বয়স, জাতি, ধৰ্ম, একোৱেই প্ৰেমৰ বাধা হ’ব নোৱাৰে। এনে বহু উদাহৰণ আছে।কিন্তু ইজনে সিজনৰ ভাষা নজনাকৈ প্ৰেমত কৰাটো সম্ভৱনে? কিন্তু ইংলেণ্ডৰ ক্ল’ স্মিথ আৰু ইটালীৰ ডেনিয়েল মাৰিস্কোৱে প্ৰমাণ কৰি দেখুৱালে যে প্ৰেমৰ অন্তৰায় ভাষা হ’ব নোৱাৰে ৷ তেওঁলোকে ইজনে সিজনৰ ভাষা বুজি পোৱা নাছিল। লগে লগে সহায় ল’লে গুগল ট্ৰেন্সলেটৰৰ ৷ তেনেদৰেই দীর্ঘদিন তেওঁলোকেকথা-বতৰা অব্যাহত ৰাখে ৷ সেই বাধা অতিক্ৰম কৰি দুয়ো প্ৰেমত বান্ধ খাই পৰিল।
দুবছৰমান আগতে ইবিজাৰ এটা নাইট ক্লাবত ২৩ বছৰীয়া ক্ল’ই ২৫ বছৰীয়া ডেনিয়েলক লগ পাইছিল। ইজনে সিজনৰ ভাষা নাজানিলেও ক্ল’ই ডেনিয়েলৰ প্ৰতি আকৰ্ষিত হৈ পৰে । ক্ল’-ইয়ে প্ৰথমে ডেনিয়েলক বন্ধুত্বৰ হাত আগবঢ়াইছিল। তেওঁ ডেনিয়েলক ফোন নম্বৰটো বিচাৰে। প্ৰেমৰ প্ৰাৰম্ভিক পৰ্যায়ত ইজনে সিজনৰ লগত কথা পাতিলে সম্পৰ্কৰ ভেটি মজবুত হয়। তেনে ক্ষেত্ৰত ইজনে সিজনৰ ভাষা নাজানিলে প্ৰেমত থকাটো টান। কিন্তু ক্ল’ই ডেনিয়েলক প্ৰথম দেখাৰ লগে লগে প্ৰেমত পৰিছিল। ভাষাৰ বাধাৰ কথা তেওঁ গুৰুত্ব নিদিলে।
ইজনে সিজনক ভালদৰে বুজিবলৈ একেলগে ভিডিঅ’ আৰু চিনেমা চাবলৈ ধৰিলে। তেওঁলোকে নিজৰ ভাষা বুজিবলৈ গুগল অনুবাদকৰ ওপৰত নিৰ্ভৰ কৰে।
পৰিচয়ৰ এসপ্তাহৰ ভিতৰতে ক্ল’ই ডেনিয়েল আৰু তেওঁৰ পৰিয়ালৰ সৈতে সময় কটাবলৈ ইটালীৰ নেপলছলৈ যাত্ৰা কৰে। ডেনিয়েলে কয়, ‘এই সকলোবোৰ প্ৰেমৰ কথা আছিল।ক্ল’ই বহুত কথা পাতিছিল আৰু হাঁহিছিল। তেওঁৰ ভাষা মই বুজি পোৱা নাছিলো। মই মাত্ৰ বুজিলোঁ যে তেওঁ আনতকৈ পৃথক। প্ৰথম দেখাৰ পৰাই ভাল পাইছিলোঁ। মই সিদ্ধান্ত ললোঁ যে তেওঁক মোৰ জীৱন সংগী কৰি ল’ম।“
দুবছৰ ধৰি ক্ল’-ডেনিয়েলৰ সম্পৰ্ক। ক্ল’ই ডেনিয়েলক ইংৰাজী শিকোৱাৰ দায়িত্ব লৈছে আৰু ডেনিয়েলে ক্ল’ক ইটালীয় খাদ্য কেনেকৈ খাব লাগে শিকোৱাৰ দায়িত্ব লৈছে ৷
