নিশা ১২:০৫ মান বজাত দম্পতীহালে এটি কন্যা শিশুক আদৰণি জনায় ৷
বলীউডৰ শক্তিশালী যুটি আলিয়া ভাট আৰু ৰণবীৰ কাপুৰে এগৰাকী কন্যা সন্তানৰ পিতৃ-মাতৃ হৈ পৰাৰ পিছতে আলিয়াই নিজেই নিজৰ ইনষ্টাগ্ৰাম পোষ্টৰ জৰিয়তে এই তথ্য প্ৰকাশ কৰিছে ।পোষ্টটো শ্বেয়াৰ কৰি আলিয়াই লিখিছে যে এইটো তেওঁলোকৰ জীৱনৰ আটাইতকৈ ভাল খবৰ কিয়নো তেওঁলোকৰ ওচৰত তেওঁলোকৰ কণমানি সন্তান আছে আৰু এই যাদুকৰী কণমানিৰ আগমনত তেওঁলোকৰ আনন্দই কূলাই পাঁচিয়ে নধৰা হৈছে ৷
আলিয়াৰ এই ভাল খবৰটো জনাৰ পিছতেই অনুৰাগীসকলৰ লগতে চেলিব্ৰিটিসকলেও তেওঁক সামাজিক মাধ্যমযোগে অভিনন্দন জনোৱা দেখা গৈছে আৰু ইয়াৰ লগতে জনপ্ৰিয় ডেইৰী প্ৰতিষ্ঠান আমুল ইণ্ডিয়ায়ো আলিয়াক মাতৃ হোৱাৰ বাবে অভিনন্দন জ্ঞাপন কৰিছে।
আমুলে শ্বেয়াৰ কৰা শুভেচ্ছামূলক প’ষ্টটোত বহু লোকে মন্তব্য কৰিবলৈ আৰম্ভ কৰিছে আৰু শুভেচ্ছা , মতামত প্ৰকাশ কৰিছে।
অৱশ্যে ইয়াৰ বিপৰীতে এই পোষ্টটোৰ সন্দৰ্ভত একাংশ লোকে আমুল ইণ্ডিয়াক ট্ৰল কৰাও দেখা গৈছে । এজন নেটিজেনে আমূলক ঠাট্টা কৰাৰ সুৰত লিখিছে যে ভাৰতৰ বাবে এইটো অতি গুৰুত্বপূৰ্ণ। আনহাতে আন এজনে লিখিছে যে আমূলে আগতে বিজ্ঞাপনৰ বাবে সমাজৰ সৈতে জড়িত বিষয়বোৰ উত্থাপন কৰিছিল, কিন্তু এতিয়া এইটো? আমূলৰ মানদণ্ড কিমান হ্ৰাস পাইছে !
খবৰ অনুসৰি দেওবাৰে পুৱা ৭.৩০ বজাত মুম্বাইৰ এইচ এন ৰিলায়েন্স হাস্পতালত আলিয়া ভাটে এগৰাকী কন্যা সন্তান জন্ম দিয়ে। এই খবৰটো চৰ্চালৈ অহাৰ লগে লগে চিনেমা জগতৰ বহুকেইগৰাকী তাৰকা অভিনেতা অভিনেত্ৰীয়ে আলিয়া-ৰণবীৰ আৰু তেওঁলোকৰ নৱজাত কন্যাক শুভকামনাৰে ওপচাই পেলাইছে ৷ প্ৰিয়ংকা চোপ্ৰাৰ পৰা আৰম্ভ কৰি দীপিকা পাডুকন আৰু কৰীণা কাপুৰেও আলিয়া ভাট আৰু তেওঁৰ কন্যাক মৰম, আশীৰ্বাদ যাঁচিছে।
