আন্তঃৰাষ্ট্ৰীয় খ্যাতিসম্পন্ন জয়পুৰ সাহিত্য মহোৎসৱলৈ আমন্ত্ৰিত হৈছে অসমৰ প্ৰতিশ্ৰুতিসম্পন্ন গল্পকাৰ জুৰি বৰুৱা ৷ এই মহোৎসৱখনত গল্পকাৰ গৰাকী বক্তা হিচাপে উপস্থিত থাকিব ৷ অহা ১৯ জানুৱাৰীৰ পৰা ২৩ জানুৱাৰীলৈ ৰাজস্থানৰ জয়পুৰত মহোৎসৱ অনুষ্ঠিত হ’ব ৷ জয়পুৰৰ হোটেল ক্লাৰ্কছ আমেৰত অনুষ্ঠিত হ’ব এই উৎসৱ ৷
২২ জানুৱাৰীত অনুষ্ঠিত হ’বলগীয়া এক অনুষ্ঠানত জুৰি বৰুৱা বক্তা হিচাপে উপস্থিত থাকিব ৷ য’ত দেশ বিদেশৰ আন কেইবা গৰাকীও প্ৰখ্যাত সাহিত্যিক উপস্থিত থাকিব ৷ তেওঁৰ বক্তৃতানুষ্ঠানৰ শীর্ষক হৈছে –‘ শব্দৰ অনুবাদ, বিশ্বৰ অনুবাদ “ ৷ ৫০ মিনিটজোৰা এই অনুষ্ঠানত সাহিত্যিক গাৰ্ফিল্ড ফ্ৰান্সিস্কো ডিছৌজা, ছানা আহছান আৰু দীপা ভাষ্টিৰ সৈতে জুৰি বৰুৱাই অংশ ল’ব ৷ ভাৰত-ব্ৰিটেইনৰ সাংস্কৃতিক সম্পর্ক সুদৃঢ় কৰাৰ অংশ হিচাপে লেখক, কবি, অনুবাদক সকলে একত্ৰিত হৈ শব্দৰ একাধিক স্তৰৰ বিষয়ে আলোচনা কৰিব ৷
উল্লেখ্য যে ‘পৃথিৱীৰ সৰ্বশ্ৰেষ্ঠ সাহিত্য প্ৰদৰ্শন’ বুলি অভিহিত কৰা এই মহোৎসৱখন বিশ্বৰ বিভিন্ন প্ৰান্তৰ লেখক, প্ৰকাশক আৰু গ্ৰন্থপ্ৰেমীৰ আকৰ্ষণৰ কেন্দ্ৰবিন্দু ৷ ২০২২ চনৰ মাৰ্চত অনুষ্ঠিত সংস্কৰণত ৩০ টাতকৈও অধিক ভাষাক প্ৰতিনিধিত্ব কৰা ২৪০ টাতকৈও অধিক পেনেলত ৪৩০ জনতকৈ অধিক বক্তাই অংশগ্ৰহণ কৰিছিল ৷ যোৰহাটৰ ডিচিবি কলেজৰ প্ৰবক্তা জুৰি বৰুৱাৰ নৱতম গল্প সংকলন ‘প্ৰাক্তন ‘ শেহতীয়াকৈ প্ৰকাশ পাইছে ৷ ইয়াৰ পূর্বেও তেওঁৰ গল্প সংকলন, প্ৰৱন্ধ আদি প্ৰকাশ পাইছে ৷
